Beynəlxalq maliyyə təşkilatları Azərbaycanda iqtisadi inkişafın davamlı olacağını proqnozlaşdırırlar

Prezident İlham Əliyev respublikamıza rəhbərlik etdiyi son 6 ildə Heydər Əliyevin müəllifi olduğu strateji inkişaf kursunu böyük uğurla davam etdirərək ölkə qarşısında daha geniş perspektivlər açmışdır. Bu illər həm də ölkəmizin davamlı iqtisadi inkişafına təminat yaradan amillərin möhkəmləndirilməsi ilə xarakterikdir. Cəmiyyətimizdə ictimai-siyasi sabitliyin qorunması, məharətlə həyata keçirilən balanslaşdırılmış xarici siyasət xətti başqa dövlətlərlə münasibətlərin səmərəli əməkdaşlıq müstəvisində davam etdirilməsinə şərait yaratmışdır.

Azərbaycanda uzun illər vətəndaşların ciddi narahatlığına səbəb olan sosial-iqtisadi problemlərin həllinə hesablanmış irimiqyaslı layihələrin uğurlu icrası respublikamızı dinamik inkişaf yoluna çıxardı. Tarixinin yüksəliş dövrünü yaşayan Azərbaycan artıq təkcə Cənubi Qafqazın deyil, postsovet məkanının ən aparıcı dövlətlərindən birinə çevrilmişdir. Bu həqiqəti respublikamızın real iqtisadi göstəriciləri sübuta yetirir. Azərbaycan indi dünyanın ən sürətli inkişaf tempinə malik dövlətdir. Ölkəmizə investisiya axını ildən-ilə güclənir, xarici kapital yatırımına görə respublikamız Şərqi Avropa məkanında lider mövqeyini qoruyub saxlayır.

Əldə edilmiş nailiyyətlər Azərbaycan əhalisinin mənafeyinə xidmət göstərir. Ölkə vətəndaşlarının firavan həyatının təmin olunması üçün çoxsaylı dövlət proqramlarının icrası bu gün də uğurla davam etdirilir. Bölgələrimizdə həyat canlanır, sahibkarlığın inkişafına yönələn qayğı hesabına Azərbaycanda özəl sektor ildən-ilə inkişaf edir. Regionların sosial-iqtisadi inkişafına hesablanan I Dövlət Proqramının uğurlu icrası bölgələrdə yeni iş yerlərinin açılmasına, yoxsulluq probleminin həllinə, geniş infrastruktur layihələrinin həyata keçirilməsinə imkan yaratmışdır. Bir-birindən yaraşıqlı müasir binalar, geniş komplekslər, ölkəmizin bütün regionlarında davam etdirilən tikinti-abadlıq tədbirləri aparılan iqtisadi siyasətin uğurlarından xəbər verir. Ölkə başçısının təsdiq etdiyi "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı" da qarşıdakı illərdə bölgələrimizdə yeni istehsal müəssisələrinin yaradılmasına, sahibkarlıq mühitinin genişləndirilməsinə, əhalinin faydalı məşğulluğunun təmin olunmasına əlverişli şərait yaradacaqdır.

Ölkədə sahibkarlığın inkişafı istiqamətində görülən kompleks tədbirlər öz müsbət nəticələrini verməkdədir. Sahibkarlığın inkişafına xidmət edən mühüm dövlət proqramlarının qəbul edilməsi deyilənlərə əyani misaldır. Sahibkarlığın stimullaşdırılması və onun dövlət maliyyə təminatı mexanizmlərinin formalaşdırılması, daxili bazarın qorunması yolu ilə istehsal sahibkarlığının inkişaf etdirilməsi, qeyri-neft sektorunun ümumi daxili məhsuldakı çəkisinin artırılması ilə bağlı kompleks tədbirlərin görülməsi aparılan işlərin məqsədyönlülüyündən xəbər verir. Kiçik və orta sahibkarlıq subyektlərinin normal fəaliyyəti üçün "Azərbaycan Respublikasında kiçik sahibkarlığa dövlət köməyi haqqında" Azərbaycan Respublikasının Qanununa bir sıra mütərəqqi dəyisiklik və əlavələrin edilməsi, habelə "Haqsız rəqabət haqqında", "İnvestisiyaların qorunması haqqında", "İstehlak bazarı haqqında" və digər zəruri qanunların qəbul olunması bu istiqamətdə atılan müsbət addımlardandır. Həmin qanunlar yerli və xarici sahibkarların təhlükəsiz və xüsusi risklilik tələb etməyən biznes fəaliyyətinə dövlət tərəfindən verilən hüquqi təminatı daha da gücləndirmiş, investisiyaların qarşılıqli təşviqinə və qorunmasına əsaslı zəmin formalaşdırmışdır.

Prezident İlham Əliyev həmişə iş adamlarının mənəvi hamisi kimi çıxış edərək mövcud problemlərin askarlanması məqsədilə dövlət-sahibkar dialoqunun genişləndirilməsində maraqlı olmuşdur. Sahibkarların üzləşdiyi problemlərin aradan qaldırılması üçün aidiyyəti dövlət qurumlarına zəruri tapşırıq və tövsiyələr vermişdir. Ölkə başçısının sahibkarlığın inkişafı istiqamətində gördüyü işlər sistemli və ardıcıl fəaliyyət konsepsiyasına əsaslanır. Azərbaycan Prezidenti hesab edir ki, bazar mexanizminin hərəkətverici qüvvəsi hesab edilən sahibkarlığın inkişafı keçid iqtisadiyyatlı ölkələrin siyasi, sosial-iqtisadi sisteminin yenidən qurulmasında, sosialyönümlü problemlərin kompleks həllində mühüm rol oynayır.

Azərbaycandakı yerli və xarici sahibkarların etibarlı himayədarına çevrilmiş dövlət başçısının həyata keçirdiyi məqsədyönlü siyasət hesabına özəl sektor yeni inkişaf mərhələsinə qədəm qoymuş, sahibkarlığın inkişafına diqqət daha da artırılmışdır. Kiçik və orta sahibkarlığın güzəştli kreditlərlə maliyyələşdirilməsi, sahibkarların fəaliyyətinə yersiz müdaxilələrin qarşısının alınması, özəl sektorda inkişafa mane olan problemlərin həlli istiqamətində mühüm addımlar atılmışdır.

Dövlət başçısı cənab İlham Əliyev inhisarçılığı, sahibkarlara süni maneələrin yaradılması hallarının yolverilməz oldugunu bəyan edir, bu cür neqativ təzahürlərin dərhal aradan qaldırılması üçün qətiyyətli addımlar atır. Ötən dövr ərzində antiinhisar fəaliyyətinin gücləndirilməsi, inflyasiyanın qarşısının alınması üçün əsaslı tədbirlərin görülməsi, "Korrupsiyaya qarşı mübarizə üzrə Dövlət Proqramı"nın təsdiqlənməsi, biznes subyektlərinin qeydiyyat, lisenziya sisteminin sadələşdirilməsi, yerlərdə regional iqtisad məhkəmələrinin yaradılması və digər tədbirlər bu istiqamətdə atılmış mühüm addımlardır. Sahibkarlığa Kömək Milli Fondunun yaradılması da bu kateqoriyadan olan vətəndaşlara öz biznes fəaliyyətlərini genişləndirmək imkanı yaratmışdır. İş adamlarına əlverişli şərtlərlə kreditlərin verilməsi qısa müddətdə müsbət nəticələr vermişdir. Ölkə başçısının sərəncamı ilə təsdiq edilmiş Sahibkarlığa Kömək Milli Fondunun yeni əsasnaməsində kreditlərin verilməsinin sadələşdirilməsi və faiz dərəcələrinin maksimum aşağı salınması, güzəştli kreditlərin artırılması özəl sektorun inkişafına yeni stimul vermişdir.

Sahibkarlığa Kömək Milli Fondunun vəsaitləri hesabına 2009-cu ilin doqquz ayı ərzində 1700 sahibkarlıq subyektinə 100 milyon manat güzəştli kreditlər verilmişdir. Bu da ötən ilin müvafiq dövrü ilə müqayisədə 1,4 dəfə çoxdur. Maliyyələşdirilmiş layihələrin 99 faizi regionların payına düşür. Bu kreditlər hesabına 7 mindən çox yeni iş yeri açılacaq, qeyri-neft sektorunun inkişafına önəmli təsiri olan 73 yeni istehsal, emal və xidmət müəssisəsi yaradılacaqdır.

Prezident İlham Əliyev Nazirlər Kabinetinin cari ilin doqquz ayının sosial-iqtisadi inkişafının yekunlarına həsr olunmuş iclasında demişdir: "Sahibkarlığa Kömək Milli Fondunda nəzərdə tutulmuş kreditlərin verilməsi ilin sonuna qədər davam etdirilməlidir. Mən hesab edirəm ki, 2010-cu ildə bu kreditlərin verilməsi ilin birinci yarısında baş tutmalıdır. Biz onu ilin sonuna saxlamamalıyıq. Çünki artıq ilin sonuna az vaxt qalıb. Ancaq o da həqiqətdir ki, bu kreditlər çox düşünülmüş şəkildə verilməlidir. Bu kreditlər ölkəmiz üçün lazım olan sahələrə verilməlidir ki, iqtisadiyyat çoxşaxəli şəkildə inkişaf etsin.

O da çox sevindirici haldır ki, artıq gələn il bu kreditlərin böyük hissəsi əvvəllər verilmiş kreditlərin hesabına başa gələcəkdir. O pullar qayıdır. Bu onu göstərir ki, sahibkarlar kreditlərə çox böyük məsuliyyətlə yanaşırlar. Digər tərəfdən onu göstərir ki, bu kreditlərin verilməsi prosesi də çox düzgün aparılmışdır. Yəni, bu sahədə batmış kreditlər yoxdur və bu, çox sevindiricidir. Yəni, bu onu göstərir ki, seçmə prosesi düzgün aparılmışdır və bu kreditlər çox məsuliyyətli iş adamlarına verildi. Artıq qaytarılan və qaytarılacaq məbləğin hesabına gələn il sahibkarların fəaliyyəti üçün çox gözəl şərait yaradılacaqdır. Nəzərə alsaq ki, bu kreditlər artıq uzun illərdir ki, verilir, hər il əvvəlki illərdə verilən kreditlərin qaytarılması hesabına biz əlavə vəsait əldə edəcəyik. Beləliklə, dövlət büdcəsinə olan yük daha da azalacaqdır".

Azərbaycanda iqtisadi inkişafın davamlı olacağını beynəlxalq maliyyə təşkilatlarının proqnozları da təsdiqləyir. 2009-cu il üzrə ÜDM-in real artımı Beynəlxalq Valyuta Fondu tərəfindən 7,5 faiz, Asiya İnkişaf Bankı tərəfindən 8 faiz, 2010-cu il üzrə isə müvafiq olaraq 7,4 və 6,7 faiz proqnozlaşdırılır. Qeyri-neft sektorunun dinamik inkişafının davam edəcəyini qeyd edən Beynəlxalq Valyuta Fondu bu sektorun gələn il 5 faiz, Asiya İnkişaf Bankı isə 5-7 faiz artacağını bildirir.

Dünyada yaşanan iqtisadi böhrana baxmayaraq, Azərbaycan iqtisadiyyatında davamlı inkişafın təmin olunması beynəlxalq maliyyə qurumlarının hesabatlarında da müsbət məqam kimi qeyd olunmaqdadır. Ölkə rəhbərliyi tərəfindən təsdiq edilən sosial-iqtisadi inkişaf proqramları iqtisadiyyatımızın tarazlı və davamlı inkişafını təmin etməklə Azərbaycanı qüdrətli dövlətə çevirməkdədir.

E.HACIALIYEV

Azərbaycan.- 2009.- 5 noyabr.- S. 8.