Sloveniya Prezidenti Danilo Türk Azərbaycanın Baş naziri Artur Rasizadə ilə görüşmüşdür

Azərbaycanda rəsmi səfərdə olan Sloveniya Prezidenti Danilo Türk noyabrın 10-da onun üçün ayrılmış iqamətgahda Baş nazir Artur Rasizadə ilə görüşmüşdür.

Sloveniya dövlətinin başçısı səfəri çərçivəsində Azərbaycan Prezidenti İlham Əliyev ilə aparılmış danışıqları yüksək qiymətləndirərək vurğulamışdır ki, həmin danışıqlar bütün sahələrdə ikitərəfli əlaqələrin genişlənməsinə xidmət edəcəkdir.

Prezident Danilo Türk Sloveniya-Azərbaycan əməkdaşlığının perspektivlərindən bəhs edərək səfər zamanı imzalanmış ikitərəfli sənədlərin qarşılıqlı faydalı münasibətlərin daha da inkişaf etdirilməsi üçün əhəmiyyətini vurğulamışdır.

Baş nazir Artur Rasizadə ali qonağa son illərdə Azərbaycanda həyata keçirilmiş iqtisadi islahatlar barədə məlumat vermiş, siyasi və iqtisadi sabitlikdən danışmışdır. Azərbaycan hökumətinin başçısı əmin olduğunu bildirmişdir ki, Sloveniya dövlətinin başçısının Azərbaycana rəsmi səfəri ölkələrimiz arasında bir çox sahələrdə əməkdaşlığın genişləndirilməsinə təkan verəcəkdir.

Azərbaycan.- 2009.- 11 noyabr.- S. 5.