Demokratiyanın
mühüm göstəricilərindən biri də hökumətin
ictimai rəyə həssas münasibəti əsasında
müəyyənləşir. İctimai rəy
dövlətin işinə nəzarət funksiyasını
yerinə yetirməklə müsbət və mənfi meyillərə
obyektiv qiymət verən, hökuməti mövcud problemlərin
həllinə doğru istiqamətləndirən mühüm
mexanizmdir. Xalqdan mandat almış hakimiyyət
fəaliyyəti ilə daim ictimai etimadı doğrultmağa,
hər bir vətəndaşın mənafeyinə hesablanan
siyasi-hüquqi və sosial-iqtisadi islahatlar kursu həyata
keçirməyə çalışır. Bu prinsip son 5 ildə Heydər Əliyevin dövlətçilik
irsini inamla davam etdirən və daha da möhkəmləndirən
Azərbaycan Prezidenti İlham Əliyevin fəaliyyətinin
başlıca qayəsini təşkil edir. İlk gündən hakimiyyətin xalqa xidmət vasitəsi
olduğunu bəyan etmiş ölkə rəhbəri ötən
müddətdə verdiyi bütün vədləri əməli
işi ilə doğrultmaq üçün əzmlə
çalışmış, hər bir addımda vətəndaşların
mənafeyini əsas götürmüşdür.
Müdrik və uzaqgörən
Azərbaycan xalqının 2008-ci il 15
oktyabr tarixli seçimi də məhz bu reallıqla şərtlənmişdir.
Ölkə vətəndaşları son beş
ildə hər vədini əməli işi ilə
doğruldan, əzmkar fəaliyyəti ilə həyatın ən
müxtəlif sahələrində inkişaf və tərəqqiyə
zəmin formalaşdıran, insan və şəxsiyyət
amilini uca tutan layiqli siyasi liderə səs vermişlər. Ölkədəki islahatların davam etdirilməsi zərurəti
Heydər Əliyev siyasi kursunun davam etdirilməsini, hakimiyyət
estafetinin bu xətti uğurla başa çatdırmağa
qadir liderə - cənab İlham Əliyevə
ötürülməsini diktə etmişdir. Xalqına
və dövlətinə qəlbən bağlı olan cənab
İlham Əliyevin ikinci müddətə Azərbaycan
Prezidenti seçilməsi dünyanın tərəqqipərvər
və sabitlik, demokratiya, sülh, rifah və inteqrasiya istəyində
olan bütün mütərəqqi qüvvələri tərəfindən
razılıqla qarşılanmışdır.
Ulu öndər
Heydər Əliyev kimi böyük dühanın ailəsində
yetkinləşərək zəngin dövlətçilik məktəbi
əxz edən, müasir bilik və təcrübəyə yiyələnən
cənab İlham Əliyev şəxsi liderlik keyfiyyətləri
sayəsində cəmiyyətdən lazımi dəstəyi
ala bilmişdir. İntellektlə istedadın, ənənə
ilə novatorluğun, keçmişlə gələcəyin
üzv vəhdətinə, yaradıcı sintezinə nail olmaq
qabiliyyəti, Azərbaycanın dünəni, bugünü və
sabahına sonsuz, sarsılmaz sədaqət - bunlar İlham Əliyev
şəxsiyyətini hər bir insana sevdirən cəhətlərdir.
Liderlik xüsusiyyətlərinin əksəriyyət
tərəfindən qəbul edilmək, geniş siyasi spektrin
inamını qazanmaq və elektoral dəstəyə malik olmaq
kimi politoloji bir mənanı ehtiva etdiyini nəzərə
alsaq, bu termini bütün kateqoriyalar üzrə dövlət
başçısı İlham Əliyevə şamil etmək
olar. Cənab İlham Əliyev həm də
müasir dünyanın qloballaşma və yeni geosiyasi
reallıqlardan irəli gələn siyasi mənzərəsini
qiymətləndirməyi bacaran liderdir. Bu amilə diqqət
yetirən nüfuzlu ABŞ politoloqu Zbiqnev Bjezinski xüsusilə
cənab İlham Əliyevin regional liderlik keyfiyyətlərini
önə çəkir: "Prezident İlham Əliyev həm
Qafqazda, həm də
2008-ci il
oktyabrın 24-də keçirilən təntənəli
andiçmə mərasimində dövlət
başçısı İlham Əliyev ötən beş
ildə xalq qarşısında verdiyi bütün vədləri
gerçəkləşdirdiyini, qarşıya qoyulan vəzifələrin
uğurla icra edildiyini vurğulamışdır. Xalqın
etimadını bundan sonra da doğruldacağını, üzərinə
düşən missiyanın öhdəsindən layiqincə gələcəyini,
Heydər Əliyevin siyasətini davam etdirəcəyini
söyləyən Prezident İlham Əliyev oktyabrın 15-də
Azərbaycan xalqının sülhə, əmin-amanlığa,
tərəqqiyə, inkişafa, quruculuğa, sabitliyə səs
verdiyini, ölkədə bu siyasətə alternativ
olmadığını xüsusi vurğulamışdır:
"Beş il bundan əvvəl andiçmə mərasimində
mən Azərbaycan xalqına söz vermişdim ki, Azərbaycanın
hərtərəfli inkişafı üçün fəal
çalışacağam. Söz vermişdim
ki, Azərbaycanda Heydər Əliyev siyasətini davam etdirəcəyəm.
Çünki bu, Azərbaycanın bugünü
və sabahı üçün, gələcəyi
üçün yeganə siyasətdir. Bu
siyasət Azərbaycanı böyük bəlalardan
qurtardı. Ulu öndər Heydər Əliyevin
rəhbərliyi ilə Azərbaycan sürətlə
inkişaf etmişdir. Azərbaycan xaosdan,
böhrandan, anarxiyadan inkişafa, sabitliyə doğru
böyük addımlar atmışdır. Məhz onun rəhbərliyi
altında Azərbaycanda dövlətçilik ənənələri
qurulmuşdur, Azərbaycan öz dövlət müstəqilliyini
möhkəmləndirmiş, Azərbaycanda sabitlik
yaradılmış və inkişaf başlamışdır.
Bu gün bir daha demək istəyirəm ki, növbəti
beş il ərzində mən bu siyasətə sadiq
qalacağam və bu yoldan dönməyəcəyəm".
Sosial-iqtisadi inkişaf yüksək idarəçilik
keyfiyyətlərinə malik liderlə və qarşıda
duran vəzifələrə doğru inamla irəliləyən
çevik komandanın birgə fəaliyyətinin məntiqi nəticəsi
olan mütərəqqi proses kimi səciyyələnir. Dəqiq
sosial-iqtisadi strategiya əsasında qarşıda duran hədəfləri
düzgün müəyyənləşdirən liderlər həm
də cəmiyyətin davamlı inkişafına xidmət edən
məqsədləri gerçəkləşdirməyə nail
olurlar. Ulu öndər Heydər Əliyevin əsasını
qoyduğu strateji siyasi kursu ötən 5 ildə inamla davam
etdirən Azərbaycan Prezidenti məhz belə qurucu liderlərdən
biri olaraq çoxşaxəli fəaliyyəti ilə ona bəslənilən
ümidləri tam doğrultmuş, cəmiyyətin
bütün gözləntilərini gerçəkləşdirməyə
çalışmaqla, hər bir fərdin marağına cavab
verən qətiyyətli qərarlar qəbul etmişdir.
2003-cü ildə "Mən hər bir Azərbaycan vətəndaşının
Prezidenti olacağam" deyə prezident səlahiyyətlərinin
icrasına başlayan dövlət başçısı
ötən beş ildə bu vədini hər bir vətəndaşın
həyatında gerçəkliyə çevirmək
üçün ciddi siyasi iradə, qətiyyət və əzmkarlıq
nümayiş etdirmişdir.
Dövlət başçısının ötən 5 ildə əldə etdiyi böyük nailiyyətlər ilk növbədə sistemli və düzgün koordinasiya olunmuş fəaliyyətin məntiqi nəticəsi kimi diqqəti çəkir. Cənab İlham Əliyevin fəaliyyətinin üstün cəhəti məhz bundan ibarətdir ki, o, mövcud gerçəklikləri obyektiv şəkildə qiymətləndirməyi, milli maraqlar naminə cəsarətli addımlar atmağı, yaranmış ekstremal şəraitdə ən optimal qərarlar qəbul etməyi, ölkənin taleyüklü problemlərinə həssaslıqla yanaşmağı bacarır. Dövlət idarəçiliyi sisteminə müasirlik çalarları gətirmiş cənab İlham Əliyev hökumətin mütəmadi olaraq xalq qarşısında hesabat verməsini sosial-iqtisadi sahədə qazanılan nailiyyətlərin mühüm şərti hesab etməklə yanaşı, son 15 ildə müstəqil Azərbaycanın davamlı, dönməz inkişaf yoluna çevrilmiş demokratikləşmə və vətəndaş cəmiyyəti quruculuğu prosesinin keyfiyyətcə yeni mərhələsi kimi dəyərləndirir. Son beş ildə kadr seçiminə yanaşma prinsipləri yeni dövrün reallıqları ilə şərtlənmiş, məmurların fəaliyyəti onların xalqa xidmət məramına nəzərən müəyyənləşdirilmişdir. Cənab İlham Əliyevin idarəçilik üslubunda kadrın peşəkarlığı, vəzifə məsuliyyəti, xalqa qüsursuz xidməti mühüm amil kimi aktuallıq kəsb edir. Ümummilli lider uzun illər ərzində elə bir dövlətçilik təsisatı formalaşdırmışdır ki, müasir dövrdə hansısa kadr öz liderinə xəyanəti ilə bu təsisatın fəaliyyətinə əngəl törədə, öz çirkin məqsədlərini həyata keçirə bilməz. Bu zaman sistem özü onu dərhal sıralarından kənarlaşdıracaq, onun səlahiyyətləri saf əqidəyə malik digər şəxsə həvalə ediləcəkdir. Bununla belə, cənab İlham Əliyevin həyata keçirdiyi siyasi kursa sadiqlik amili yenə də aktualdır. Bu sadiqlik anlayışı daha çox hər hansı kadrın müasir təfəkkürə, mütərəqqi baxışlara malik olması, ona tapşırılmış sahədə vicdanla fəaliyyət göstərməsi, xalqın problemlərinə həssas münasibəti əsasında müəyyənləşir.
Son 5 ildə ölkənin sosial-iqtisadi inkişafında yüksək nailiyyətlər əldə edilmiş, makroiqtisadi sabitlik daha da möhkəmlənmiş, əhalinin həyat səviyyəsi xeyli yaxşılaşmışdır. Milli dövlət quruculuğu prosesi sürətləndikcə, ictimai, hüquqi, psixoloji mühit dəyişdikcə, respublikanın dünya iqtisadiyyatına inteqrasiyası dərinləşdikcə, sosial-iqtisadi inkişaf prioritetləri də mahiyyət etibarilə dəyişir. Bu kimi incə məqamları nəzərə alan cənab İlham Əliyevin əsas məqsədi kəmiyyət dəyişikliklərindən keyfiyyət dəyişikliklərinə keçidi təmin etməkdən, hər bir Azərbaycan vətəndaşı üçün bu iqtisadi uğurlardan yetərincə bəhrələnmək imkanı yaratmaqdan ibarətdir. Son 5 ildə ölkədə həyata keçirilən siyasətin əsasən sosialyönümlü xarakter daşıması, sosial məsələlərin həllinə xüsusi diqqətlə yanaşılması da deyilənlərin əyani təsdiqidir. "Uzaq və yaxın tarixdən də bilirik ki, köklü islahatlar müvəqqəti olaraq insanların yaşayış səviyyəsini endirir. Azərbaycanda isə biz bunun əksini görürük. Biz köklü iqtisadi islahatlar aparmaqla bərabər, sosial məsələlərin həllində böyük işlər görmüşük. Son beş il ərzində minimum pensiyanın məbləği 4 dəfə artırılmışdır. Minimum əməkhaqqı 8 dəfə, orta əməkhaqqı 3,6 dəfə artırılmışdır. Bu gün dövlətdən birbaşa ünvanlı sosial yardım alan insanların sayı 600 minə çatmışdır. Dövlət ehtiyacı olan vətəndaşlarının yaşayış səviyyəsinin yaxşılaşdırılması üçün öz köməyini göstərir və biz gələcəkdə bu siyasəti davam etdirəcəyik. Azərbaycanda yoxsulluğun azaldılması məni çox sevindirir. Əgər 2003-cü ildə yoxsulluq şəraitində yaşayanların sayı 49 faiz idisə, 2007-ci ilin yekunlarına görə, bu rəqəm 16 faizə düşübdür" deyə Azərbaycan Prezidenti andiçmə mərasimində vurğulamışdır.
Azərbaycanda
iqtisadi modernləşmənin başlıca prinsipi hər bir
sahədə yeni dövrün tələblərinə cavab
verən infrastrukturun yaradılması yolu ilə insan
resurslarının inkişafıdır. Cənab İlham Əliyev
bildirir ki, dövlət yalnız sosial müdafiə və təminat
sistemi vasitəsilə hər bir vətəndaşın
firavan həyat səviyyəsini təmin edə bilməz. Respublika əhəmiyyətli magistral yolların təmiri,
bölgələrin elektrik enerjisi, işıq, qaz, su kimi
problemlərinin həlli, kommunal xidmət sferasında mütərəqqi
islahatların aparılması kimi tədbirlər
bütövlükdə Azərbaycan vətəndaşlarının
firavan və rahat yaşayışının təminatı
məqsədindən irəli gəlir. Xatırlatmaq
yerinə düşər ki, son 5 ildə hökumətin
investisiya vəsaitləri hesabına bir çox ucqar rayonlara
qaz kəməri çəkilmiş, təmirinə ciddi
ehtiyac olan yollar bərpa edilmiş, İsmayıllı-Oğuz
bölgəsindən Bakıya içməli su kəmərinin
çəkilişinə başlanılmış, paytaxtda müasir
körpülərin və yol qovşağının
salınması, şəhər infrastrukturunun yeniləşdirilməsi,
tarixi memarlıq və mədəniyyət abidələrinin,
park və xiyabanların yenidənqurulması istiqamətində
kompleks tədbirlər həyata keçirilmişdir. Dövlət
başçısı İlham Əliyev andiçmə mərasimindəki
çıxışında infrastrukturun yeniləşdirilməsi
vacibliyini bir daha önə çəkmişdir: "Bizim
böyük infrastruktur layihələrimiz həyata
keçirilir. Son beş il ərzində 4 beynəlxalq aeroport
istismara verilibdir. Səkkiz elektrik stansiyası tikilibdir. Minlərlə
kilometr yollar salınıbdır. Qazlaşdırma prosesi
uğurla gedibdir. Əgər 2003-cü ildə Azərbaycanda
qazlaşdırma 62 faiz idisə, bu gün 85 faizdir. Su kəmərləri
çəkilir. Yəni, bütün bu infrastruktur layihələri
Azərbaycanı gücləndirir. Amma bununla bərabər,
insanların yaşayış səviyyəsinin qalxması,
yoxsulluq içində yaşayanların vəziyyətinin
yaxşılaşması - bu, mənim üçün az əhəmiyyət
kəsb etmir, bəlkə daha da böyük əhəmiyyət
kəsb edir. Çünki bizim bütün siyasətimiz Azərbaycan
xalqının yaxşı yaşamasına, Azərbaycanın
möhkəmlənməsinə yönəldilibdir".
Son illər həyata keçirilən çevik
islahatlar nəticəsində çağdaş
dünyanın ümumi daxili məhsul istehsalına görə
ən sürətlə inkişaf edən dövlətlərindən
birinə çevrilən, qlobal enerji və kommunikasiya layihələrinin
gerçəkləşdirilməsində mühüm rol
oynayan Azərbaycanın Avratlantik məkana inteqrasiya
kursuna sadiqliyi beynəlxalq ictimaiyyətin diqqətini həm də
ölkəmizdəki demokratikləşmə proseslərinə
yönəldir. Hazırkı mərhələdə
neft gəlirlərindən əldə olunan külli miqdarda vəsaitin
respublikada vətəndaş cəmiyyəti və hüquqi
dövlət quruculuğu prosesinin daha da sürətləndirilməsinə,
ümumilikdə insan amilinin yüksəlişinə yönəldilməsi
demokratiya sahəsində böyük təcrübəsi
olan dövlətlər və ayrı-ayrı beynəlxalq təşkilatlar
tərəfindən müsbət qarşılanır. Dövlət başçısı qloballaşma
dövrünün yeni geosiyasi reallıqlarından irəli gələn
mənzərənin əsas cizgilərinə cavab verən
siyasət yürüdür və bu siyasətin mahiyyətində
insan hüquqları məsələsi prioritet mahiyyət kəsb
edir.
Ulu öndərin
tarazlaşdırılmış xarici siyasət kursunu ötən
5 ildə inamla davam etdirən cənab İlham Əliyev
dünya siyasətinə əsaslı təsir imkanları olan
dövlətlərlə qarşılıqlı faydalı əməkdaşlığı
genişləndirmək, inkişaf etdirmək, beynəlxalq təşkilatlarda
Azərbaycanın mövqelərini gücləndirmək
istiqamətində də böyük səy və əzmkarlıq
göstərmişdir. Yeni dünya düzənində
aparıcı güc mərkəzləri arasında gedən
mübarizənin mahiyyətinə uyğun xarici siyasət
yeridən müstəqil Azərbaycan Cənubi Qafqazın
lokomotiv dövlətinə, sülh, sabitlik və iqtisadi tərəqqinin
əsas mərkəzinə çevrilmişdir.
Balanslaşdırılmış xarici siyasət nəticəsində
Azərbaycan beynəlxalq mövqelərini və milli təhlükəsizliyini
möhkəmləndirə bilmiş, qlobal məkanda cərəyan
edən proseslərin istiqamətverici subyektinə çevrilməyə
nail olmuşdur.
Respublikanın milli təhlükəsizliyinin təmini, qlobal və
yerli təhlükəsizlik maraqlarının
uzlaşdırılması son 5 ildə dövlət
başçısını ciddi şəkildə
düşündürən məsələlər
sırasında olmuşdur. Bu da təsadüfi
deyil - Azərbaycan Şərqlə Qərbin, Avropa ilə
Asiyanın kəsişdiyi mühüm nəqliyyat-kommunikasiya
dəhlizlərinin keçdiyi əhəmiyyətli geosiyasi,
geoiqtisadi və geostrateji məkanda yerləşdiyindən
regionun və bütövlükdə dünyanın
aparıcı dövlətləri arasında tarazlaşdırılmış
siyasət yeritməyə, kəsişən və
üst-üstə düşən maraqları nəzərə
almağa çalışır.
Bütün bunlar Azərbaycanın ictimai-siyasi cəhətdən sabit, iqtisadi cəhətdən sürətlə inkişaf edən, eyni zamanda, beynəlxalq miqyasda maraq və mənafeyini layiqincə təmin edən dövlətə çevrilməsində Prezident İlham Əliyevin yeritdiyi uğurlu xarici siyasət kursunun mühüm əhəmiyyət daşıdığını birmənalı təsdiqləmişdir. Oktyabrın 24-də keçirilmiş andiçmə mərasimində dövlət başçısı İlham Əliyev ötən beş ildə xarici siyasətdə nəzərəçarpacaq uğurların olduğunu razılıqla qeyd etmişdir: "Azərbaycan son beş il ərzində bölgədə öz yerini möhkəmləndiribdir. Biz bütün ölkələrlə ikitərəfli surətdə faydalı əməkdaşlığın dərinləşməsində maraqlıyıq, bunu edirik və bizim təşəbbüslərimiz bu məqsədi güdür. Xarici siyasətdə Azərbaycan son beş il ərzində böyük dərəcədə öz mövqelərini möhkəmləndirə bilmişdir. Bizim regional müstəvidə təşəbbüslərimiz həm regional əməkdaşlığın möhkəmlənməsinə xidmət göstərir, həm də Azərbaycanın maraqlarına uyğundur. Əminəm ki, bölgədə bizimlə əməkdaşlıq edən ölkələr də bu əməkdaşlıqdan razıdır. Bizim bütün təşəbbüslərimiz bu məqsədi güdür ki, bölgədə sülh, sabitlik daha da möhkəm olsun, iqtisadi əməkdaşlıq sürətlənsin və bölgədə yerləşən bütün ölkələr sülh, sabitlik, dostluq şəraitində yaşasınlar".
Azərbaycanın son illər dünya enerji satışı bazarında çəkisinin və rolunun xeyli dərəcədə artması Avropa dövlətlərinin respublikamızla bu sektorda sıx əməkdaşlıq etmək marağını daha da gücləndirmişdir. Respublikamızın Avropanın enerji təhlükəsizliyində mühüm rol oynaması istər fövqəl dövlətləri, istərsə də aparıcı beynəlxalq təşkilatlar tərəfindən birmənalı etiraf olunur. Ulu öndər Heydər Əliyevin yeni neft strategiyasını inamla davam etdirən Prezident İlham Əliyevin diplomatik səyləri nəticəsində Azərbaycan bu gün regionda hansısa ölkədən enerji asılılığı olmayan, tələbatını daxili imkanlar hesabına ödəməyə qadir yeganə respublika kimi çıxış edir. Respublikamızda uğurla həyata keçirilən enerji siyasətinin məqsədi Azərbaycanın dünya bazarına çıxışını artırmaq, həmin bazarlar üçün alternativ mənbə yaratmaqdan ibarətdir və bu da beynəlxalq ictimaiyyətin maraqlarına tamamilə cavab verir.
Xüsusi vurğulamaq lazımdır ki, Bakı-Tbilisi-Ceyhan əsas ixrac neft boru kəməri, Bakı-Tbilisi-Ərzurum qaz kəməri məhz cənab İlham Əliyevin prezidentliyi dövründə reallığa çevrilmiş, perspektivdə Şimal və Cənubun genişmiqyaslı əməkdaşlığına geniş imkanlar yaradacaq Bakı-Tbilisi-Qars dəmir yolu xəttinin tikintisinə başlanmışdır. 2006-cı ilin noyabrında Avropa İttifaqı ilə enerji sahəsində anlaşma memorandumu imzalamış respublikamız bu gün bütövlükdə MDB və Avropa məkanında Rusiyadan enerji asılılığı olmayan, müstəqil siyasət yeridən dövlətlərdən biridir. Bu fakt özlüyündə Azərbaycanın dünya birliyi üçün önəmini xeyli artırmış, respublikamızın Avratlantik strukturlara inteqrasiya rrosesini sürətləndirmişdir.
İnkişaf
etmiş dövlətlərin də təcrübəsi təsdiqləyir
ki, iqtisadi sistemin sabitliyi labüd surətdə ictimai
şüurun daha geniş demokratikləşməsinə
doğru aparır. Dörd ildən artıq müddətdə
genişmiqyaslı iqtisadi tədbirlər kompleksinin həyata
keçirilməsi əhalinin alıcılıq qabiliyyətinin
yüksəlməsinə, vətəndaşların maliyyə
imkanlarının artmasına şərait yaratmış, bu
da cəmiyyət üzvlərinin davranış stereotiplərinin
dəyişməsinə zəmin yaratmışdır.
Azərbaycanda həyata keçirilən dövlət siyasətinin üstün istiqamətlərindən biri də vətəndaş cəmiyyəti institutlarını möhkəmlətmək, siyasi plüralizm, demokratikləşmə prosesini dərinləşdirmək, bu yöndə Qərbə inteqrasiya - Avropa Şurası, Avropa Birliyi və ATƏT kimi mötəbər təşkilatlarla əməkdaşlıq xəttini davam etdirməkdən ibarətdir. Demokratikləşmə, insan hüquq və azadlıqlarının təminatı sahəsində qazandığımız uğurlar, Prezident İlham Əliyevin bu sahədə yeritdiyi siyasət beynəlxalq birlik tərəfindən təqdir olunur, dünyanın aparıcı siyasi mərkəzləri, təşkilatları bunu müsbət qiymətləndirir. Prezident İlham Əliyev andiçmə mərasimində iqtisadi inkişaf və demokratikləşmə kursunun Azərbaycan üçün prioritet mahiyyət kəsb etdiyini bir daha vurğulamışdır: "Müasirləşmə, sadəcə olaraq, infrastruktur layihələri ilə, yaxud da iqtisadi artımla ölçülmür. Eyni zamanda, bizim siyasi sistemimiz müasirləşməli, təkmilləşməlidir. Mən çox şadam ki, beş il ərzində Azərbaycanda demokratiyanın inkişafı üçün, siyasi islahatların aparılması üçün çox gözəl şərait yaradılmış və bu istiqamətdə çox önəmli addımlar atılmışdır. Bu yaxınlarda keçirilmiş prezident seçkiləri bunun əyani sübutudur. Mən şübhə etmirəm ki, bizim bu istiqamətdə siyasətimiz bundan sonra da uğurla davam etdiriləcək və Azərbaycanın hərtərəfli inkişafı təmin olunacaqdır".
İqtisadi inkişafda
davamlılığın təmin olunması, xarici siyasət
sahəsində fəal diplomatiyanın həyata keçirilməsi,
qanunçuluğun, hüquq qaydalarının möhkəmləndirilməsi,
habelə dövlət idarəetmə sistemi üçün
yüksək ixtisaslı, bacarıqlı, intellektual səviyyəli,
vətənpərvər kadrların hazırlanması zərurəti
təhsil sahəsində dövrün tələbi ilə səsləşən
ardıcıl islahatların reallaşdırılması məsələsini
xeyli aktuallaşdırır. Prezident İlham Əliyev
haqlı olaraq çıxışlarında bir məqamı
xüsusi vurğulayır ki, müasir qloballaşma əsrində
Azərbaycanda milli tərəqqinin yeganə yolu elm və təhsilin,
müasir biliklərin, intellektual əməyin
inkişafından, habelə kompüter və informasiya
texnologiyalarının bütün idarəetmə səviyyələrində
geniş tətbiqindən keçir.
Cənab İlham Əliyev
ötən 5 ildə milli ənənələri qorumaqla,
Avropa təhsil məkanına inteqrasiya prosesinin sürətləndirilməsi,
inkişaf etmiş dövlətlərin bu sahədəki
qabaqcıl təcrübəsinin mənimsənilərək
yayılması, ümumtəhsil məktəblərində,
ali təhsil müəssisələrində kompüter və
informasiya texnologiyalarının geniş tətbiqi məqsədinə
xidmət edən kompleks tədbirlər həyata
keçirmişdir. Azərbaycan Prezidentinin bu sahəyə
xüsusi diqqətlə yanaşması həm də
respublikamızın sürətli iqtisadi inkişaf yolunda
olması, geniş maliyyə imkanları qazanması ilə
şərtlənir.
Təhsil mürəkkəb, çoxkomponentli və çoxparametrli proses olmaqla cəmiyyətin inkişaf dinamikasına stimul verən sistemdir. Həmin prosesin müvəffəqiyyətinin ardıcıl olaraq təmin edilməsi təhsil ststemində normativ-hüquqi bazanın təkmilləşdirilməsi, təhsilin məzmunca tamamilə yeniləşməsi, keyfiyyətin tələbata uyğunluğuna maksimum nail olunması və bu sahənin fəaliyyətində proses və hadisələrin keyfiyyət göstəricilərini yetərincə öyrənəcək, davamlı müşahidə edəcək işlək modellərə əsaslanan müasir monitorinq və qiymətləndirmə mexanizmlərinin tətbiqi zərurətini ortaya qoymuşdur. Bu, modern dövlət quruculuğu üçün vacib olan industrial, postindustrial cəmiyyət quruculuğu mərhələsini az qala birlikdə keçməli olan ölkə təhsilinin də sürətlə yeniləşməsi reallığından qaynaqlanır.
Neft gəlirləri ilə bağlı dövlət büdcəsi vəsaitlərinin ildən-ilə artması təhsil sahəsində maliyyə çatışmazlığı səbəbindən uzun illərdən bəri yığılıb qalmış bəzi problemlərin məhz indiki mərhələdə həlli məsələsini aktuallaşdırır. Milli iqtisadiyyatın yüksək dinamizmlə inkişafı təhsilin müasirləşdirilməsi məqsədinə yönəlmiş dövlət investisiyalarının həcmcə artımını təmin edir, bu sahənin dünya standartları səviyyəsinə qalxmasına geniş imkanlar açır. Azərbaycanın dövlət büdcəsində təhsilə ayrılan xərclərin ildən-ilə artırılması da hökumətin bu sahənin keyfiyyətcə yeniləşməsi üçün ardıcıl və sistemli fəaliyyət göstərdiyini təsdiqləyir. Prezident İlham Əliyev hesab edir ki, təhsilə qoyulan sərmayə Azərbaycan xalqının bugünkü və gələcək mənafeyinə xidmət edir.
Büdcədə təhsil üçün nəzərdə tutulmuş vəsaitlərin artması, eyni zamanda, məktəblərdə əsaslı təmir-tikinti işlərinin aparılmasına, yeni məktəblərin və korpusların inşasına imkan yaratmışdır.
Nəzərə alsaq ki, Azərbaycan informasiya texnologiyalarının tətbiqi baxımından yeni beynəlxalq məkana çevrilmək üçün "Əsrin müqaviləsi" nə bərabər nəhəng layihələr ərəfəsindədir, onda modern cəmiyyət quruculuğunun industrial və postindustrial mərhələsindən onun sonuncu yüksək zirvəsi olan informasiya cəmiyyəti quruculuğu prosesinə keçid ciddi fakta çevrilir. Bu, yeni tipli Azərbaycan təhsilinin Avropa təhsil məkanına sürətlə, istisnasız daxil olmasını labüdləşdirir. Prezident İlham Əliyevin "Azərbaycan Respublikasının ali təhsil müəssisələrinin Avropa ali təhsil məkanına inteqrasiyası ilə bağlı bəzi tədbirlər haqqında" 31 yanvar 2008-ci il tarixli sərəncamı da bu baxımdan xüsusi aktuallıq kəsb edir. Sərəncamda qeyd olunur ki, 2001-ci ildən etibarən Azərbaycan Respublikasının Avropa Şurasına üzv olması ölkəmizin Avropa məkanına inteqrasiyasını sürətləndirmişdir. Bu prosesin tərkib hissəsi kimi Azərbaycan Respublikası Avropa ölkələrinin təhsil nazirləri tərəfindən qəbul edilmiş Bolonya deklarasiyasını imzalamaqla respublikanın ali təhsil müəssisələrinin Avropa təhsil sisteminə inteqrasiyası yolunda mühüm addım atmışdır. Azərbaycanın dünyada analoqu olmayan iqtisadi inkişafı Ümumavropa təhsil məkanına inteqrasiya proseslərinin daha da sürətləndirilməsini və bu sahədə həyata keçirilən işlərin intensivləşdirilməsini tələb edir. Ölkənin intellektual potensialının gücləndirilməsinin Azərbaycanın inkişaf strategiyasının əsas istiqamətlərindən biri olması ali təhsil sistemində islahatlara dair müvafiq dövlət proqramının hazırlanması zərurətini meydana çıxarmışdır.
Təcrübə
göstərir ki, iqtisadi inkişaf strategiyasını elmi
sütunlar üzərində qurmaqla təhsilin
inkişafını dövlət quruculuğu prosesinin
mühüm təminatı sayan, ixtisaslı kadr
hazırlığında hər zaman mütərəqqi ənənələrə
istinad edən dövlətlər tərəqqiyə nail olur və
beynəlxalq aləmdə özünəlayiq yer tuturlar. Müstəqil
Azərbaycan dövləti də qloballaşan dünyanın bərabərhüquqlu
subyekti kimi öz inkişafını, sadəcə, təbii sərvətlərin
gətirdiyi dividendlərə bağlamır və mövcud
resurslarını sırf insan faktorunun prioritetə
çevrilməsi yönümündə qurur. Azərbaycan
Prezidenti İlham Əliyevin ikinci müddətə dövlət
başçısı seçilməsi də respublikamızda
həyata keçirilən elm və təhsil
islahatlarının davamlılığına, insan
kapitalının formalaşmasına ən ciddi təminatdır.
İradə HÜSEYNOVA,
təhsil nazirinin
müavini,
YAP Siyasi
Şurasının üzvü,
tarix elmləri doktoru,
professor
Azərbaycan.-2008.-7 noyabr.-S.5.