Azərbaycanın iqtisadi potensialı ildən-ilə güclənir

Son 6 ildə Prezident İlham Əliyevin rəhbərliyi altında hər bir vətəndaşın mənafeyinə hesablanan islahatların həyata keçirilməsi, qloballaşma dövrünün reallıqlarına uyğun rasional siyasətin yürüdülməsi, böyük infrastruktur layihələrinin gerçəkləşdirilməsi Azərbaycanı inkişaf etmiş ölkələrin etibarlı tərəfdaşına çevirmişdir. Bütün sahələrdə həyata keçirilən kompleks islahatlar mahiyyət etibarilə respublikada demokratikləşmə proseslərinin daha da sürətləndirilməsinə, vətəndaş cəmiyyəti təsisatlarının gücləndirilməsinə, sosial-iqtisadi tərəqqinin əldə olunmasına imkan yaratmışdır.

Dövlət başçısı İlham Əliyev prezidentlik səlahiyyətlərinin icrasına başladığı ilk gündən bəyan etmişdir ki, demokratik dövlət insanların birgə fəaliyyətinin təşkili və tənzimlənməsinin mühüm şərti, onların qarşılıqlı münasibətlərinin qaydaya salınmasının, cəmiyyətdə sabitliyin təmin olunması vasitəsidir. Bu yolla irəliləyən dövlətlərin mütləq əksəriyyətində ictimai-siyasi sabitliyin möhkəm təmələ söykənməsi, insanların iqtisadi azadlığı, yüksək maddi rifah halı, vətəndaş-cəmiyyət münasibətlərinin ahəngdarlığı, şəxsiyyətin mənafelərinin, hüquq və azadlıqlarının maksimum səviyyədə qorunması, qanunun aliliyi prinsipinə bütün səviyyələrdə əməl olunması demokratiyanın optimal idarəetmə üsulu kimi dominantlığını təmin etmişdir.

Azərbaycanda hüquqi dövlət quruculuğu sahəsində yüksək nailiyyətlər qazanılması, davamlı sosial-iqtisadi inkişafın təmin edilməsi ölkə rəhbərliyinin həyata keçirdiyi uğurlu siyasətin nəticəsidir. Ötən altı ildə Azərbaycan öz inkişafının Qərb modelini müəyyənləşdirərək böyük irəliləyişlərə imza atmışdır. Sosial-iqtisadi inkişafla paralel gedən demokratikləşmə prosesi Azərbaycanın bugünkü yüksəlişini təmin etmişdir. Dövlət başçısının bununla bağlı irəli sürdüyü fikirlər təkcə Azərbaycanın yox, ümumilikdə demokratiya yoluna yenicə qədəm qoymuş bütün müstəqil ölkələrin gələcək inkişafının təməl prinsipi kimi tətbiq edilə bilər. Cənab İlham Əliyev hər zaman qətiyyətlə bildirir ki, əgər biz diqqətimizi yalnız iqtisadi məsələlərə yönəltsək, siyasi proseslər kənarda qalsa, demokratikləşmə getməsə, ciddi uğur qazana bilmərik. Eyni zamanda, əgər iqtisadiyyat inkişaf etməsə, demokratikləşmə prosesi də təhlükə altına düşər. Çünki çoxlu sosial problemləri olan kasıb ölkədə insanlar demokratiya, siyasi proseslər haqqında düşünmürlər. Yalnız hərtərəfli inkişaf Azərbaycanı qısa müddətdə çox güclü dövlətə çevirə bilər.

Ölkəmizdə formalaşmaqda olan yeni makroiqtisadi mühit - ümumi daxili məhsulun artımı, milli iqtisadiyyatda sahibkarlar sinfinin mövqelərinin əsaslı şəkildə güclənməsi, beynəlxalq iqtisadi münasibətlər sisteminə uğurlu transformasiya, habelə qlobal enerji layihələrinin həyata keçirilməsi nəticə etibarilə demokratikləşmə və vətəndaş cəmiyyəti təsisatlarının sürətli inkişafına imkan yaratmışdır. Müasir mərhələdə respublikada demokratik inkişafı şərtləndirən başlıca amillərdən biri də insanların iqtisadi azadlıqlarının, səmərəli təşəbbüskarlığının artması, mülkiyyət münasibətlərinin yeni forma və məzmun kəsb etməsidir. İqtisadi azadlığını təmin edən vətəndaşın siyasi cəhətdən yetkinləşməsi, tədricən cəmiyyətin demokratikləşməsi xəttinin fəal iştirakçısına çevrilməsi qaçılmaz prosesə çevrilir. Azərbaycanda demokratiyanın mərhələli səciyyə daşıması da iqtisadi inkişaf və demokratikləşmə xəttinin bir-birini tamamlaması vacibliyi ilə şərtlənir. Son altı ildə dövlətin siyasi, iqtisadi, sosial-mədəni həyatın modernləşdirilməsi istiqamətində həyata keçirdiyi tədbirlər müsbət nəticələr vermişdir.

Azərbaycanın davamlı iqtisadi inkişafı və qəbul edilmiş dövlət proqramlarının uğurla icrası yeni perspektivlər açmışdır. Ölkə başçısının təsdiq etdiyi "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı" və "2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatina dair Dövlət Proqramı" ölkə iqtisadiyyatının şaxələndirilməsinə və dünya iqtisadiyyatına səmərəli inteqrasiyasına, bölgələrdə infrastruktur və kommunal xidmət səviyyəsinin yaxşılaşdırılmasına, xalqın rifah halının daha da yüksəldilməsinə hesablanmışdır.

Prezident İlham Əliyevin yürütdüyü məqsədyönlü siyasət Azərbaycan iqtisadiyyatını böhrana qarşı dayanıqlı etmiş, ölkəmizi ən yaxşı inkişaf perspektivlərinə malik dövlətlərdən birinə çevirmişdir. Cari ilin doqquz ayında inflyasiya 2,1 faiz olmuş, strateji valyuta ehtiyatları ilin əvvəli ilə müqayisədə 1 milyard dollar artaraq 19,1 milyard dollara çatmışdır. Səkkiz ay ərzində xarici ticarət dövriyyəsi 12,4 milyard, o cümlədən ixrac 8,6 milyard, idxal 3,8 milyard dollar təşkil etmiş, 4,8 milyard dollar həcmində müsbət saldo yaranmışdır. Ölkə iqtisadiyyatında əldə olunmuş davamlı inkişaf, əhalinin rifahınn yaxşılaşmasına, o cümlədən gəlirlərin və əməkhaqqının artmasına öz müsbət təsirini göstərmişdir. Doqquz ay ərzində orta aylıq əməkhaqqı 15,5 faiz, əhalinin gəlirləri 9,8, adambaşına düşən gəlirlər 8,4, pullu xidmətlər isə 12,5 faiz artmışdır.

Dünya iqtisadi böhranına baxmayaraq, Azərbaycan iqtisadiyyatında davamlı inkişafın təmin olunması beynəlxalq maliyyə qurumlarının hesabatlarında da əks olunur. Dünya İqtisadi Forumunun makroiqtisadi sabitlik, əmək bazarının səmərəliliyi, dövlət idarəetməsinin, infrastrukturun və maliyyə bazarının mükəmməllik səviyyəsi və bu kimi digər mühüm meyarlar əsasında 2009-2010-cu il üçün hazırladığı "Qlobal Rəqabətlilik Hesabatı"nda Azərbaycan 18 pillə irəliləyərək 133 ölkə arasında 51-ci yerə, MDB ölkələri arasında isə 1-ci yerə yüksəlmişdir. Bu hesabatda qonşu ölkələrdən Türkiyə 61-ci, Rusiya 63-cü, Qazaxıstan 67-ci, Ukrayna 82-ci, Gürcüstan 90-cı yerdədir.

Prezident İlham Əliyev Nazirlər Kabinetinin cari ilin doqquz ayının sosial-iqtisadi inkişafının yekunlarına həsr olunmuş iclasında bildirmişdir: "2009-cu ildə Azərbaycan çox uğurla inkişaf etmişdir, 2008-ci ilin sonlarında qarşıya qoyulan bütün vəzifələr icra edilir. Bu çox vacibdir. Bu, bir daha onu göstərir ki, istənilən şəraitdə Azərbaycan öz planlarını icra etməyə qadirdir. 2003-2008-ci illərdə bizim uğurlu inkişafımız gözəl bir zəmin yaratdı. O illərdə iqtisadiyyat 2,6 dəfə artmışdır və bu artım həyatımızın bütün sahələrində özünü göstərmişdir. 2009-cu il böhranlı il oduğuna görə, əlbəttə ki, ümumi daxili məhsulun 6,1 faiz səviyyəsində artımı bizi çox sevindirir. Bu barədə mən öz fikirlərimi bildirdim və hesab edirəm ki, ilin sonuna qədər indiyədək həll olunmamış məsələlər də həll olunmalıdır, bütün sosial və infrastruktur layihələrin icrası davam etdirilməlidir. Əminəm ki, 2009-cu ilin yekunları da çox müsbət olacaqdır. Makroiqtisadi sabitlik qorunub saxlanılacaqdır. Çalışmalıyıq ki, 2010-cu ildə də makroiqtisadi sabitliyin qorunması üçün praktiki işləri davam etdirək".

Azərbaycan iqtisadiyyatının ildən-ilə güclənməsi, mühüm sosial-iqtisadi proqramların uğurla reallaşdırılması son nəticədə əhalinin maddi rifah halının yüksəlməsinə gətirib çıxarıb. Bölgələrimizin davamlı və tarazlı inkişafına hesablanan proqramların icra edilməsi, yeni infrastruktur layihələrin həyata keçirilməsi ölkəmizin hərtərəfli inkişafını təmin etməkdədir. Azərbaycan qüdrətli dövlətə çevrilməklə dünya birliyində tutduğu layiqli yerini möhkəmləndirməkdədir.

Azərbaycan.- 2009.- 1 noyabr.- S.1.