Heydər Əliyev Fondunun dəstəyi Qaxda təhsilin inkişafının zəminidir

Bu gün vətənpərvər Azərbaycan gəncliyinin yetişməsində mənəvi tərbiyə ilə yanaşı, hərtərəfli təhsilin təşkili də mühüm əhəmiyyət kəsb edir. Bu baxımdan dövlət proqramları çərçivəsində görülən işlərlə birgə Heydər Əliyev Fondunun fəaliyyəti də olduqca təqdirəlayiqdir. Bu fondun geniş və çoxşaxəli fəaliyyətinin nəticəsidir ki, Azərbaycanın milli mədəniyyətinin, adət-ənənələrinin dünya miqyasında tanıtdırılması üçün respublikamızda mühüm tədbirlər, simpoziumlar, müsabiqələr, sərgilər, beynəlxalq konfranslar keçirilir.

İmkansız, valideyn himayəsindən məhrum olan uşaqlara mənəvi dəstək verilir, şəhid ailələrinə yardımlar göstərilir, uşaq bağçaları, uşaq evləri, məktəblərin tikintisi və təmiri sahəsində uğurlu addımlar atılır. Fərəhləndirici haldır ki, bu işlər təkcə respublikamızın paytaxtı Bakı şəhərində deyil, regionlarda da, ucqar dağ rayonlarında da aparılır. Qax rayonunda və Qax təhsil sistemində görülən işlər bunun bariz nümunəsidir.

Son beş ildə rayonda mövcud olan təhsil müəssisələrinin maddi - tədris bazasının yaxşılaşdırılması və möhkəmləndirilməsi sahəsində uğurlu addımlar atılmış və bu istiqamətdə Heydər Əliyev Fondunun xüsusi rolu olmuşdur. Belə ki, rayonda 260 yerlik 1 nömrəli Qax şəhər və 240 yerlik Turaclı kənd orta məktəbləri Heydər Əliyev Fondunun dəstəyi ilə inşa edilib. Rayonun ümumtəhsil məktəbləri Heydər Əliyev Fondunun köməyi ilə çap olunmuş 15 fənni əhatə edən 140 adda tədris plakatları ilə təmin edilib, 1-ci siniflər üçün əyani vəsaitlər məktəblərə çatdırılıb.

Qeyd etmək lazımdır ki, rayonun Güllük, Turaclı, Qaşqaçay kəndlərində və Qax şəhərində müasir tipli yeni orta, İbaxli kəndində Əsas, Şıxlar, Qazmalar, Amanlı kəndlərində ibtidai məktəb binaları tikilib istifadəyə verilib. Qaxbaş 1 nömrəli orta məktəbi üçün 60 yerlik 3, Qaxbaş 2 nömrəli orta məktəbi üçün və Zərnə kənd orta məktəbi üçün 80 yerlik 4 əlavə sinif otaqları tikilib. Bundan başqa, rayonun Cəlayir və Ləkit kənd uşaq bağçaları, şəhər 2 nömrəli məktəbin və şahmat məktəbinin binaları əsaslı təmir edilib. Artıq Baydarlı kəndində dövlət vəsaiti hesabına 360 yerlik orta məktəb binasının tikintisi başa çatdırılmış, Almalı kəndində 480 yerlik orta məktəb binasında son tamamlama işləri görülmüşdür. Bugünlərdə Qax şəhərində Yaponiya dövlətinin maliyyə dəstəyi ilə tikilmiş 180 yerlik orta məktəb binası istifadəyə verilib. Çüdülü kəndində isə 80 yerlik 4 əlavə sinif otağının tikintisi davam etdirilir.

Rayonun təhsil müəssisələrində təlimin keyfiyyətinin yüksəldilməsi məsələsinə xüsusi diqqət yetirilir. Rayon məktəblilərinin beynəlxalq, respublika, zona, rayon səviyyələrində keçirilmiş müxtəlif müsabiqə, olimpiada, bilik yarışlarında əldə etdiyi nəticələr sevindiricidir. Belə ki, son 5 ildə rayonun 19 şagirdi respublika fənn olimpiadalarında mükafata layiq yerlər tutmuş, gənc futbolçuları respublika turnirlərinin qalibi olmuş Ömər Balacayev "Kinq-fu" idman növü üzrə dünya çempionu adını qazanmış, gənc şahmatçı Xanım Balacayeva 8 yaşadək qızlar arasında keçirilən Avropa çempionatında IV yeri tutmuşdur. Qax şəhər 4 nömrəli orta məktəbin şagirdi Günel Hacıkərimli Çexiyada, şəhər 2 nömrəli orta məktəbin şagirdləri Elvin Məmmədov, Aytən Kərimova, Asima Abbasova, Firuzə Qabulova Yunanıstanda keçirilən III Beynəlxalq Uşaq rəsmləri müsabiqəsinin laureatları olmuşlar. 8 şagirdin əl işləri Polşa Respublikasının Poznan şəhərində keçirilən Beynəlxalq müsabiqədə nümayiş etdirilmişdir. Şəhər 2 nömrəli orta məktəbin şagirdləri Elnur Həşimov "Şərqdə ilk müstəqil dövlət", Məryəm Məmmədli "Heydər Əliyev müstəqil Azərbaycan dövlətinin yaradıcısıdır", Günel Məmmədova "Heydər Əliyev və müstəqil Azərbaycan", Şükufə Şamxalova "Gələcək nəsillərlə üz-üzə" respublika inşa yazı müsabiqələrinin qalibləri sırasında olmuşlar.

Azərbaycan Respublikasının Konstitusiyasının, dövlət rəmzlərinin, ulu öndər Heydər Əliyev irsinin öyrənilməsi sahəsində çox iş görülür. Şagirdlərin hərbi vətənpərvərlik ruhunun artırılması diqqət mərkəzində saxlanılır. Şagirdlərimiz rayon, zona və respublika əhəmiyyətli yarışlarda müntəzəm iştirak edərək uğurlu nəticələr əldə edirlər. Məsələn, Tasmalı kənd orta məktəbinin "Cəsurlar", şəhər 2 nömrəli orta məktəbin "Şahin" hərbi-idman oyunu üzrə komandaları zona turundan əlavə rayonumuzu respublika turunda müvəffəqiyyətlə təmsil edərək qaliblər sırasında olmuşlar. "Sərhəd" hərbi-idman oyunu üzrə keçirilən zona yarışlarında isə Cəlayir kənd orta məktəbinin komandası ikinci olmuşdur.

Rayonda təhsil sahəsində aparılan məqsədyönlü tədbirlərin nəticəsidir ki, hər il ali məktəblərə qəbul sahəsində məzunlarımızın göstərdiyi nəticələr yaxşılaşır. Son 5 ildə rayonun orta ümumtəhsil məktəblərini bitirmiş 695 məzun ali məktəblərə qəbul olunmuş, 52 məzun 600-dən çox, 161 nəfər 500-700 arası bal toplamışdır. 7 məzunumuz Prezident təqaüdünə layiq görülmüşdür. Təkcə 2008-ci ildə 174 məzun ali məktəblərə qəbul olunmuş, onlardan 45 nəfəri 500-700 arası, 20 nəfəri isə 600-dən çox bal toplamış, 3 nəfəri Prezident təqaüdünə layiq görülmüşdür. Qəbulun nəticələrinə görə, abituriyentlərin ana dili, riyaziyyat, fizika, kimya, biologiya, coğrafiya fənləri üzrə göstəriciləri və qəbul imtahanlarında topladıqları orta bal respublika üzrə orta göstəricidən yuxarı olmuşdur. Şəhər 2 nömrəli və Qaxbaş kənd 2 nömrəli orta məktəbləri qəbulun nəticələrinə görə, respublika üzrə ən yaxşı məktəblərin siyahısına daxil edilmişdir.

"Ən yaxşı ümumtəhsil məktəbi" və "Ən yaxşı müəllim" müsabiqəsində iştirak edən şəhər 2 nömrəli orta məktəb, həmin məktəbin Azərbaycan dili və ədəbiyyatı müəllimi Gülbəniz Seyidova, şəhər 5 nömrəli orta məktəbin ibtidai sinif müəllimi Vəfa Heydərova müsabiqə qalibləri olmuşlar.

Son 5 ildə rayonun 4 müəllimi "Respublikanın əməkdar müəllimi" fəxri adına layiq görülmüş, 3 müəllim "Tərəqqi" medalı ilə, 18 müəllim isə "Azərbaycan Respublikasının qabaqcıl təhsil işçisi" döş nişanı ilə təltif olunmuşdur.

Rayonda təhsil sisteminin yaxşılaşdırılması və təkmilləşdirilməsi, təlimin keyfiyyətinin yüksəldilməsi sahəsində görülmüş işlər bizi əsla arxayınlaşdırmır və uğurlarımızın davam etdirilməsi üçün daha ciddi çalışmağa sövq edir.

Məhəmməd XASİYEV,

Qax Rayon Təhsil Şöbəsinin

müdiri

Azərbaycan.- 2009.- 13 noyabr.- S. 6.