Lyublyanada Nazirlər Konfransı başa çatmışdır

Azərbaycanın mədəniyyət və turizm naziri Əbülfəs Qarayev Sloveniyanın paytaxtı Lyublyanada işə başlayan "Bizim ümumi Avropa irsimizin bərpası" mövzusunda Nazirlər Konfransında iştirak etmişdir.

Konfransda Sloveniya Respublikasının Prezidenti Danilo Türk, Avropa Şurasının (AŞ) yeni Baş katibi Torbern Yaqland, Avropa Komissiyasının rəsmi şəxsləri, bir sıra digər beynəlxalq təşkilatların nümayəndələri, Avropa ölkələrindən nazirlər, bir sıra siyasətçi və ictimai xadimlər iştirak etmişlər.

Tədbirdə Əbülfəs Qarayev Azərbaycanın mədəniyyətlərarası dialoq üzrə "Bakı Prosesi" və mədəni irs sahəsində milli və beynəlxalq fəaliyyəti, həmçinin Ermənistan tərəfindən işğal edilmiş torpaqlarda mədəni irsin vəziyyəti barədə çıxış etmişdir.

Nazirliyin mətbuat xidmətindən bildirmişlər ki, konfrans çərçivəsində Ə.Qarayev ilə AŞ-nin Baş katibi Torbern Yaqland arasında görüş keçirilmişdir.

Görüşdə Azərbaycanda mədəniyyət sahəsində həyata keçirilən tədbirlərdən söz açan nazir 2011-ci ildə Prezident İlham Əliyevin təşəbbüsü ilə Bakıda keçiriləcək dünya mədəniyyətlərarası dialoq forumunun əhəmiyyətindən danışmış, Ermənistan tərəfindən işğal edilmiş torpaqlarımızda xalqımıza məxsus mədəni irsin vəziyyəti barədə ətraflı məlumat vermişdir.

Ə.Qarayev Baş katibin diqqətinə çatdırmışdır ki, Azərbaycan tərəfi mədəni irsin vəziyyətini öyrənmək məqsədilə AŞ-nin fakt-araşdırıcı missiyasının regiona gəlməsində maraqlıdır. Lakin Azərbaycan və Ermənistan ərazilərinə səfər edəcək fakt-araşdırıcı missiyanın tərkibi eyni olmalı və onlar işğal edilmiş torpaqlara Azərbaycan ərazisindən getməlidirlər.

AzərTAc

Azərbaycan.- 2009.- 12 noyabr.- S. 9.