AzərTAc xəbər
verir ki, Avropa Mülki Aviasiya Konfransının (ECAC) dekabrda
Parisdə təşkil olunacaq tədbirlərində Azərbaycan
Respublikası Dövlət Mülki Aviasiya
Administrasiyasının nümayəndə heyəti də
iştirak edəcəkdir. Administrasiyadan
bildirmişlər ki, dekabrın 3-də ECAC Əlaqələndirmə
komitəsinin müşavirəsi, 4-də isə ilk
toplantının keçirilməsi nəzərdə tutulur.
Əlaqələndirmə komitəsinin
müşavirəsində ECAC prezidentinin fəaliyyəti barədə,
baş vermiş aviaqəzaların təhqiqatı üzrə
hesabatlar dinləniləcək, təşkilatın 2010-2012-ci
illər üçün Proqramı müzakirə ediləcəkdir.
Dekabrın 5-də isə təşkilatın Parisdəki mənzil-qərargahında
Mülki Aviasiya baş direktorlarının 131-ci müşavirəsi
işinə başlayacaqdır. Dünyanın
nüfuzlu mülki aviasiya təşkilatları nümayəndələrinin
qatılacağı bu toplantının qapalı
sessiyasında Beynəlxalq Mülki Aviasiya Təşkilatının
(İCAO) baş katibi vəzifəsinə namizəd
çıxış edəcək, gündəlikdəki məsələlərlə
bağlı geniş fikir mübadiləsi aparılacaqdır.
Azərbaycan nümayəndə heyətinə
Dövlət Mülki Aviasiya Administrasiyasının direktoru
Arif Məmmədov rəhbərlik edəcəkdir.
Azərbaycan.-2008.-27 noyabr.-S.3.