Azərbaycan Respublikası Konstitusiyası insan
hüquqlarının müdafiəsi üzrə əsas baza sənədidir
Noyabrın 11-də Ombudsman
Aparatında 12 noyabr Konstitusiya Günü münasibətilə
"Azərbaycan Respublikası Konstitusiyası insan
hüquqlarının müdafiəsi üzrə əsas baza sənədidir"
mövzusunda "dəyirmi masa" keçirilmişdir.
Giriş sözü ilə
çıxış edən insan hüquqları üzrə
müvəkkil Elmira Süleymanova Konstitusiya hüquq və
azadlıqlarının müdafiəsində Ombudsmanın
rolundan danışmışdır. Bildirilmişdir
ki, Ombudsman təsisatının fəaliyyətinin əsas məqsəd
və məramı bütünlükdə insan
hüquqlarının həyata keçirilməsinə,
pozulmuş insan hüquqlarının bərpasına, vətəndaş
cəmiyyətinin, demokratiya meyarlarına cavab verən dövlətin
və buna uyğun insan hüquqları sisteminin
yaradılmasına yönəldilmişdir.
Azərbaycan Respublikası
Konstitusiya Məhkəməsi sədrinin müavini Sona Salmanova
"Konstitusiya Məhkəməsi və insan
hüquqları" mövzusunda məruzə etmişdir. Məruzədə qeyd edilmişdir ki, ulu öndərimiz
Heydər Əliyev 1993-cü ildə xalqın təkidli tələbi
ilə Azərbaycanda siyasi hakimiyyətə qayıtdıqdan
sonra ilk olaraq beynəlxalq hüququn və insan
hüquqlarının prinsiplərinə uyğun olaraq
Konstitusiya layihəsinin hazırlanmasını qarşıya məqsəd
qoymuşdur. Qısa müddətdə layihə hazırlanaraq
1995-ci il noyabrın 12-də ümumxalq səsverməsi yolu ilə
qəbul olunmuşdur.
Azərbaycan
Respublikasının Konstitusiyası qəbul edildikdən sonra
ölkədə demokratik, hüquqi islahatların həyata
keçirilməsinə başlanılmış və bu ali sənəddə
təsbit olunmuş insan və vətəndaş
hüquqlarının daha səmərəli təmin edilməsi
məqsədilə bu sahədə mühüm əhəmiyyət kəsb
edən normativ-hüquqi aktlar qəbul olunmuş, dövlət
proqramları təsdiq edilmiş və demokratik təsisatlara təkan
verilmişdir.
"Dəyirmi masa"da AMEA
İnsan Hüquqları İnstitutunun direktoru Aytən Mustafayeva
"Konstitusiya hüquq islahatları və insan
hüquqları" mövzusunda məruzə etmişdir.
Dövlət qurumları və
qeyri-hökumət təşkilatları nümayəndələrinin
iştirak etdikləri "dəyirmi masa"da mövzu ilə
bağlı müzakirələr aparılmışdır.
Tədbirdə "Qanunun aliliyi və insan hüquqlarının müdafiəsi mexanizmləri" kitabının təqdimatı olmuşdur.
AzərTAc
Azərbaycan.- 2009.- 12 noyabr.- S. 9.