Təbiət abidələrinin mühafizəsi
"Kür-Xəzər"
Xeyriyyə Cəmiyyəti İctimai Birliyi "Azərbaycan təbiət
abidələri" adlı tədbir keçirdi. Əsas məqsəd
cəmiyyətin başladığı xeyirxah işlə
ictimaiyyəti tanış etməkdir. Xeyriyyə cəmiyyəti
2009-cu ilin may ayından Azərbaycan Respublikasının
Prezidenti yanında Qeyri-Hökumət Təşkilatlarına
Dövlət Dəstəyi Şurasının maliyyə
yardımı ilə Azərbaycanın təbiət abidələrinin,
obyektlərinin tanıdılması və mühafizə edilməsi
məqsədilə Azərbaycan, ingilis, rus dillərində
kataloqun, internet saytının yaradılması,
qısametrajlı sənədli filmin çəkilməsi
layihəsini həyata keçirir.
Tədbirdə "Kür-Xəzər"
Xeyriyyə Cəmiyyəti İctimai Birliyinin sədri, iqtisad
elmləri doktoru, tibb elmləri namizədi Akif Kərimov cəmiyyətin
fəaliyyətindən danışdı. O, qeyd etdi ki,
"Kür-Xəzər" Xeyriyyə Cəmiyyəti fəaliyyət
göstərdiyi on il ərzində sosial, təhsil, mədəniyyət,
ətraf mühit, səhiyyə və digər sahələrdə
müxtəlif layihələr həyata keçirmişdir.
"Azərbaycan təbiət
abidələri" layihəsini də bu təşkilatın
ekoloq-mütəxəssisləri hazırlayıb. Təqdirəlayiq
haldır ki, Azərbaycan Respublikasının Prezidenti
yanında Qeyri-Hökumət Təşkilatlarına Dövlət
Dəstəyi Şurasının ekspertləri layihəyə
müsbət rəy veriblər və layihənin həyata
keçirilməsinə şərait yaradıblar.
Azərbaycan əsrarəngiz təbiətə
malikdir. Lakin təəssüflə qeyd etmək
lazımdır ki, bəzən xalqın mənəvi sərvətləri
maddi ehtiyaclara qurban verilir. Məlumatsızlıq səbəbindən
unikal təbiət abidələri və obyektləri
aşınmalara, məhvə məruz qalır. Abidələri
qorumaq, gənc nəslə sevdirmək hər bir insanın vətəndaşlıq
borcudur.
Heydər Əliyev Fondunun
prezidenti, YUNESKO-nun və İSESKO-nun xoşməramlı səfiri,
Milli Məclisin deputatı Mehriban xanım Əliyevanın təşəbbüsü
ilə keçirilən "Hərəmiz bir ağac əkək"
kampaniyası təbiətin qorunmasına yönəldilib.
"Kür-Xəzər"
Xeyriyyə Cəmiyyəti bu sahədəki problemləri nəzərə
alaraq maarifləndirmə işini qarşıya məqsəd
qoyub. Bu məqsədlə "Azərbaycan təbiət abidələri"
kataloqu çap olunub və www.tebietabideleri.az saytı
yaradılıb.
Tədbirdə həmin kataloq və
"Azərbaycan təbiət abidələri" adlı sənədli
film tədbir iştirakçılarına təqdim olundu. Azərbaycan
təbiət abidələrinin və obyektlərinin
sırasına xüsusilə qiymətli meşə sahələri,
geoloji obyektlər, yaşı 200-dən çox olan
ağaclar, şəlalələr, mağaralar, vulkanlar
daxildir. Üç mərhələdən ibarət olan layihənin
birinci mərhələsində Gəncə, Samux, Naftalan,
Yevlax, Qazax, Tovuz, Şəmkir, Daşkəsən
rayonlarındakı təbiət abidələri tədqiq
edilib. Birinci filmdə tamaşaçılar bu bölgədəki
abidələrlə tanış oldular.
Kataloqda isə abidələrlə
yanaşı, həmin bölgənin keçdiyi tarixi
inkişaf yolu, sənayesi, iqtisadiyyatı, mədəniyyəti,
kənd təsərrüfatı, əhalisinin məşğuliyyəti
də yer alıb.
Sədaqət YUSİFQIZI
Azərbaycan.- 2009.- 13 noyabr.- S. 12.