Azərbaycan tolerantlığı ilə dünyada tanınan dövlətdir

"Dinlərarası dialoq: Qarşılıqlı anlaşmadan birgə əməkdaşlığa doğru" mövzusunda Bakıda keçiriləcək konfransda əsas məqsəd dindarların bir araya gəlməsi, onlar arasında münasibətləri inkişaf etdirmək və bir sıra məsələlərin sülh yolu ilə həllinin tapılmasında dövlət rəhbərlərinə, siyasi xadimlərə kömək göstərməkdir. Bu sözləri Qafqaz Müsəlmanları İdarəsinin sədri şeyxülislam Hacı Allahşükür Paşazadə bildirmişdir.

Konfransın ölkəmizdə keçirilməsinin əsas səbəbi kimi Azərbaycanın artıq dünyada tolerantlığı ilə tanınması ilə bağlı olduğunu qeyd edən A.Paşazadə demişdir ki, burada həm xristian, həm yəhudi, həm də müsəlman dini rəhbərlərinin bir araya gəlməsi vicdan azadlığının və tolerantlığın nümunəsidir.

Belarus patriarxı Filaret bu konfransa dəvət olunmasına, eləcə də ümummilli liderimiz Heydər Əliyevin xatirəsini ziyarət etməsinə imkan yaradıldığı üçün dərin minnətdarlığını bildirmişdir.

Dinlərarası dialoqla bağlı Belarus patriarxı qeyd etmişdir ki, biz 20 il əvvəl müharibələr əleyhinə birgə səy göstərməyə və əməkdaşlığa başlamışıq. Biz bu sahədə bir sıra mühüm irəliləyişlərə nail olmuşuq və bu missiyanı davam etdiririk.

AzərTAc

Azərbaycan.- 2009.- 6 noyabr.- S. 5.