Bakıda İKT-nin gəncliyin inkişafında rolu üzrə I Beynəlxalq konfrans başa çatmışdır

Noyabrın 3-də Dialoq və Əməkdaşlıq Uğrunda İslam Konfransı Gənclər Forumunun (DƏİKGF) Azərbaycan Respublikası Rabitə və İnformasiya Texnologiyaları Nazirliyi ilə birgə təşkil etdiyi "Rəqəmsal texnologiyalar dövrü və yeni nəsil: informasiya kommunikasiya texnologiyaları sahəsində gənclərin biliklərinin artırılması" mövzusunda beynəlxalq konfrans başa çatmışdır.

Konfransda İslam Konfransı Təşkilatı, Avropa ölkələrindən yüzə yaxın gənc ekspert, o cümlədən İKT sahəsində ixtisaslaşmış aparıcı şirkət, elmi institut və qeyri-hökumət təşkilatlarının nümayəndələri iştirak etmişlər. İşçi qruplarda "Gənc iş adamları on-line rejimində", "Gənclər təşkilatları - özəl sektor əməkdaşlığı", "Beynəlxalq kampaniyaların həyata keçirilməsində İKT-nin rolu" və başqa mövzular üzrə keçirilən müzakirələrdə iştirak edən gənclərin irəli sürdükləri ideya və təkliflər "İKT sahəsində gəncliyin inkişafı" üzrə Bakı Bəyannaməsində öz əksini tapmışdır.

Konfransın bağlanış mərasimində dünyanın İKT üzrə aparıcı mütəxəssislərindən olan professor Peter Bruk media və biznes sahəsində informasiya texnologiyaları, xüsusilə internetin artmaqda olan rolu haqqında məruzə ilə çıxış etmişdir.

DƏİKGF-nin baş katibi Elşad İsgəndərov, Qətər Əmək və Əhalinin Sosial Müdafiəsi Nazirliyinin nümayəndəsi Məhəmməd əl-Tani, BMT İnkişaf Proqramının xüsusi müşaviri Şəid Hüseyn yekun nitqlərində konfransda qəbul edilən Bakı Bəyannaməsində öz əksini tapan məqsəd və vəzifələrin həyata keçiriləcəyinə ümidvar olduqlarını bildirmişlər.

Konfransın plenar iclaslarının biri DƏİKGF-nin mədəniyyətlərarası dialoq üzrə baş əlaqələndiricisi Leyla Əliyevanın təşəbbüsü ilə irəli sürülən "Xocalıya ədalət" kampaniyası çərçivəsində görülən işlərin müzakirəsi ilə bağlı olmuşdur. Leyla Əliyevanın başçılığı altında keçirilən kampaniya üzrə dünyanın 20-dən çox ölkəsindən gəlmiş milli əlaqələndiricilərin iştirakı ilə təşkil olunan bu iclasda kampaniyanın 2010-2011-ci ildə daha səmərəli keçirilməsi üçün konkret təkliflər ətrafında müzakirələr aparılmışdır.

Konfransda DƏİKGF və Azərbaycan Respublikası İnformasiya və Texnologiyaları Nazirliyinin Avropa və Yaxın Şərq ölkələri gəncləri arasında sivilizasiyaların dialoqu üzrə proqramının yayımlanmasını nəzərdə tutan "Körpü" internet-televiziyasının təqdimatı keçirilmişdir.

Konfransın son günü tədbir iştirakçılarının qəbul etdiyi "İKT sahəsində gəncliyin inkişafı" üzrə Bakı Bəyannaməsinin işçi sənəd kimi Qara Dəniz Hövzəsi Ölkələri və İslam Konfransı Təşkilatı ölkələri kommunikasiya texnologiyaları nazirlərinin iştirak edəcəyi konfransa göndərilməsi qərara alınmışdır.

Konfrans həm də gənc iş adamlarına kompüter texnologiyaları sahəsində gələcəkdə birgə layihələrin həyata keçirilməsi üzrə tərəfdaş və investorların tapılması baxımından imkanlar yaratmışdır. İrəli sürülən layihələr noyabrın 4-də Bakıda öz işinə başlayacaq 3 günlük beynəlxalq illik "Bakutell" sərgisində təqdim olunacaqdır.

AzərTAc

Azərbaycan.- 2009.- 4 noyabr.- S. 4.