"Mərkəzi Asiya örtükləri" sərgisi

Noyabrın 5-də Azərbaycan Mədəniyyət və Turizm Nazirliyinin və R.Mustafayev adına Azərbaycan Milli Dövlət İncəsənət Muzeyinin təşkilatçılığı ilə Londonun Viktoriya və Albert muzeyinin təqdimatında Raunun kolleksiyasından "Mərkəzi Asiya örtükləri" sərgisi açılmışdır.

Mədəniyyət və turizm naziri Əbülfəs Qarayev bildirmişdir ki, Dövlət İncəsənət Muzeyinin bu binası əsaslı təmirdən sonra fəaliyyətə belə bir əlamətdar hadisə ilə başlayır. Burada bir-birindən maraqlı sərgilər təşkil ediləcəkdir.

Nazir vurğulamışdır ki, "Bakı İslam mədəniyyətinin paytaxtı-2009" mədəniyyət ili çərçivəsində paytaxtımızda ilk dəfə təşkil edilmiş bu beynəlxalq sərgidə Mərkəzi Asiyada istifadə olunan örtük parçalardan hazırlanmış 58 adda müxtəlif çeşidli geyimlər nümayiş etdirilir. Tədbirdə çıxış edən Viktoriya və Albert muzeyinin Mərkəzi Asiya departamentinin baş kuratoru Tim Stenli Azərbaycanda təşkil edilmiş sərginin tarixi əhəmiyyətindən danışmışdır.

Elmi mənbələrdən bəllidir ki, Mərkəzi Asiyanın zaman-zaman dəyişən, Xəzər dənizi, Sibir düzləri, İran səhraları ilə əhatələnən təbii sərhədləri daxilindəki ərazilərinə bu gün müstəqil dövlətlər Qazaxıstan, Özbəkistan, Qırğızıstan, Tacikistan, Türkmənistan, eləcə də Əfqanıstanın və Qərbi Çinin bir hissəsi daxildir. Dəniz yolları açılmazdan əvvəl Şərqlə Qərb arasında ticarətin inkişafını təmin edən Böyük İpək yolu məhz bu ərazilərdən keçmışdır.

Bu mövqe isə həmin ərazilərdə Mərkəzi Asiya incəsənətinin zənginləşməsinə şərait yaratmışdır. Natiq demişdir ki, cari ildə Viktoriya və Albert muzeyinin dünyanın 15 ölkəsində 30-a yaxın sərgisi açılmışdır. Bakıdakı sərgi aparılan işin davamı baxımından olduqca yüksək səviyyədə təşkil edilmişdir.

R.Mustafayev adına Azərbaycan Milli Dövlət İncəsənət Muzeyinin direktoru İsrafil İsrafilov demişdir ki, Prezident İlham Əliyevin təşəbbüsü ilə təmir olunan bu muzey bizə dünyanın qabaqcıl muzeyləri ilə əməkdaşlıq etmək imkanı yaratmışdır. Bu sərgi buna bariz nümunədir.

İ.İsrafilov vurğulamışdır ki, mədəniyyətlərarası dialoqun, qarşılıqlı mədəni əlaqələrin əməli nümunəsi olan bu sərgidə nümayiş etdirilən eksponatlar tarixi-etnoqrafik, eləcə də bədii- estetik baxımdan bizə çox yaxındır.

Çünki tarixi "İpək yolu" ölkələrinin incəsənətində oxşar elementlər mövcuddur. Sərgi 2010-ci il martın 3-dək davam edəcəkdir.

AzərTAc

Azərbaycan.- 2009.- 6 noyabr.- S. 8.