Rumıniyalı gənclər bir nömrəli uşaq evində və Qala Arxeoloji-Etnoqrafik Muzey Kompleksində olmuşlar

Azərbaycanda səfərdə olan Buxarest şəhərinin gənclərdən ibarət nümayəndə heyəti noyabrın 4-də Nizami rayonunda yerləşən 1 nömrəli uşaq evində olmuşlar.

Qonaqlara məlumat verilmişdir ki, əsaslı təmir olunan 1 nömrəli uşaq evinin 120 sakini vardır. Burada 3 yaşından 18 yaşınadək uşaq və yeniyetmələr yaşayır. Uşaqların bütün tələbatlarını ödəyən, yüksək zövqlə qurulan müəssisə müasir standartlara cavab verir. Müəssisədə uşaqların asudə vaxtını səmərəli təşkil etmək məqsədi ilə bədii gimnastika, rəqs, rəssamlıq, xalçaçılıq, tikiş, toxuculuq və digər dərnəklər fəaliyyət göstərir.

Bildirilmişdir ki, bütün bunlar Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın təşəbbüsü və dəstəyi sayəsində həyata keçirilmişdir.

Rumıniyalı gənclər uşaq evində tərbiyə almış, yaşı 18-dən yuxarı olan qızlar üçün inşa edilmiş 50 mənzillik, 100 nəfərlik yaşayış binasında yaradılmış şəraitlə də tanış olmuşlar.

Bildirilmişdir ki, bu binanın istifadəyə verilməsi çoxdan bəri ictimai narahatlığa səbəb olan ciddi bir problemin həllinə yönəlmişdir. Əvvəllər uşaq evlərini tərk edən qızlar taleyin hökmünə buraxıldığından onların sonrakı həyatını izləmək bir çox hallarda mümkün deyildi. Yeni yaşayış binası bu problemin həllinə xidmət edəcəkdir. Binadakı bütün mənzillər mebel, televizor, paltaryuyan maşın və digər məişət avadanlığı ilə təmin edilmişdir.

Uşaq evinin balaca sakinləri geniş konsert proqramı ilə çıxış etmişlər.

Burada gördüklərindən məmnun qalan rumıniyalı qonaqlar demişlər ki, hətta Avropanın bir çox ölkələrindəki uşaq evlərində bu çür yüksək şərait yaradılmamışdır.

Sonra gənclər Bakının yaxınlığındakı Qala Arxeoloji-Etnoqrafik Muzey Kompleksində olmuşlar.

Onlara məlumat verilmişdir ki, abidələrin qorunması, eləcə də Abşeronda aşkar edilən arxeoloji tapıntılar hesabına qoruğun daha da zənginləşdirilməsi üçün 2008-ci ildə burada açıq səma altında ilk arxeoloji-etnoqrafik muzey kompleksi yaradılmışdır. Kompleksdə Abşeron yarımadasında tapılmış və eramızdan əvvəl III-II minilliklərdən orta əsrlərə qədər dövrü əhatə edən qayaüstü rəsmlər, keramika, məişət və bəzək əşyaları, silah və sikkələr, qədim yaşayış kompleksinin konservasiya olunmuş qalıqları və digər eksponatlar yerləşdirilmişdir.

Buradakı eksponatlarla tanış olan qonaqlar muzey kompleksindən zəngin təəssüratla ayrılmışlar.

Rumıniyalı gənclərin gəzintisi Mir Möhsün Ağa ziyarətgahını tanışlıqla başa çatmışdır.

AzərTAc

Azərbaycan.- 2009.- 5 noyabr.- S. 7.