Azərbaycan Respublikası
Milli Təhlükəsizlik Nazirliyinin ictimai əlaqələr
mərkəzindən AzərTAc-a bildirmişlər ki, nazir,
general-leytenant Eldar Mahmudov noyabrın 5-6-da Qazaxıstan Respublikasının
Astana şəhərində Türkdilli Dövlətlərin
Xüsusi Xidmət Orqanları Rəhbərləri
Konfransının XI iclasında iştirak etmişdir.
İclasda Rusiya Federasiyasının və
Ukraynanın müvafiq qurumlarının yüksək vəzifəli
nümayəndələri müşahidəçi qismində
iştirak etmişlər. Transmilli mütəşəkkil
cinayətkarlıq, onun müxtəlif təzahürləri,
xüsusən də getdikcə daha geniş miqyas və təhlükəli
xarakter almaqda olan beynəlxalq terrorçuluq, ekstremizm, narkotiklərin
qanunsuz dövriyyəsi ilə mübarizə sahəsində əməkdaşlığın
yeni reallıqlara uyğun təkmilləşdirilməsi və
inkişafı əsas müzakirə mövzuları olmuşdur.
Azərbaycan Respublikasının
milli təhlükəsizlik naziri Eldar
Mahmudov iclasda "Türkdilli dövlətlər məkanında
beynəlxalq terrorçu infrastrukturların fəaliyyətinin
qarşısının alınması istiqamətində yeni
nailiyyətlər" mövzusunda çıxış
etmiş, terrorçuluq və dini ekstremizmlə mübarizənin
Azərbaycanın qəti mövqeyi və ölkənin milli təhlükəsizlik
orqanlarının prioritet vəzifəsi olmasını bir daha
diqqətə çatdırmışdır. Nazir
Eldar Mahmudov terrorçuluq fəaliyyəti ilə əlaqədar
yeni təmayüllərin meydana çıxmasını,
terrorçuların öz metod və taktikalarını, rabitə,
eləcə də konspirasiya vasitələrini və
qaydalarını daim təkmilləşdirdiklərini
vurğulamış, bütün bunlarla əlaqədar konkret
faktlar gətirmişdir.
Daha sonra, nazir beynəlxalq
nəqliyyat dəhlizləri və transmilli enerji şəbəkələrinin
təhlükəsizliyinin təmin olunması işində diqqət
yetirilməsi vacib olan əsas amillərdən
danışmış, iclasın iştirakçısı
olan dövlətlərin xüsusi xidmət orqanları
arasında əməkdaşlığın səmərəliliyinin
artırılması yollarına toxunmuş, bununla
bağlı bir sıra təkliflər irəli sürmüşdür.
Nazir E.Mahmudovun çıxışı
iclasın iştirakçıları tərəfindən
maraqla qarşılanmış, toxunulan məsələlər
ətrafında geniş müzakirələr aparılmışdır. Nazir Eldar
Mahmudov tədbir çərçivəsində həmkarları
ilə ikitərəfli görüşlər də keçirmişdir.
İclasın sonunda nümayəndə
heyətlərinin rəhbərləri tərəfindən məlumat
mübadiləsi və əməli əməkdaşlıq sahəsində
xüsusi xidmət orqanlarının inteqrasiyası mexanizmlərinin
təkmilləşdirilməsi istiqamətində məqsədyönlü
tədbirlərin hazırlanması üzrə birgə rəsmi
sənəd imzalanmışdır.
Azərbaycan.-2008.-9 noyabr.-S.3.