Milli Məclisdə görüş
Noyabrın 9-da Sloveniya
Respublikasının Prezidenti Danilo Türk Azərbaycan
Respublikası Milli Məclisinin Sədri Oqtay Əsədov ilə
görüşmüşdür.
Görüşdə ölkələrimiz
arasında əlaqələrin bütün sahələrdə
uğurla inkişafı barədə fikir mübadiləsi
aparılmış, Sloveniya Prezidentinin Azərbaycana ilk rəsmi
səfərinin ikitərəfli əlaqələrdə yeni mərhələ
açdığı qeyd olunmuşdur.
Bildirilmişdir ki, artıq səfərin
ilk günü ölkələrimiz arasında beş
mühüm sənəd imzalanmışdır.
Ölkələrimizin coğrafi
mövqeyinin əlverişli olduğunu söyləyən Milli
Məclisin Sədri, Azərbaycanın Cənubi Qafqaz,
Sloveniyanın isə Balkan regionunun inkişafında
mühüm rol oynadığını
vurğulamışdır. Sədr demişdir ki, Azərbaycan
bir sıra regional layihələrin həm təşəbbüskarı,
həm də icraçısıdır. Ölkələrimiz
beynəlxalq təşkilatlar çərçivəsində
uğurla əməkdaşlıq edir. Sloveniyanın Avropa
İttifaqına üzvlüklə əlaqədar keçdiyi
yol bizim üçün maraqlıdır və yaxşı təcrübə
ola bilər.
Milli Məclisin Sədri ötən
il Azərbaycan ilə Avropa İttifaqı arasında imzalanan
"Şərq Tərəfdaşlığı"
Proqramının uğurla icra edildiyini diqqətə
çatdırmışdır.
Parlamentlərimiz arasında əlaqələrdən
danışan O.Əsədov bildirmişdir ki, hər iki
ölkənin qanunverici orqanında dostluq qrupları fəaliyyət
göstərir və bu yaxınlarda bizim dostluq qrupunun üzvləri
Sloveniyaya səfər etmişlər.
Ermənistan-Azərbaycan,
Dağlıq Qarabağ münaqişəsinin regional
inkişafa yeganə və ciddi təhlükə olduğunu
bildirən sədr, Ermənistanın BMT Təhlükəsizlik
Şurası tərəfindən qəbul edilən 4 qətnaməyə
indiyədək məhəl qoymadığını və Azərbaycan
torpaqlarının 20 faizini işğal altında
saxladığını diqqətə
çatdırmışdır.
Sloveniya Prezidenti Danilo Türk Azərbaycana
ilk rəsmi səfərinin onda böyük təəssürat
oyatdığını bildirmişdir.
Yeni müstəqil ölkələr
olan Sloveniya ilə Azərbaycan arasında tarixi inkişaf
baxımından oxşarlıqların olduğunu qeyd edən
Prezident Danilo Türk bu səfərinin ölkələrimizin
mövcud əlaqələrinin daha da inkişafına
yaxşı töhfələr verəcəyinə əminliyini
bildirmişdir.
Sloveniya Prezidenti Milli Məclisin əsas
iclas zalına baxmış, deputatlar üçün
yaradılmış iş şəraiti ilə tanış
olmuşdur. Ali qonaq parlament binasının yüksək mərtəbəsindən
şəhərimizin mənzərəsini seyr etmişdir.
Sonra Heydər Əliyev muzeyi ilə
tanış olan Sloveniya dövlətinin
başçısı xatirə kitabına ürək
sözlərini yazmışdır.
AzərTAc
Azərbaycan.- 2009.- 10 noyabr.- S. 3.