Sənət körpüsü

Azərbaycan Xalçası və Xalq Tətbiqi Sənəti Dövlət Muzeyində görkəmli xalçaçı-rəssam, muzeyin yaradıcılarından biri olan Lətif Kərimovun ad gününə həsr edilmiş "Keçmişdən gələcəyə aparan sənət körpüsü" adlı ənənəvi sərginin açılışı oldu. Əsas məqsəd qədim tarixə malik Azərbaycan tətbiqi sənət ənənələrinin qorunması və yaşadılmasıdır.

Tədbirdə iştirak edən xalçaçı-rəssamlar, sənət adamları ömrünü xalçaların öyrənilməsinə, toplanmasına həsr edən Lətif Kərimovun həyat və fəaliyyətindən söhbət açdılar, onunla bağlı xatirələrini dilə gətirdilər.

Sərgidə yer alan həvəskar və peşəkar sənətkarların əsərlərində tarixi ənənələri yaşatmaqla müasir dövrün tələblərinə uyğun təfsir çox önəmlidir.

Burada Lətif Kərimovun eskizləri əsasında toxunmuş müasir xalçalar, Bədirə Əliyevanın muncuqla hazırlanmış xalçaları, Cəmilə Hacıəhmədzadənin milli geyimli kuklaları, Mehriban Əliyeva-Xəlilzadənin bədii tikmə, təkəlduz nümunələri, Əfşanə Səfərovanın saxsıda güllər xalça eskizi, Səidə Baloğlanovanın milli ornamentlərlə bəzədilmiş zərgərlik məmulatları, bir sözlə, dekorativ-tətbiqi sənətlə məşğul olan peşəkar rəssamların və həvəskar sənətkarların milli ənənələrimizdən qaynaqlanan yüzdən çox sənət əsəri nümayiş etdirilir. Sərgi bir həftə davam edəcək.

Sədaqət YUSİFQIZI

Azərbaycan. - 2009.- 19 noyabr.- S. 8.