Sloveniya Prezidentinin xanımı Beynəlxalq Muğam Mərkəzi ilə tanış olmuşdur

Azərbaycanda rəsmi səfərdə olan Sloveniya Respublikasının Prezidenti Danilo Türkün xanımı Barbara Mikliç Türk noyabrın 10-da Beynəlxalq Muğam Mərkəzi ilə tanış olmuşdur.

Sloveniya Prezidentinin xanımına dənizkənarı Milli Parkda yerləşən mərkəz haqqında ətraflı məlumat verildi.

Xanım Barbara Mikliç Türk qaval daşına maraqla baxdı.

Bildirildi ki, Heydər Əliyev Fondunun milli mənəvi dəyərlərimizin qorunması və dünyada geniş təbliği ilə bağlı reallaşdırdığı layihələr sırasında xüsusi əhəmiyyəti olan bu mərkəzin inşası fondun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə həyata keçirilmişdir. 2005-ci il aprelin 6-da Prezident İlham Əliyev Bakıda Beynəlxalq Muğam Mərkəzinin yaradılması haqqında sərəncam imzalamışdır. Azərbaycan muğamının bəşər mədəniyyətinin nadir inciləri ilə bir sırada YUNESKO-nun Dünya qeyri-maddi irs siyahısına daxil edilməsi onun nə dərəcədə bənzərsiz sənət növü olduğunu bir daha təsdiqləyir.

Mərkəz ilə yaxından tanış olan xanım Barbara Mikliç Türk burada Azərbaycanın görkəmli muğam ifaçılarının büstlərinə baxdı və ona milli musiqi alətləri barədə ətraflı məlumat verildi.

Sloveniya Prezidentinin xanımı gənc muğam ifaçıları Güllü Muradovanın və İlkin Əhmədovun ifasında Azərbaycan muğamlarını dinlədi.

Barbara Mikliç Türk ifaçılara xatirə hədiyyələri verdi.

Sonra hörmətli qonağa Heydər Əliyev Fondunun təşəbbüsü ilə çap edilmiş "Qarabağ xanəndələri" albomu, "Muğam ensiklopediyası" toplusu, "Azərbaycan musiqi alətləri" kitabı hədiyyə edildi.

Azərbaycan.- 2009.- 11 noyabr.- S. 5.