Azərbaycanda ilk dəfə Milli kitab mükafatı təsis olunmuşdur

Tədbirdə çıxış edən mədəniyyət və turizm naziri Əbülfəs Qarayev demişdir ki, son illər Azərbaycanda kitab çapına xüsusi diqqət yetirilir, ölkəmizdə müasir tələblərə cavab verən onlarla nəşriyyat fəaliyyət göstərir. Artıq 5 ildir ki, bu nəşriyyatların çap məhsulları dünyanın nüfuzlu beynəlxalq kitab sərgilərində nümayiş etdirilir və müxtəlif diplomlara layiq görülür.

Ə.Qarayev demişdir ki, "Bakı İslam Mədəniyyətinin Paytaxtı - 2009" mədəniyyət ili çərçivəsində ilk dəfə Azərbaycanda beynəlxalq kitab sərgisi təşkil edilmişdir. Sərgiyə dünyanın 30-dan çox ölkəsini təmsil edən nəşriyyatlar qatılmışlar, qərara gəlmişik ki, bu sərgini iki ildən bir keçirək.

"Əli və Nino" nəşriyyat evinin layihəsi əsasında reallaşacaq Milli kitab mükafatının təsis olunmasını yüksək qiymətləndirən nazir vurğulamışdır ki, məqsəd ictimaiyyətin diqqətini Azərbaycan ədəbiyyatına yönəltmək, onun sosial önəmini artırmaq və ədəbiyyatımızı zənginləşdirəcək əsərləri çap etməkdir.

"Əli və Nino" nəşriyyat evinin rəhbəri, layihənin təsisçisi Nigar Köçərli bildirmişdir ki, Mədəniyyət və Turizm, İdman və Gənclər nazirliklərinin dəstəyi və "Azercell" şirkətinin baş sponsorluğu ilə həyata keçirilən müsabiqəyə bu gündən start verilir. Layihənin reallaşması nəticəsində dəyərli ədəbi əsərlər yarada biləcək müasir müəlliflərin oxucular üçün "kəşf edilməsi" və həvəsləndirilməsinə nail olacağıq.

Bildirilmişdir ki, müsabiqəyə təqdim olunacaq əsərləri münsiflər heyətinin üzvləri - xalq yazıçısı Çingiz Abdullayev, Milli Məclisin deputatları Vaqif Səmədoğlu, Rəbiyyət Aslanova, Azərbaycan Jurnalistlər Birliyinin sədri Elçin Şıxlı, Azərbaycan Yazıçılar Birliyinin katibi Rəşad Məcid, Xəzər Universitetinin rektoru Hamlet İsaxanlı və başqaları qiymətləndirəcəklər. Milli kitab mükafatının respublikanın bütün bölgələrini əhatə etməsi üçün Gəncə, Şamaxı, Naxçıvan, Lənkəran, Şəki və Quba şəhərlərində keçiriləcək görüşlərdə layihə barədə ətraflı məlumat veriləcəkdir. Bir çox ali məktəblərdə də silsilə tədbirlər təşkil ediləcəkdir.

N.Köçərli demişdir ki, layihə barədə bütün məlumatlar www.mkm.az internet saytında əksini tapmışdır. Maraqlananlar və müsabiqədə iştirak etmək istəyənlər sayta müraciət edə və əsərlərini göndərə bilərlər. Yalnız nəsr əsərlərinin təqdim olunacağı müsabiqədə hər bir Azərbaycan vətəndaşı hansı dildə əsər yazmasından asılı olmayaraq, iştirak edə bilər. Təqdim olunacaq əsərlər minimum 40 min çap işarəsi həcmində olmalıdır. Bu müsabiqəyə hər bir nasir 10 il əvvəl yazdığı əsərlərlə də qatıla bilər. Müəlliflər tərəfindən təqdim olunacaq işlər dekabrın 31-dək qəbul ediləcəkdir. Müxtəlif mərhələlərlə aparılacaq müsabiqənin şərtlərinə əsasən, 2010-cu il mayın 1-də 3 qalibin adı elan olunacaqdır. Birinci yer üçün 3 min manat, ikinci yer üçün 2 min manat və üçüncü yer üçün min manat pul mükafatı təqdim olunacaqdır. Ən yaxşı 10 əsər dərc olunaraq kitabxanalara və təhsil ocaqlarına paylanacaqdır.

Vurğulanmışdır ki, qaliblər üçün Gənclər və İdman Nazirliyi və "Qarant Sığorta" şirkəti xüsusi mükafatlar təsis etmişlər.

AzərTAc

Azərbaycan.- 2009.- 4 noyabr.- S. 6.