Azərbaycan İKT-yə üzv ölkələrlə iqtisadi əməkdaşlığı bundan sonra da inkişaf etdirəcəkdir

Azərbaycanın Baş nazirinin müavini Abid Şərifov İstanbulda İslam Konfransı Təşkilatı İqtisadi və Ticarət Daimi Komitəsinin (COMCEC) 25-ci sessiyası çərçivəsində keçirilmiş zirvə toplantısında çıxış etmişdir.

Baş nazirin müavini ilk olaraq, Azərbaycan Respublikasının Prezidenti İlham Əliyevin COMCEC-in yaradılmasının 25-ci ildönümü münasibətilə təbriklərini və səmimi salamlarını Türkiyə Prezidenti Abdullah Gülə və İKT-nin baş katibi Ekmələddin İhsanoğluna çatdırmışdır.

Abid Şərifov bildirmişdir ki, Azərbaycan COMCEC-in fəaliyyətinə böyük əhəmiyyət verir və onu yüksək qiymətləndirir. Xüsusilə, dünyanı bürümüş dərin maliyyə böhranı şəraitində bu komitə müsəlman ölkələri arasında iqtisadi əməkdaşlığın genişlənməsində böyük rol oynayır.

Müstəqilliyinin ilk illərindən qardaş müsəlman ölkələri ilə əməkdaşlığı inkişaf etdirən Azərbaycan müxtəlif layihələrin həyata keçirilməsində fəal iştirak edir. Xalqımızın ümummilli lideri Heydər Əliyev İKT-nin xidmətlərini yüksək qiymətləndirmiş və bu təşkilatın fəaliyyətinin nə qədər mühüm olduğunu dəfələrlə vurğulamışdır. Ulu öndərin siyasətini davam etdirən Azərbaycan Prezidenti İlham Əliyevin səyləri nəticəsində son illər İKT ilə əməkdaşlıq yüksələn xətlə inkişaf edir. Dövlətimizin başçısı təşkilatın 2005-ci ildə Məkkədə keçirilmiş zirvə görüşündə İKT-nin bütün təşəbbüslərini dəstəklədiyimizi bildirmiş, əməkdaşlığın möhkəmlənməsinə dair yeni təkliflər irəli sürmüşdür.

A.Şərifov daha sonra bildirmişdir ki, ölkəmiz bölgədə həyata keçirilən layihələrdə fəal iştirak etməklə, onların bir çoxuna liderlik edir. Böyük İpək Yolunun bərpasında mühüm əhəmiyyət kəsb edən TRASECA layihəsinin baş katibliyi Bakıda yerləşir. Azərbaycan Şimal-Cənub nəqliyyat dəhlizi çərçivəsində kommunikasiya layihələrində də mühüm rola malikdir. Türkiyə və Gürcüstanla birlikdə həyata keçirilən Bakı-Tbilisi-Qars dəmir yolu xətti bü cür önəmli layihələrdəndir.

Abid Şərifov təəssüflə bildirmişdir ki, nəqliyyat dəhlizləri, digər mühüm layihələrin önündə Ermənistanın Azərbaycan torpaqlarını işğal etməsi kimi ciddi əngəl vardır. İşğal nəticəsində ərazilərimizin 20 faizi zəbt olunmuş,

1 milyondan çox insanımız qaçqın və köçkün vəziyyətində yaşamaqda davam edir, minlərlə tarixi abidə, sosial və iqtisadi obyekt dağıdılmışdır. Biz Azərbaycanın ədalətli mövqeyini hər zaman dəstəkləyən İKT üzvü olan ölkələrə təşəkkürümüzü bildiririk. BMT Baş Məclisinin və Təhlükəsizlik Şurasının Azərbaycanın lehinə qəbul etdiyi qətnamələrdə də islam ölkələrinin mühüm rolu vardır.

Oqtay BAYRAMOV,

AzərTAc-ın xüsusi müxbiri

İstanbul

Azərbaycan.- 2009.- 10 noyabr.- S. 8.