Azərbaycan-Sloveniya əməkdaşlığının
inkişafı üçün
yaxşı potensial vardır
Xəbər verdiyimiz kimi, noyabrın 9-da "Gülüstan" sarayında
Azərbaycan Prezidenti İlham Əliyevin və xanımı Mehriban Əliyevanın adından Sloveniya Prezidenti Danilo Türkün və xanımı Barbara Mikliç Türkün şərəfinə rəsmi
ziyafət verilmişdir.
Dövlət başçıları ziyafətdə nitq söyləmişlər.
Azərbaycan Prezidenti İlham ƏLİYEV qonaqları salamlayaraq dedi:
- Hörmətli
cənab Prezident!
Hörmətli xanım Barbara Mikliç Türk!
Xanımlar və cənablar!
Sizi Azərbaycanda
bir daha səmimiyyətlə salamlayır
və "Xoş gəlmisiniz!" deyirəm.
Bu gün Sloveniya ilə Azərbaycan arasında münasibətlərin yeni
səhifəsi açılır.
Sizin Azərbaycana ilk səfəriniz ikitərəfli münasibətlərimizdə
mühüm hadisədir.
Mən bu səfəri yüksək qiymətləndirir
və onun ölkələrimiz arasında
təşəkkül tapmış
dostluq və əməkdaşlıq münasibətlərinin
yeni mərhələsinə
zəmin yaradacağına
inanıram. Şübhə
etmirəm ki, keçirdiyimiz görüşlər,
apardığımız danışıqlar
və fikir mübadiləsi, habelə
imzalanmış sənədlər
və iki ölkənin iş adamlarının sabah təşkil olunacaq biznes forumu qarşılıqlı
fəaliyyət üçün
yeni sahələri müəyyən edəcək,
əlaqələrimizin gələcək
inkişafına öz
töhfəsini verəcəkdir.
Qeyd etmək istəyirəm ki, Sloveniya Avropa ölkələri arasında
Azərbaycanın müstəqilliyini
tanıyan ilk dövlətlərdən biridir.
Tarixdə bizim xalqları birləşdirən
ümumi məqamlar çoxdur. İkinci Dünya müharibəsi illərində - alman faşizminə qarşı
mübarizədə sloveniyalılarla
birlikdə Azərbaycan
xalqının qəhrəman
övladları da fəal iştirak etmişlər. Sloveniyalılarla
çiyin-çiyinə
vuruşmuş Azərbaycanın
qəhrəman oğlu
Mehdi Hüseynzadə Sloveniyada həlak olmuş və onun şərəfinə
orada abidə ucaldılmışdır.
Sloveniya ilə Azərbaycanın müstəqillik
tarixi də oxşardır. Uzun müddət başqa
dövlətlərin tərkibində
olmuş və dövlət müstəqilliyini
təxminən eyni vaxtda qazanmış ölkələrimiz son illərdə böyük
sınaqlardan uğurla
çıxmışlar. Əlamətdar
haldır ki, artıq münasibətlərimiz
möhkəmlənir və
genişlənir. Ölkələrimiz
arasında ticarət-iqtisadi, sənaye və energetika, mədəniyyət və
turizm, təhsil, informasiya texnologiyaları,
sərmayə qoyuluşu
və digər sahələrdə yaxşı
əməkdaşlıq imkanları
vardır. Düşünürəm
ki, biz birgə
səylərimizlə bu
imkanları reallaşdıra
bilərik.
Azərbaycan Sloveniya ilə həm ikitərəfli əsasda,
həm də beynəlxalq və regional təşkilatlar, eləcə də Avropa İttifaqı, ATƏT
və NATO çərçivəsində
sıx əməkdaşlığa
xüsusi əhəmiyyət
verir. Avropa İttifaqının "Şərq
tərəfdaşlığı" təşəbbüsü əməkdaşlığımız
üçün yeni perspektivlər açır.
Azərbaycan son illər ərzində sürətli inkişaf yolu keçmişdir. Ötən beş ildə iqtisadiyyatımız
2,6 dəfə artmışdır.
Bunun nəticəsidir
ki, dünyada hökm sürən maliyyə böhranına,
neftin qiymətinin kəskin şəkildə
aşağı düşməsinə
baxmayaraq, bu ilin 9 ayı ərzində Azərbaycan
iqtisadiyyatı 6,1 faiz
artmışdır. Eyni zamanda,
irimiqyaslı beynəlxalq
layihələrin həyata
keçirilməsi nəticəsində
Böyük İpək
Yolunun bərpası, Şərq-Qərb nəqliyyat dəhlizinin yaradılması, eləcə
də Avropanın enerji təhlükəsizliyinin
təmin olunması istiqamətində səylərimiz
artıq öz bəhrəsini verməkdədir.
Bütün bunlar sübut edir ki, regionumuzun dinamik inkişafı üçün hər cür şərait vardır. Lakin təəssüf olsun ki, Ermənistan-Azərbaycan, Dağlıq
Qarabağ münaqişəsinin
hələ də davam etməsi regionun çiçəklənməsi
yolunda böyük maneə olaraq qalır. Belə ki, Ermənistanın hərbi təcavüzü
və etnik təmizləmə siyasəti
nəticəsində torpaqlarımızın
20 faizi işğal edilmiş, ölkədə
1 milyondan çox qaçqın və məcburi köçkün
yaranmışdır. Dünya
birliyi və beynəlxalq təşkilatlar
Azərbaycanın ərazi
bütövlüyünü tanıyır, münaqişənin
ölkəmizin ərazi
bütövlüyü çərçivəsində
beynəlxalq hüquq normalarına uyğun, ədalətli həllinin tərəfdarıdır. Münaqişə
ilə bağlı
BMT Təhlükəsizlik Şurasının
4 qətnaməsi, ATƏT, Avropa
Şurası Parlament Assambleyası, NATO və digər beynəlxalq təşkilatların müvafiq
qərar və qətnamələri vardır.
Bu münaqişə yalnız beynəlxalq hüquq normalarına uyğun, Azərbaycanın
ərazi bütövlüyü
çərçivəsində həll olunmalıdır.
Hörmətli cənab Prezident!
İcazə verin, Azərbaycana rəsmi səfərinizə böyük əhəmiyyət verdiyimi bir daha ifadə edim və bu badəni Sizin sağlığınıza, xanımınızın sağlığına, Sloveniya ilə Azərbaycan arasında səmimi dostluq və faydalı əməkdaşlıq əlaqələrinin inkişafının şərəfinə qaldırım.
* * *
Sloveniya Prezidenti Danilo TÜRK təşəkkür edərək dedi:
- Hörmətli cənab Prezident!
Hörmətli xanım Əliyeva!
Xanımlar və cənablar!
Əziz dostlar!
Bizi salamlamaq üçün söylədiyiniz xoş sözlərə görə çox sağ olun. İcazə verin, sizin XII əsrdə yaşamış məşhur şairiniz Nizami Gəncəvidən bir sitat gətirim: "Qəlbdən deyilən söz qəlbə yol tapır". Azərbaycan Respublikasına rəsmi səfər etmək üçün dəvət almağımdan yüksək dərəcədə məmnun oldum. İcazə verin, nümayəndə heyətimlə birlikdə gözəl paytaxtınız Bakıda qaldığım müddətdə bizə göstərilən səmimi münasibətə və qonaqpərvərliyə görə Sizə təşəkkürümü bildirim. Bizim üçün bu səfər ölkənizin əldə etdiyi qeyri-adi tərəqqi ilə birbaşa tanışlıq üçün nadir fürsətdir. Bu tərəqqi sadəcə böyük təbii sərvətlərə əsaslanmır, o həm də xalqınızın xüsusi novatorluq və yaradıcılıq bacarıqlarının, eyni zamanda cənab Prezident, Sizin sələfiniz, müasir Azərbaycanın qurucusu mərhum Prezident Heydər Əliyevin baxışının nəticəsidir.
Sloveniya Prezidenti Danilo Türk dedi ki, xalqlarımızın oxşar tarixi qarşılıqlı anlaşma və əməkdaşlıq üçün böyük əhəmiyyət kəsb edir. "Sloveniya və Azərbaycan təkcə iki dost ölkə deyildir. Demək olar ki, onlar müəyyən cəhətdən həmyaşıddırlar", - deyən Danilo Türk bu il ölkələrimizin müstəqilliklərinin 18-ci ildönümünün qeyd edildiyini bildirdi. Ali qonaq dedi ki, xalqlarımız arasındakı əlaqələrin uzun tarixi kökləri vardır. İkinci Dünya müharibəsinin ağır illərində Sloveniya xalqı sloven torpağında faşizmə qarşı mübarizə apararaq həyatını qurban vermiş azərbaycanlı döyüşçülərin göstərdiyi şücaəti xüsusi minnətdarlıqla xatırlayır. Sloveniya Prezidenti ölkəsinin Avropa İttifaqı ilə Azərbaycan arasında əməkdaşlıq sahəsindəki inkişafa dostluq və hörmət hissi ilə yanaşdığını da diqqətə çatdıraraq bildirdi:
- Sloveniya Azərbaycan rəhbərliyinin Tərəfdaşlıq və Əməkdaşlıq Sazişi, Fəaliyyət Planı, Avropa Qonşuluq Siyasəti və "Şərq tərəfdaşlığı"nın əsas məqsədlərinin həyata keçirilməsindən irəli gələn çağırışların həllində və zəruri islahatların həyata keçirilməsində tutduğu qətiyyətli mövqeyini alqışlayır. Sloveniya və Avropa İttifaqı Qafqazdakı qonşularla daha yaxın əməkdaşlığa çalışır. Bu məqsədlə biz qitəmizdə davamlı sülh, sabitlik, təhlükəsizlik və rifahı təmin edəcək bu əməkdaşlığın təşviqini intensivləşdirməliyik. Həm Sloveniya, həm Azərbaycan ölkələrimiz və xalqlarımız arasında yaxşı qonşuluq əlaqələrini, təhlükəsizliyi və əməkdaşlığı, eləcə də qarşılıqlı hörməti gücləndirmək üçün əlindən gələn səyləri göstərir. Biz ölkənizin həmin məqsədlərin həyata keçirilməsinə verdiyi töhfəni yüksək qiymətləndiririk. Regionda mühüm rol oynayan sabit və müvəffəqiyyətli Azərbaycan Avropa və bütün dünya üçün müstəsna əhəmiyyət kəsb edir.
Biz, həmçinin ölkənizin müasir tarixində üzləşdiyi faciəli hadisələrlə tanışıq. Lakin əminik ki, Azərbaycan yaradıcı və açıq dialoq vasitəsilə bu günə qədər göstərdiyi eyni əzmkarlıqla mürəkkəb və ağrılı Dağlıq Qarabağ məsələsinin sülh yolu ilə ədalətli həllinə töhfəsini davam etdirəcəkdir. Biz inanırıq ki, beynəlxalq hüquqa əsaslanan ədalətli həll variantına nail olunacaq və qaçqınlar öz evlərinə qayıtmaq imkanı əldə edəcəklər.
Danilo Türk ümidvar olduğunu bildirdi ki, Sloveniya ilə Azərbaycan arasında ikitərəfli əməkdaşlıq ən qısa vaxtda daha da inkişaf edəcək və zənginləşəcəkdir.
Sloveniya Prezidenti ölkələrimizin mədəniyyət və iqtisadiyyat sahələrində əməkdaşlığının daha da gücləndirilməsinin əhəmiyyətini vurğuladı. Bildirdi ki, iqtisadi əməkdaşlıq baxımından ölkələrimizin potensialı böyükdür. "Səfər çərçivəsində məni müşayiət edən sloveniyalı iş adamları ölkənizin etimadına və dəstəyinə arxalanır", - deyən Sloveniyanın dövlət başçısı yüksək qonaqpərvərliyə görə təşəkkür edərək bildirdi ki, qarşılıqlı əməkdaşlıq sülh, təhlükəsizlik, sabitlik və inkişaf kimi ortaq məqsədlərə nail olmağa və xalqlarımızın rifahının təmin olunmasına töhfə verəcəkdir.
AzərTAc
Azərbaycan.- 2009.- 11 noyabr.- S. 1.