Bakıda kənd təsərrüfatı məhsullarının növbəti satış yarmarkaları keçirilmişdir

AzərTAc xəbər verir ki, noyabrın 8-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.

"Təzə bazar" MMC-nin həyətindəki yarmarkada alıcılara Sabirabad, Zərdab, Gədəbəy və digər rayonlardan gətirilmiş 23 tondan çox müxtəlif çeşidli kənd təsərrüfatı məhsulları təklif olunurdu.

Mövsümlə əlaqədar məhsulların çeşidi dəyişmişdi. Əvvəllər xiyar, pomidor, armud, üzüm və s. üstünlük təşkil edirdisə, indi kələm, xurma, heyva, əzgil, feyxoa, portağal, qaragilə və başqa məhsullar daha boldur. Sahibkarların dediyinə görə, alıcıların təkliflərini nəzərə alır, yarmarkaya daha çox ehtiyac duyulan məhsul çıxarırlar.

Evdar qadın Nərgiz Hüseynova deyir ki, birinci dəfədir buraya gəlirəm. Kiloqramı 40 qəpikdən alma almışam. Bazarlarda 1 manatdan aşağı satmırlar.
Metronun "Əhmədli" stansiyasının yaxınlığında, "Azər" ticarət mərkəzində təşkil edilmiş yarmarkada sakinlərə Salyan, Kürdəmir, Quba, Şəmkir, Ağcabədi, Biləsuvar və Qəbələ rayonlarından gətirilmiş 285 tondan çox kənd təsərrüfatı məhsulu - nar, alma, xurma, kartof, arıçılıq və heyvandarlıq məhsulları təklif olunurdu. Keyfiyyəti ilə diqqəti cəlb edən məhsullar alıcılara bazardakından 20-25 faiz ucuz satılırdı.

Suraxanıda "Günəş" ticarət mərkəzindəki yarmarkada Balakən, Gədəbəy, Samux, Daşkəsən, Quba, Biləsuvar rayonlarının fermərləri satışa 66 ton məhsul çıxarmışdılar.

Kənd Təsərrüfatı Nazirliyinin nümayəndəsi Mustafa Rüstəmovun sözlərinə görə, məhsulların çeşidi artırılmışdır. Qiyməti isə bazardakından 30-35 faizə qədər ucuzdur. Alıcılar məhsulun qiymətindən və keyfiyyətindən razıdırlar.

"Suraxanı Maşınqayırma Zavodu" Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerleri isə alıcılara 11 tondan çox məhsul təklif edirdilər.

A.Şərifzadə küçəsində, metronun "İnşaatçılar" stansiyasının yaxınlığındakı yarmarkada satışa Salyan, Qusar, Quba, Xaçmaz və digər rayonlardan gətirilmiş 73 tondan çox məhsul çıxarılmışdı. Burada qızğın alış-veriş gedirdi. Paytaxt sakinləri Kürdəmir narını, Göyçay xurmasını, Daşkəsən kartofu, yağı, balı və pendirini həvəslə alırdılar.

Məhsulların qiymətlərindən və keyfiyyətindən razılıq edən alıcılar ailə büdcəsinə xeyli qənaət etməyə imkan verən yarmarkaların müntəzəm keçirilməsini alqışlayırdılar.

Badamdar qəsəbəsində 239 nömrəli məktəbin yaxınlığındakı yarmarkada Salyan, Ağdaş, Masallı və digər rayonlardan gətirilmiş 20 tondan çox məhsul satılırdı.

Qəsəbə sakini Azər Muradov məmnunluqla söylədi ki, artıq bazarın yolunu unutmuşuq. Həftənin sonunu səbirsizliklə gözləyirik. Ailəmizin meyvə-tərəvəzə tələbatını buradan ödəyir, qış tədarükümüzü buradan görürük. Bu, ailə büdcəmiz üçün də sərfəlidir.

Kənd Təsərrüfatı Nazirliyinin nümayəndəsi Vidadi Bayramov bildirmişdir ki, Nərimanov rayonunun Ə.Əliyev küçəsindəki yarmarkada alıcılara Xaçmaz, İmişli, Tərtər, Tovuz, Oğuz, Astara rayonlarının fermerləri 48,5 ton kənd təsərrüfatı məhsulları təklif edirdilər. Tərtərli Ramin Abbasovun dediyinə görə, öz təsərrüfatından 2 tona yaxın meyvə-tərəvəz gətirmişdir, alıcıların arasında dostları çoxdur. Onlara xidmət etməkdən qürur duyur.

Azərbaycan.- 2008.- 9 noyabr.-S.3.