Azərbaycanda işləyən xarici vətəndaşların sosial ödəmələrə cəlb olunmalarına diqqət artırılır

Cari ilin 10 ayı ərzində Dövlət Sosial Müdafiə Fondunda (DSMF) uçota alınan əcnəbilərin sayı 15,3 faiz artıb. Belə ki, hesabat dövründə əlavə olaraq 1196 nəfər əcnəbi vətəndaş uçota alınıb və beləliklə, fondda uçota alınan əcnəbilərin sayı 7833 nəfərə çatıb.

DSMF ictimaiyyətlə əlaqələr sektorunun məlumatına görə, ümumilikdə 83 ölkəni əhatə edən əcnəbilər arasında Türkiyə vətəndaşları çoxluq təşkil edir - 4520 nəfər. 10 ay ərzində digər ölkələrdən olan əcnəbilərin sayında da artım müşahidə olunub. Fərdi uçot sistemində qeydiyyata alınan əcnəbilərin sayına görə ikinci yerdə qərarlaşan Gürcüstan vətəndaşlarının sayı 1196 nəfərə yüksəlib. Üçüncü yerdə gələn Rusiya Federasiyasının vətəndaşlarının sayı isə 537 nəfərdir. Sonrakı yerlərdə İran İslam Respublikası (242 nəfər), Hindistan (195), Çin Xalq Respublikası (93), Ukrayna (74), Pakistan İslam Respublikası (70), Böyük Britaniya və Şimali İrlandiya Krallığı (68), Malayziya (63), Qazaxıstan (62), Özbəkistan (59), Türkmənistan (46), Almaniya (44), İtaliya (42), ABŞ (32) və s. ölkələr gəlir.

Prezidentin 30 dekabr 2008-ci il tarixli sərəncamı ilə təsdiq edilən "2009-2015-ci illərdə Azərbaycan Respublikasında sığorta-pensiya sisteminin inkişafına dair Dövlət Proqramı"na uyğun olaraq, DSMF dövlət sosial sığorta sistemində fərdi uçotun inkişafı üçün ardıcıl tədbirlər görür. Bu tədbirlərin istiqamətlərindən biri də Azərbaycan Respublikası mənbələrindən əmək ödənişi və məcburi dövlət sosial sığortası cəlb olunan digər gəlirləri əldə edən əcnəbilərin məcburi dövlət sosial sığortası ilə əhatə olunmasıdır. Bununla yanaşı, xarici ölkələrdə əmək miqrantları kimi çalışan Azərbaycan vətəndaşlarının gələcək pensiya hüquqlarının qorunmasını təmin etmək və sosial müdafiəsini gücləndirmək məqsədilə xarici ölkələrlə beynəlxalq müqavilələrin bağlanılması üzrə təkliflər hazırlanır, həmin dövlətlərin sığorta-pensiya qurumları ilə əməkdaşlığın inkişafı üçün sistemlərin qarşılıqlı öyrənilməsi istiqamətində işlər görülür.

Xatırladaq ki, ölkəmizdə Azərbaycan Respublikası mənbələrindən əmək ödənişi və məcburi dövlət sosial sığorta haqqına cəlb olunan digər gəlirləri əldə edən əcnəbilərin məcburi dövlət sosial sığortası ilə əhatə olunması prosesinə 2006-cı ilin yanvarın 1-dən başlanılmışdır.

Azərbaycan.- 2009.-11 noyabr.- S. 4.