İordaniyanın milli bayramı şərəfinə

İordaniya Haşimilər Krallığının Azərbaycandakı səfirliyi ölkəsinin milli bayramı - Müstəqillik Günü münasibətilə mayın 26-da "Hyatt Park" mehmanxanasında rəsmi qəbul təşkil etmişdir.

Azərbaycan Respublikasının və İordaniya Haşimilər Krallığının dövlət himnləri səslənmişdir.

İordaniyanın Azərbaycandakı səfiri Adel Adaileh çıxış edərək ölkəsinin müstəqillikdən sonra keçdiyi inkişaf yolundan danışmış, bu illər ərzində iqtisadi və mədəni sahələrdə böyük uğurlar qazanıldığını, İordaniyanın dünya birliyində layiqli yer tutduğunu vurğulamışdır.

Diplomat dost ölkələr olan İordaniya ilə Azərbaycan arasında gündən-günə genişlənən əlaqələrdən məmnunluğunu bildirərək demişdir ki, dövlət başçılarının qarşılıqlı səfərləri, yüksək səviyyəli görüşlər və danışıqlar ikitərəfli münasibətlərin yüksələn xətt üzrə inkişafına əlverişli zəmin yaradır.

Səfir vurğulamışdır ki, İordaniya ilə Azərbaycan arasında əlaqələr iki görkəmli dövlət xadiminin - Heydər Əliyevin və Kral Hüseyn bin Təlalın səyləri nəticəsində qurulmuşdur. İordaniya Kralı Əlahəzrət II Abdullah və Prezident İlham Əliyevin səyləri nəticəsində hazırda bu əlaqələr uğurla davam etdirilir.

A.Adaileh diqqətə çatdırmışdır ki, ölkələrimiz arasında münasibətləri arzu olunan səviyyəyə çatdırmaq üçün Kral II Abdullah Azərbaycana, Prezident İlham Əliyev isə İordaniyaya səfər etmişdir.

Ölkələrimiz iqtisadi, mədəni, ticari, informasiya və turizm sahələrində çox uğurlu əməkdaşlıq edirlər.

Diplomat demişdir ki, dövlət başçılarının qarşılıqlı səfərləri, yüksək səviyyəli görüşlər və danışıqlar öz bəhrəsini verməyə başlamışdır. Bakıda İordaniya iş adamlarının biznes-forumu təşkil edilmiş, bu ölkənin sənaye mallarının sərgisi keçirilmiş və Əmman ilə Bakı arasında birbaşa hava reysləri açılmışdır.

Səfir 28 may - Respublika Günü münasibətilə Azərbaycan Prezidentini və xalqını təbrik etmiş və dinamik inkişaf etməkdə olan müstəqil respublikamıza yeni uğurlar arzulamışdır.

Azərbaycanın iqtisadi inkişaf naziri Şahin Mustafayev əlamətdar gün münasibətilə dost İordaniya xalqını Azərbaycan Prezidenti İlham Əliyevin adından təbrik etmiş, dövlətimizin başçısının salamlarını və xoş arzularını mərasim iştirakçılarına çatdırmışdır.

Ş.Mustafayev demişdir ki, İordaniya Kralı II Abdullahın ölkəmizə və Prezident İlham Əliyevin İordaniyaya səfərləri əsası ümummilli liderimiz Heydər Əliyev tərəfindən qoyulmuş dostluq münasibətlərində yeni mərhələ açmışdır.

Qəbulda Milli Məclisin deputatları, xarici ölkələrin Bakıdakı səfirləri, beynəlxalq təşkilatların ölkəmizdəki təmsilçiləri, paytaxt ictimaiyyətinin nümayəndələri iştirak etmişlər.

AzərTAc

Azərbaycan.-2009.-27 may.-S.4.