AİDS-lə mübarizəyə dair yeni qanun layihəsi hazırlanacaq

Noyabrın 26-da Milli Məclisin Sosial siyasət daimi komissiyasının iclası keçirildi. İclasda "İnsanın immunçatışmazlığı virusunun törətdiyi xəstəliyin (AİDS) yayılmasının qarşısının alınması haqqında" Azərbaycan Respublikası Qanununun monitorinqi və təkmilləşdirilməsi məsələsi müzakirə olundu.

Komissiyanın sədri Hadi Rəcəbli bildirdi ki, bu xəstəliklə bağlı MDB məkanında mükəmməl qanun ilk olaraq 1996-cı ildə Azərbaycanda qəbul edilib. Artıq həmin vaxtdan 12 il ötdüyü üçün qanunun təkmilləşdirilməsinə ciddi ehtiyac yaranıb. Əlavə və dəyişikliklər çox olduğu üçün qanunun tamamilə yenidən işlənməsi zərurəti meydana çıxıb. Bu gün AİDS xəstəliyinin ölkəmizdə, xüsusən kənd yerlərində yayılmaqda olduğunu deyən Hadi Rəcəbli vaxtaşırı bu məsələyə diqqət yetirilməsinin vacibliyini vurğuladı.

İclasda qeyd olundu ki, ölkəmizdə AİDS xəstəliyi 60-70 faiz narkotik istifadəçiləri arasında yayılıb. Xüsusən həbsxana yerlərində narkotiklərdən istifadə edilməsi hallarına təsadüf olunması narahatlıq yaradır, AİDS-lə mübarizənin təkcə səhiyyənin deyil, bütün ictimaiyyətin qarşısında duran vəzifə olduğu vurğulandı.
Milli Məclisin deputatı Musa Quliyev bu məsələ ilə əlaqədar ayrı-ayrı ölkələrin təcrübəsini öyrənməklə tamamilə yeni qanun layihəsinin hazırlanmasını təklif etdi. Bildirdi ki, hazırkı qanun deklorativ xarakter daşıyır və orada imperativ normalar yoxdur.

İclasda işçi qrup tərəfindən yanvarın ortalarına qədər bu məsələ ilə bağlı tamamilə yeni qanun layihəsinin hazırlanması qərara alındı.

Azərbaycan.-2008.-27 noyabr.-S.3.