İran Azərbaycanın ədalətli mövqeyini dəstəkləyir

Noyabrın 9-da Milli Məclis Sədrinin birinci müavini, parlamentin Təhlükəsizlik və müdafiə komitəsinin sədri Ziyafət Əsgərov ölkəmizdə səfərdə olan İran İslam Respublikası İslam Şurası Məclisinin Sosial məsələlər komissiyasının sədri Süleyman Cəfərzadənin başçılıq etdiyi nümayəndə heyəti ilə görüşdü. Qonaqları səmimi salamlayan Ziyafət Əsgərov dedi ki, Azərbaycan dövlətinin xarici siyasətinin əsas prioritetlərindən biri qonşu İranla münasibətlərin daha da inkişaf etdirilməsidir. Dövlətlərimizin başçılarının qarşılıqlı səfərləri zamanı imzalanmış çoxsaylı sənədlər iki ölkə arasında münasibətlərin hərtərəfli inkişafı üçün möhkəm hüquqi baza yaradıb. Ümumilikdə, Azərbaycanla İran arasında 100-ə yaxın sənəd imzalanıb. İqtisadi münasibətlər genişlənir, ticarət dövriyyəsi 428 milyon ABŞ dolları həcmindədir. Amma ticarət dövriyyəsini daha da artırmaq üçün böyük potensial var. Ziyafət Əsgərovun sözlərinə görə, bu cür görüşlər əməkdaşlığımızın genişlənməsinə böyük töhfələr verir.

Dağlıq Qarabağ münaqişəsi barədə danışan Ziyafət Əsgərov Azərbaycanın haqq səsini dəstəklədiyi üçün İran xalqına minnətdarlığını bildirdi, bu dəstəyin bundan sonra da davam etdiriləcəyinə ümidvar olduğunu qeyd etdi.

Görüş üçün təşəkkürünü bildirən Süleyman Cəfərzadə dedi ki, bugünədək qarşılıqlı səfərlər dostluq qrupları, ayrı-ayrı deputatlar və rəhbərlik səviyyəsində həyata keçirilib. Komissiyalar səviyyəsində həyata keçirilən bu ilk səfər təkcə parlamentlərimiz arasında deyil, bütün sahələrdə əlaqələrimizin inkişafına təkan verəcəkdir. Qonaq daha sonra dedi: "İran özü müharibədən və təcavüzdən əziyyət çəkmişdir. Ona görə də Azərbaycan xalqının dərdini başa düşür və bütün beynəlxalq təşkilatlarda, tədbirlərdə Azərbaycan dövlətinin ərazi bütövlüyünü müdafiə edir. İran bu dəstəyini bundan sonra da davam etdirəcəkdir".

Görüşdə ikitərəfli əlaqələrin inkişaf perspektivləri, qanunvericilik sahəsində təcrübə mübadiləsi, qarşılıqlı səfərlərin əhəmiyyəti və digər məsələlər ətrafında geniş fikir mübadiləsi aparıldı.

Azərbaycan.- 2009.- 10 noyabr.- S. 4.