Azərbaycanın müdafiə naziri Türkiyə Silahlı Qüvvələrinin Quru Qoşunları Komandanı ilə görüşmüşdür

Noyabrın 2-də ölkəmizə rəsmi səfərə gəlmiş Türkiyə Respublikası Silahlı Qüvvələrinin Quru Qoşunları Komandanı, ordu generalı İşık Koşanerin Azərbaycanın müdafiə naziri, general-polkovnik Səfər Əbiyevlə görüşü olmuşdur.

Müdafiə Nazirliyinin mətbuat xidmətindən bildirmişlər ki, ümummilli lider Heydər Əliyevin məzarını, Şəhidlər xiyabanını və türk şəhidlərinin xatirəsinə ucaldılmış abidəni ziyarət etdikdən sonra qonağın nazirlikdə təntənəli qarşılanma mərasimi keçirilmişdir.

Türkiyə-Azərbaycan dostluğunun daim qorunub saxlanması və daha da möhkəmləndirilməsi tərəflərin geniştərkibli görüşünün əsas mövzusu olmuşdur.

Hərbi-texniki əməkdaşlığın yeni inkişaf perspektivləri, Cənubi Qafqazda mövcud vəziyyət və Ermənistan-Azərbaycan, Dağlıq Qarabağ münaqişəsinin həlli yolları barədə də fikir mübadiləsi aparılmışdır.

Görüşdə Türkiyənin Azərbaycandakı səfiri Hulusi Kılıç iştirak etmişdir.

Azərbaycan.- 2009.- 3 noyabr.- S.4.