Prezident Danilo Türk: Azərbaycan xalqının mədəni və zəngin irsi olan İçərişəhər məndə çox gözəl təəssürat yaratdı

Azərbaycan xalqının mədəni və zəngin irsi olan İçərişəhər məndə çox gözəl təəssürat yaratdı.

Bu sözləri Sloveniya Respublikasının Prezidenti Danilo Türk noyabrın 10-da İçərişəhərlə tanış olarkən demişdir.

Gəzinti zamanı Sloveniya Prezidentinə və xanımı Barbara Mikliç Türkə dünya şəhərsalma sənətinin nadir nümunəsi, YUNESKO-nun Dünya irs siyahısına daxil edilmiş "İçərişəhər" Dövlət Tarix-Memarlıq Qoruğu, habelə buradakı tikililərin tarixi, maddi mədəniyyət abidələri, onların bərpası istiqamətində aparılan işlər barədə geniş məlumat verildi.

Diqqətə çatdırıldı ki, möhkəmliyi ilə seçilən qala divarları vaxtilə qədim Bakının müdafiə funksiyalarından birini yerinə yetirmişdir. Abidələrin sırasında beynəlxalq əhəmiyyətli mədəni nümunələr də vardır. İçərişəhərdəki "Şirvanşahlar Sarayı Kompleksi" Dövlət Tarix-Memarlıq qoruq-muzeyi Azərbaycan memarlığının nadir incilərindəndir.

Son illər buradakı abidələrin qorunması və bərpasına göstərilən dövlət qayğısı daha da artmışdır. Azərbaycan Prezidenti İlham Əliyevin xüsusi diqqəti sayəsində bu gün İçərişəhər özünün intibah dövrünü yaşayır. Burada abadlaşdırma, təmir-bərpa işləri köhnə şəhərin ab-havasına uyğun aparılır.

İçərişəhərin mövcudluğu və tarixi barədə xəbərdar olduqlarını deyən qonaqlar "Brilyant əl" bədii filminin məşhur epizodlarından birinin çəkildiyi küçə ilə tanış oldular.

Sloveniya Prezidenti İçərişəhərin gələcəkdə məşhur turizm mərkəzlərindən birinə çevrilməsi üçün zəngin mədəni-tarixi potensiala malik olduğunu dedi.

Ali qonaq burada həyata keçirilən layihələrlə də maraqlandı və aparılan bərpa işlərini yüksək qiymətləndirdi. Gələcəkdə Azərbaycan ilə Sloveniya arasında mədəni irsin qorunması istiqamətində əməkdaşlığın aparılması üçün fikirlərini bildirdi.

Paytaxtın nadir memarlıq incilərindən sayılan Qız qalası və Azərbaycanın Mərkəzi Asiyanın müxtəlif ölkələri ilə ticarət və mədəni əlaqələrini təsdiqləyən Multanı və Buxara karvansaraları Sloveniya Prezidentinin və xanımının diqqətini daha çox cəlb etdi.

Mədəni irslə tanışlıqdan sonra ali qonaq və xanımı karvansarada çay süfrəsinə dəvət edildilər.

Prezident Danilo Türk və xanımı İçərişəhərdən zəngin təəssüratla ayrıldıqlarını bildirdilər.

Azərbaycan.- 2009.- 11 noyabr.- S. 5.