- Azərbaycan İtaliya ilə əlaqələrinə
böyük önəm verir və bu əlaqələr
bütün sahələrdə - siyasi, iqtisadi, mədəni və
digər sahələrdə daim genişlənməkdə və
möhkəmlənməkdədir. Dövlətimizin
başçısının İtaliyaya səfəri də
bu əlaqələrin genişlənməsi və gələcəkdə
daha da inkişaf etdirilməsi baxımından çox
böyük əhəmiyyətə malikdir.
Azərbaycan Prezidentinin İtaliyaya səfəri öncəsi
müxtəlif ölkələrin, o cümlədən
İtaliyanın kütləvi informasiya vasitələri tərəfindən
bu səfərə böyük maraq göstərilmişdir. Səfər
zamanı da nümayəndə heyətinin üzvləri, Azərbaycanın
İtaliyadakı səfirliyinin əməkdaşları
İtaliyada akkreditə olunmuş xarici ölkələrin
kütləvi informasiya vasitələrinin nümayəndələrinin,
habelə yerli qəzet, jurnal və televiziya müxbirlərinin
suallarına mütəmadi olaraq cavab vermiş, səfərin
gedişi barədə onları məlumatlandırmışlar.
Bildiyiniz kimi, İtaliyanın "RAİ İnternational"
televiziyası Azərbaycan Prezidentindən müsahibə
almışdır. Artıq bizim oxucular da müsahibə ilə
tanışdırlar. Azərbaycan Prezidenti bu müsahibədə
ikitərəfli münasibətlər, regional və beynəlxalq
məsələlərlə bağlı suallara çox
geniş, əhatəli cavab vermişdir.
Səfərin ilk günü dövlətimizin
başçısı İtaliyanın "Edison" energetika
şirkətinin rəhbərini qəbul etmişdir. Məlum
olduğu kimi, hazırda Azərbaycan uğurlu enerji siyasəti
həyata keçirərək, beynəlxalq enerji əməkdaşlığında
çox mühüm yerlərdən birini tutmaqdadır. Bu
baxımdan İtaliya da Azərbaycanla bu sahədə əməkdaşlığa
çox böyük diqqət yetirir və önəm verir. Bu
görüşdə də Azərbaycanla İtaliya
arasında enerji sahəsində əməkdaşlığın
perspektivləri barədə, müxtəlif məsələlər
ətrafında fikir mübadiləsi
aparılmışdır.
Azərbaycan geniş məkanda, xüsusilə də,
Avropanın enerji təminatı işində fəal
iştirak edir. Azərbaycan qazı artıq Yunanıstana
çıxır və Azərbaycan Avropanın enerji təhlükəsizliyində
getdikcə çox mühüm rol oynamağa
başlamışdır. Bu baxımdan həmin
görüş zamanı Azərbaycan qazının gələcəkdə
İtaliyaya mümkün nəqli məsələləri barədə
ətraflı müzakirələr aparılmışdır. Bu
da ölkəmizin beynəlxalq aləmdə, iqtisadi məkanda
rolunun güclənməsinin daha bir yaxşı nümunəsidir.
Noyabrın 26-da Azərbaycan Respublikasının Prezidenti
İlham Əliyev İtaliya parlamentinin Deputatlar
palatasının sədri Canfranko Fini ilə
görüşmüşdür. Palatanın sədri dövlətimizin
başçısını yenidən prezident seçilməsi
münasibətilə təbrik edərək demişdir ki, bu
seçkilər ölkənizin uğurlu inkişafı istiqamətində
həyata keçirdiyiniz işlərə Azərbaycan
xalqının böyük etimadını əks etdirir.
Daha sonra Canfranko Fini ölkələrimiz arasında münasibətlərin
yüksək səviyyəsini vurğulamış, Azərbaycanın
iqtisadi baxımdan İtaliyanın ən güclü tərəfdaşlarından
biri olduğunu bildirmişdir. O, digər sahələrdə
mövcud olan möhkəm əməkdaşlıqla
yanaşı, parlamentlərarası əlaqələrin
genişlənməsinin də zəruriliyini söyləmiş,
ikitərəfli münasibətlərin Avropa İttifaqı
çərçivəsində də önəm
daşıdığını vurğulamışdır.
Məlum olduğu kimi, İtaliya dünyanın ən
inkişaf etmiş dövlətlərindən biri olmaqla bərabər,
həm də nüfuzlu Avropa İttifaqının da
aparıcı ölkələrindəndir. Bu baxımdan
Canfranko Fini də demişdir ki, Azərbaycan-İtaliya
münasibətləri təkcə ikitərəfli xarakter
daşımır, eyni zamanda, Avropa İttifaqının da Azərbaycanla
əlaqələri çərçivəsində
mühüm rol oynayır.
Ən önəmlisi isə, Deputatlar palatasının sədri
bildirmişdir ki, İtaliya parlamentinin mövqeyi ondan ibarətdir
ki, Dağlıq Qarabağ münaqişəsi yalnız Azərbaycanın
ərazi bütövlüyü çərçivəsində
dinc yolla həll edilməlidir. Azərbaycan üçün ən
ağrılı problem olan Ermənistan-Azərbaycan,
Dağlıq Qarabağ münaqişəsi ilə
bağlı İtaliya kimi ölkənin Deputatlar
palatasının bu mövqeyi, əlbəttə ki, çox
böyük önəm daşıyır. Maraqlı bir
faktı da qeyd edim, Canfranko Fini belə bir fikir də söyləmişdir
ki, Azərbaycanla uğurlu əlaqələr İtaliyanın
Yunanıstan, Türkiyə və digər ölkələrlə
əlaqələrinin möhkəmlənməsinə də
öz töhfəsini verir. Çox fərəhləndirici bir
haldır ki, Azərbaycan artıq ikitərəfli münasibətlərdə
deyil, qeyd etdiyim kimi, dünyanın ən inkişaf etmiş
dövlətlərinin digər ölkələrlə əlaqələrinə
də töhfə verir. Beynəlxalq münasibətlər
sistemində çox nadir hallardan biridir ki, Avropa
İttifaqına daxil olmayan bir dövlət Aİ-nin
aparıcı dövlətinin həm Avropa
İttifaqının üzvü olan, həm də digər
dövlətlərlə əlaqələrinə öz
töhfəsini verir. Bu, çox mühüm və fərəhləndirici
bir haldır.
Parlamentdəki görüşündə Azərbaycan
Prezidenti də ikitərəfli münasibətlərin
inkişafının önəmli olduğunu
vurğulamış, prezident seçilməsi münasibətilə
təbrikə görə minnətdarlığını
bildirmişdir. Dövlətimizin başçısı
demişdir ki, siyasi əlaqələrimiz yüksək səviyyədədir.
Azərbaycanın Avropa İttifaqı ilə əlaqələrinin
inkişafında İtaliya önəmli rol oynayır. İqtisadi
əlaqələrimiz daim genişlənir və Azərbaycan
İtaliya şirkətlərinin gələcəkdə də
ölkəmizdə fəaliyyətinin daha da genişlənməsində
maraqlıdır. Dövlətimizin başçısı Azərbaycanda
iqtisadiyyat və digər sahələrdə əldə
edilmiş uğurlardan da danışmış, ölkəmizdə
xarici sərmayə qoyuluşu üçün və əcnəbi
şirkətlərin azad və sərbəst fəaliyyəti
üçün hər cür şəraitin
yaradıldığını vurğulamışdır.
Parlamentlərarası əlaqələrimizin genişlənməsinin
əhəmiyyətinə toxunan Prezident İlham Əliyev son
illər beynəlxalq təşkilatlarda, o cümlədən
Avropa Şurasında ölkələrimizin parlamentləri
arasında çox uğurlu əməkdaşlığın
həyata keçirildiyini, bunun daha da genişlənməsinin
zəruriliyini vurğulamışdır. Eyni zamanda, Azərbaycanın
Avropa İttifaqının qonşuluq siyasətində də fəal
iştirak etdiyi bildirilmişdir. Dövlətimizin
başçısı regionumuzda proseslərin uğurla getməsi
üçün Cənubi Qafqazda sülhün bərqərar
olmasının zəruriliyini vurğulayaraq demişdir ki, Ermənistan-Azərbaycan,
Dağlıq Qarabağ münaqişəsinin həll edilməməsi
həm regionda, həm də daha geniş məkanda sülhə
çox böyük təhlükə doğurur. Prezident
İlham Əliyev Ermənistanın Azərbaycana təcavüzünün
nəticələri və münaqişənin həllində
Azərbaycanın mövqeyi barədə də
danışmışdır.
Noyabrın 26-da Azərbaycan Prezidenti İlham Əliyev
İtaliya Nazirlər Şurasının Sədri Silvio
Berluskoni ilə görüşmüşdür. Cənab
Silvio Berluskoni prezident seçkilərində qələbə
münasibətilə dövlətimizin
başçısını təbrik etmişdir. O demişdir
ki, Azərbaycan sürətli iqtisadi inkişaf yolundadır,
ölkədə çox böyük sürətli iqtisadi
artım vardır. İtaliya hökumətinin
başçısı bu münasibətlə də Azərbaycan
Prezidentini təbrik etmişdir.
Silvio Berluskoni ulu öndərimiz Heydər Əliyevlə
görüşlərini də xatırlamış və onun
Azərbaycan xalqının əsl ümummilli lideri olduğunu
bildirmişdir. O demişdir ki, Prezident İlham Əliyev Azərbaycanın
inkişafı istiqamətində çox mühüm
addımlar atır, beynəlxalq aləmdə ölkənin
mövqeləri möhkəmlənir və Azərbaycan
çox tarazlaşdırılmış siyasət
yürüdür.
Daha sonra cənab Berluskoni beynəlxalq miqyasda enerji sahəsində
Azərbaycanın rolunun önəmindən danışaraq
bildirmişdir ki, İtaliya şirkətlərinin Azərbaycandakı
fəaliyyəti daim onun nəzarətindədir. Hesab edir ki,
İtaliya iş adamlarının gələcəkdə Azərbaycanda
fəaliyyətinin daha da genişləndirilməsi
üçün konkret planların həyata keçirilməsi
zəruridir.
Prezident İlham Əliyev ölkəmizin sürətli iqtisadi
inkişafından, bütün digər sahələrdə
görülən işlərdən danışmış,
beynəlxalq münasibətlər sistemində Azərbaycanın
sabitləşdirici rol oynadığını bildirmişdir. Dövlətimizin
başçısı Azərbaycanla İtaliya arasında
münasibətlərin bundan sonra daha da inkişaf edəcəyinə
və genişlənəcəyinə əminliyini söyləmişdir.
Azərbaycan Respublikası Prezidentinin İtaliyaya səfəri
çox uğurlu və məhsuldar olmuşdur. Bu səfər
bir daha göstərdi ki, Azərbaycanın beynəlxalq
mövqeləri güclənir, Azərbaycan beynəlxalq
münasibətlər sistemində, çoxtərəfli əlaqələr
və regional əməkdaşlıq sistemində sabitləşdirici
rol oynayır. Eyni zamanda, bu səfər beynəlxalq aləmdə
enerji sahəsində əməkdaşlıqda Azərbaycanın
çox güclü tərəfdaş olduğunu bir daha
nümayiş etdirdi.
AzərTAc
Azərbaycan.-2008.-28
noyabr.-S.1.