Milli Məclisdə qəbul

Noyabrın 2-də Milli Məclisin Sədri Oqtay Əsədov Ukraynanın Yalta şəhərinin meri Sergey Braykonun başçılığı ilə nümayəndə heyətini qəbul etmişdir.

Milli Məclisin Sədri Yalta şəhər Şurasının nümayəndələrini səmimi salamlayaraq onları Milli Məclisdə görməyindən məmnun olduğunu bildirdi. Qeyd edildi ki, ölkələrimiz müstəqillik əldə etdikdən sonra dövlətlərarası münasibətlərimiz strateji tərəfdaşlıq səviyyəsinədək yüksəlmişdir. Dövlət başçıları bu əlaqələrin daha da möhkəmlənməsini daim diqqət mərkəzində saxlayırlar.

Spiker parlamentlər səviyyəsində də əməkdaşlığımızın yüksələn xətlə inkişaf etdiyini vurğuladı. Qeyd edildi ki, hər iki ölkənin qanunvericilik orqanlarında parlamentlərarası əlaqələr üzrə işçi qrupları fəaliyyət göstərir. Bu, təcrübə və informasiya mübadiləsi baxımından çox önəmlidir. Deputatlarımız müxtəlif beynəlxalq qurumlar, o cümlədən GUAM kimi regional təşkilatlar çərçivəsində də faydalı əməkdaşlıq edirlər.

Söhbət zamanı Spiker vaxtilə mövcud olmuş "qardaşlaşmış şəhərlər" ənənəsinin bərpasını yüksək dəyərləndirdi. O, Yalta ilə Xaçmaz arasında bu sahədə imzalanmış sənədi əhəmiyyətli hesab etdi. Bildirildi ki, bu cür əməkdaşlıq ölkələrimizin ayrı-ayrı bölgələri arasında əlaqələrin daha da dərinləşməsinə xidmət edir.

Səmimi qəbul üçün minnətdarlığını bildirən qonaq Azərbaycanda keçirdiyi görüşlərdən məmnun olduğunu bildirdi. O, Xaçmazla Yalta arasında imzalanmış müqaviləni yüksək dəyərləndirərək, Ukrayna ilə Azərbaycanın bu bölgələri arasında gələcək əməkdaşlığın uğuruna böyük ümidlər bəslədiyini vurğuladı. Qonaq Azərbaycanda, o cümlədən Xaçmazda gördüyü inkişafdan məmnun olduğunu bildirdi. O, səfər müddətində keçirdiyi görüşlərdən və Azərbaycan torpağında gördüyü qonaqpərvərlikdən məmnunluqla danışdı.

Söhbətdə tərəfləri maraqlandıran məsələlər ətrafında fikir mübadiləsi aparıldı.

Görüşdə ölkəmizin Ukraynadakı səfiri Tələt Əliyev və digər rəsmi şəxslər iştirak edirdilər.

Milli Məclisin mətbuat xidməti

Azərbaycan.- 2009.- 3 noyabr.- S. 3.