"Ailədaxili münasibətlərdə psixoloji
amil" mövzusunda konfrans keçirilmişdir
Müasir dövrün aktual
müzakirə mövzularından olan ailədaxili münasibətlərin
qarşılıqlı anlaşma, hörmət və ehtiram
şəraitində qurulmasına psixoloji amil böyük təsir
göstərir. Bu istiqamətdə aidiyyəti dövlət
qurumlarının fəaliyyətinin əlaqələndirilməsi,
qarşılıqlı əməkdaşlıq şəraitində
müzakirə və diskussiyaların aparılması
böyük əhəmiyyətə malikdir.
Bununla əlaqədar olaraq
noyabrın 9-da Ailə, Qadın və Uşaq Problemləri
üzrə Dövlət Komitəsinin (AQUPDK) təşkilatçılığı
ilə "Ailədaxili münasibətlərdə psixoloji
amil" mövzusunda konfrans keçirilmişdir.
Konfransda AQUPDK-nın sədri
Hicran Hüseynova, psixologiya elmləri doktoru Kamilə Əliyeva,
Milli Məclisin deputatı Gülər Əhmədova, Bakı
Slavyan Universitetinin rektoru, AMEA-nın müxbir üzvü Kamal
Abdullayev və digərləri mövzu ətrafında məruzələrlə
çıxış etmiş, konfransın əhəmiyyətindən
danışmış, ailədaxili münasibətlərin
milli-mənəvi dəyərlərimiz əsasında
qurulmasında psixoloji amillərin vacibliyini
vurğulamışlar.
Bildirilmişdir ki, konfransın məqsədi
bu sahədə bir sıra problemlərin aradan
qaldırılması, ailə daxilində sağlam psixoloji
iqlim yaradılması yollarının
araşdırılması istiqamətində birgə məsləhətləşmələrin
aparılması və razılaşmaların əldə
olunmasıdır. Ölkəmizdə dünya təcrübəsində
artıq uğurla sınaqdan çıxan ailə psixoloqu təsisatının
yaradılması, bu sahədə kadr
hazırlığının gücləndirilməsi problemin
aradan qaldırılması baxımından olduqca aktualdır.
Aparılan monitorinqlər nəticəsində çox az sayda
insanın ailə psixoloquna müraciət etməsinin
şahidi oluruq. Bəzən ailədə kiçik bir
anlaşılmazlıq ailə psixoloquna, yaxud bu sahədə
ixtisaslaşmış xüsusi bir mərkəzə müraciət
edilmədiyinə görə böyük bir münaqişəyə
çevrilir.
Vurğulanmışdır ki, ümummilli
lider Heydər Əliyev tərəfindən əsası
qoyulmuş ailə və uşaq siyasəti Prezident İlham Əliyev
tərəfindən uğurla davam etdirilir. Bu siyasət
dövlətin prioritet siyasəti kimi inkişaf etməkdədir.
Ötən ay Heydər Əliyev Fondunun prezidenti, YUNESKO-nun və
İSESKO-nun xoşməramlı səfiri, Milli Məclisin
deputatı Mehriban xanım Əliyevanın təşəbbüsü
ilə UNİCEF tərəfindən keçirilən
"Uşaq ili" və BMT-nin Uşaq Hüquqları
haqqında Konvensiyasının 20 illiyinə həsr olunmuş
"Azərbaycanda uşaqların müdafiəsi
islahatı" üzrə Milli Konfrans dövlətin uşaq
siyasətinə necə həssaslıqla
yanaşdığını bir daha sübut edir.
Diqqətə
çatdırılmışdır ki, təlim-tərbiyə
müəssisələrində uşaqlarla psixoloji işin
aparılması və bu sahədə fəaliyyət göstərən
Qeyri-Hökumət Təşkilatlarının prosesə cəlb
olunması, xüsusilə, kütləvi informasiya vasitələrində
zorakılığa qarşı mübarizənin təbliğ
edilməsi uşaqların ailə mühitində sağlam
böyüməsini təmin edir. Eyni zamanda, bu sahəyə
peşəkar psixoloqların cəlb edilməsi qeyd olunan
problemin aradan qaldırılmasına böyük yardım
etmiş olar.
Konfransda Milli Məclisin
deputatları Fuad Muradov, Lalə Abbasova, Azərbaycanın
tanınmış psixoloq və psixiatrları, eləcə də
bu sahədə fəaliyyət göstərən mütəxəssislər,
media nümayəndələri iştirak etmişlər.
Tədbirdə "Yeniyetmələrin deviant davranışı", "Ailədaxili münaqişələrin psixoloji xüsusiyyətləri və aradan qaldırılması yolları" və digər mövzularda məruzələr dinlənilmiş, mövcud problemlərin, onların həlli perspektivlərinin araşdırılması kontekstində uşaq hüquqlarının müdafiəsi, ailə dəyərlərinin möhkəmləndirilməsi, ailədaxili problemlərin həlli yolları müzakirə edilmiş, təkliflər verilmişdir.
AzərTAc
Azərbaycan.- 2009.-10
noyabr.- S. 7.