Türkiyənin Ceyhan şəhərində Heydər Əliyev adına liseyin açılışı olmuşdur
Mərasimdə Azərbaycan
Prezidentinin İcra Aparatının ictimai-siyasi məsələlər
şöbəsinin müdiri Əli Həsənov, Türkiyənin
milli təhsil naziri Hüseyn Çəlik, ARDNŞ-in
prezidenti Rövnəq Abdullayev, respublika təhsil nazirinin
müavini Elmar Qasımov, Adana valisi İlhan Atış,
ölkəmizin Türkiyədəki səfiri Zakir Həşimov
və digər rəsmi şəxslər iştirak etmişlər.
Mərasimi açan
nazir Hüseyn Çəlik 600 şagird
yerlik liseyin dördmərtəbəli binasının
tikintisinin bu ilin may ayında ARDNŞ-in prezidenti Rövnəq
Abdullayev ilə imzalanmış protokol əsasında 5 ay
müddətində tamamlandığını, "bir millət,
iki dövlət" kəlamı ilə
xalqlarımızın qardaşlığını daha da
möhkəmləndirən dahi şəxsiyyət Heydər Əliyevin
adını daşıyan bu təhsil ocağının Ceyhan
sakinlərinə böyük töhfə olduğunu
bildirmişdir. Mövlana Cəlaləddin Ruminin
"eyni dildə danışanlar deyil, eyni şeyi hiss edənlər
yaxşı anlaşa bilirlər" sözərini
xatırladan nazir demişdir ki, biz azərbaycanlı
qardaşlarımızla həm eyni dildə danışır,
həm də eyni şeyləri hiss edirik. Bu
liseydə təhsil alanlar daim Heydər Əliyevi rəhmətlə
anacaqlar. Burada yetişən uşaqlar onun
adı ilə yaşayacaqlar.
Prezidentin İcra Aparatının
ictimai-siyasi məsələlər şöbəsinin
müdiri Əli Həsənov çıxışında
demişdir ki, indi dövrümüz müharibələr
deyil, elm və texnologiya dövrüdür. Bütün
dünyada türk xalqlarının da zirvələrə
çatması yalnız təhsillə bağlı
olacaqdır. Ceyhanı indi bütün
dünya tanıyır. Mən nə vaxtsa
bu məktəbdən Türkiyənin nazirlərinin və idarəçilərinin
çıxacağına inanıram.
Azərbaycan təhsil nazirinin
müavini Elmar Qasımov iki ölkə arasında təhsil
sahəsində əməkdaşlıqdan bəhs etmişdir. O bildirmişdir ki,
hazırda Azərbaycanda 4 min türk, Türkiyədə isə
4 min azərbaycanlı tələbə təhsil alır.
Açılış mərasimindən sonra
Hüseyn Çəlik və Əli Həsənov ulu öndər
Heydər Əliyevin liseydəki büstünün önünə
gül qoydular, yadigar olaraq, bir-birinə xatirə hədiyyələri
təqdim etdilər.
Oqtay BAYRAMOV,
AzərTAc-ın xüsusi müxbiri
Azərbaycan.-2008.-9 noyabr.-S.2.