Azərbaycan gəncləri dünyanın nüfuzlu universitetlərində təhsillərini uğurla davam etdirirlər

Azərbaycan gəncləri dünyanın nüfuzlu universitetlərində təhsillərini uğurla davam etdirirlər.

Bu sözləri Kaspi Təhsil Mərkəzinin təşkilatçılığı ilə Bakıda keçirilən "Beynəlxalq təhsil sərgisi-2009"-da iştirak edən Prezident Administrasiyasının ictimai-siyasi məsələlər şöbəsinin müdiri Əli Həsənov demişdir.

Ə.Həsənov bildirmişdir ki, Prezident İlham Əliyev Azərbaycan gənclərinin hərtərəfli inkişafı ilə bağlı xüsusi dövlət proqramları təsdiq etmişdir. Ölkə başçısının bu istiqamətdə əsas tapşırığı ondan ibarətdir ki, dünyanın ən qabaqcıl universitetlərində Azərbaycan gəncləri təhsil almalı və onlar respublikamıza qayıdaraq, müstəqil dövlətimizə, onun inkişafına, çiçəklənməsinə töhfələrini verməlidirlər.

Bakıda keçirilən beynəlxalq təhsil sərgilərinin əhəmiyyətindən söz açan Ə.Həsənov demişdir ki, bu tədbirlərdə dünyanın aparıcı universitetlərinin stendlərinin təşkili, onların təqdimatları gənclərimiz üçün yeni imkanlar yaradacaqdır. Bugünkü sərgidə dünyanın ən qabaqcıl ali məktəblərinin təhsil proqramları və onların şərtləri nümayiş etdirilir. Ümidvarıq ki, Azərbaycan gəncləri bu universitetlərdən ən yaxşılarını seçəcəklər.

AzərTAc

Azərbaycan.- 2009.- 8 noyabr.- S. 8.