Azərbaycan stomatologiya elmi dünyanın ən son yeniliklərindən uğurla bəhrələnir

Azərbaycanda çağdaş tibb elminin inkişafında, mükəmməl səhiyyə sisteminin formalaşmasında, eləcə də müasir standartlara cavab verən səhiyyə infrastrukturun yaradılmasında ümummilli lider Heydər Əliyevin misilsiz xidmətləri hər zaman böyük rəğbətlə, ehtiramla vurğulanır. Naxçıvan Muxtar Respublikasında ümummilli lider Heydər Əliyevin və akademik Zərifə xanım Əliyevanın xatirələrinə həsr olunmuş "Stomatologiyanın müasir aspektləri" mövzusunda elmi-praktik konfrans bunun daha bir bariz təcəssümü olmuşdur.

Azərbaycan Respublikası və Naxçıvan Muxtar Respublikası səhiyyə nazirliklərinin, Əziz Əliyev adına Azərbaycan Dövlət Həkimləri Təkmilləşdirmə İnstitutunun, Azərbaycan Tibb Universtitetinin, Özəl Stomatoloji Fəaliyyətlə Məşğul Olanların Assosiasiyası və Azərbaycan İmplantoloq İctimai Birliyinin birgə təşkilatçılığı ilə keçirilən elmi-praktik konfransın iştirakçıları əvvəlcə ulu öndər Heydər Əliyevin abidəsi önünə gül dəstələri düzmüş, habelə Naxçıvanda yüksək memarlıq üslubunda inşa edilmiş Heydər Əliyev Muzeyində olmuşlar. Tədbirdə ulu öndərin nurlu xatirəsi yad edilmiş, respublikada tibbin müxtəlif sahələrinin, o cümlədən stomatologiyanın inkişafındakı xidmətləri xatırlanmışdır.

Yeni istifadəyə verilmiş Naxçıvan Diaqnostika Mərkəzində təşkil olunmuş konfrans barədə qəzetimizə məlumat verən respublikanın baş stomatoloqu, Özəl Stomatoloji Fəaliyyətlə Məşğul Olanların Assosiasiyasının rəhbəri Kamran Aslanov tədbirdə respublikanın bu sahə üzrə ən aparıcı mütəxəssislərinin iştirak etdiyini bildirmişdir. Onun sözlərinə görə, elmi-praktik konfransda həmçinin, stomatologiyanın müasir durumu və inkişaf perspektivləri ətrafında geniş fikir mübadiləsi aparılmış, qarşıda duran vəzifələrdən söz açılmışdır.

Konfransda Naxçıvan Muxtar Respublikasının səhiyyə naziri Niyazi Novruzov, Azərbaycan İmplantoloq İctimai Birliyinin sədri Cabbar Həsənov, Əziz Əliyev adına ADHTİ mütəxəssisi, tibb elmləri namizədi Cəfərağa Səmədov, Uşaq Stomatoloji Mərkəzinin baş həkimi, tibb elmləri namizədi Rafael Sultanov, respublika Stomatoloji Mərkəzinin həkimi, tibb elmləri namizədi Ziba Qasımova və başqaları stomatologiyanın müxtəlif problemləri ətrafında məruzələr etmiş, dünya praktikasındakı son yeniliklərdən söhbət açmışlar. "Azərbaycanın stomatologiya sahəsində təcrübəli mütəxəssislərinin, alimlərinin, həkimlərinin iştirak etdiyi konfrans məhsuldar keçməklə, faydalı nəticələrlə yadda qaldı. Burada stomatologiyanın dünəni, bugünü və ən son nailiyyətləri ilə bağlı geniş fikir mübadiləsi aparıldı. Bakıdan getmiş aparıcı mütəxəssislər Naxçıvanda fəaliyyət göstərən stomatoloqları bu sahədəki elmi yeniliklərlə, tətbiq olunan ən son texnologiyalarla tanış etdilər. Tədbirdə Naxçıvanda stomatologiyanın vəziyyəti də ətraflı təhlil edildi, bir sıra maraqlı tövsiyə və təkliflər səsləndi. Fikrimcə, paxtaxtdan kənarda belə tədbirlərin keçirilməsi regionlarda tibbi yeniliklərin mənimsənilməsi və tətbiqi sahəsində yaxşı imkanlar açır" - deyə Kamran Aslanov vurğulamışdır.

Son illər Azərbaycanda tibbin bütün sahələrində olduğu kimi, stomatologiya sahəsində də müsbət irəliləyişlərin, əsaslı keyfiyyət dəyişikliklərinin baş verdiyini diqqətə çəkən respublikanın baş stomatoloqu Səhiyyə Nazirliyinin bu sahənin inkişafına dəstək verdiyini də razılıqla qeyd etmişdir. Kamran Aslanov demişdir ki, özəl stomatoloji kabinetlərin sayının artması eyni zamanda sivil rəqabətə, keyfiyyətli xidmətə zəmin yaradır: "Son illərdə tibbin bütün sahələrində özünü göstərən müasirləşmə stomatologiya sahəsində də müşahidə olunur. Səhiyyə Nazirliyi stomatologiyanın problemlərinin həllinə, özəl klinikaların inkişafına dəstək verir. Azərbaycan Prezidenti İlham Əliyevin fərmanı ilə respublika üzrə bütün stomatoloji poliklinikalar özəlləşdirilməyə çıxarılıb. Bu gün özəl stomatoloji kabinetlərin sayının artması da yaranmış yeni imkanlarla bağlıdır. Belə kabinetlərin sayının artması sağlam rəqabətin güclənməsinə, vətəndaşlara göstərilən tibbi xidmətin keyfiyyətinin yüksəlməsinə əsaslı zəmin yaradır. Özəl klinikalar dünyadakı ən son yenilikləri öyrənərək tətbiq etməyə, yeni cihazlar, stomatoloji qurğu və alətləri tez bir zamanda əldə etməyə çalışırlar. Vətəndaşlar da yeniliklərdən vaxtında xəbər tutaraq istədikləri stomatoloji kabinetlərə müraciət edirlər. Yəni bu gün hər bir insan istədiyi stomatoloqu seçməkdə tam azad və sərbəstdir. Bununla yanaşı, aztəminatlı vətəndaşlar üçün ümumi poliklinikaların nəzdində pulsuz fəaliyyət göstərən stomatoloji şöbələr var. Hər bir vətəndaş yaşayış yerinə görə pulsuz stomatoloji kabinetə müraciət edə bilər".

Respublikanın baş stomatoloqu Kamran Aslanov azərbaycanlı mütəxəssislərin beynəlxalq tədbirlərdə iştirakını da razılıqla diqqətə çəkmişdir. O demişdir ki, belə tədbirlərdə iştirak Azərbaycan stomatologiyasının inkişafına, beynəlxalq təcrübənin öyrənilməsinə yaxşı imkanlar açır: "Son illər elə beynəlxalq konfrans olmayıb ki, orada Azərbaycandan 10-15 mütəxəssis iştirak etməsin. Yalnız bu il 30-a yaxın aparıcı mütəxəssis xarici ölkələrdə seminarlarda, elmi məclislərdə olub, ən son yeniliklərlə tanışlıq imkanı qazanıb. Dünya elmindəki qabaqcıl təcrübənin Azərbaycanda tətbiqi isə respublikada stomatologiyanın sürətli inkişafının göstəricisidir".

Kamran Aslanovun sözlərinə görə, hazırda dünyada stomatologiyanın ən böyük nailiyyətlərindən biri də məhz implantologiyadır. Onun fikrincə, son illər respublikada bu sahə də sürətlə inkişaf edir: "Bizim stomatoloji mərkəzdə 20 ildən artıqdır kir, implantologiya ilə məşğul olurlar. İmplantologiya elə bir sahədir ki, o yüksək peşəkarlıqla aparılmalıdır. Bu sahədə çalışan həkimlər mütləq Əziz Əliyev adına Azərbaycan Dövlət Həkimləri Təkmilləşdirmə İnstitutunda fəaliyyət göstərən xüsusi kursları keçməlidirlər. Bu kusrları keçməyən həkimlərin implantologiya ilə məşğul olmasına icazə vermirik. Ümumilikdə, implantologiya çox perspektivli bir sahədir və respublikamızda sürətlə inkişaf edir".

İ.Əliyeva

Azərbaycan.-2009.-26 may.-S.7.