Sentyabrın 30-da
Bakının Sabunçu rayonunda yerləşən 11 nömrəli
xüsusi, Əzizbəyov rayonundakı yetim və valideyn himayəsindən
məhrum olmuş uşaqlar üçün respublika
yardımçı internat məktəblərinin nəzdində
yaradılan reabilitasiya-inkişaf və günərzi
qayğı mərkəzləri istifadəyə
verilmişdir.
Mərkəzlər
"Azərbaycan Respublikasında dövlət uşaq müəssisələrindən
uşaqların ailələrə verilməsi
(De-institusionalizasiya) və alternativ qayğı Dövlət
Proqramı (2006-2015-ci illər)" çərçivəsində
və Heydər Əliyev Fondunun prezidenti Mehriban xanım Əliyevanın
təşəbbüsü ilə yaradılmışdır.
Bu münasibətlə
keçirilən mərasimdə təhsil naziri Misir Mərdanov
iştirak etmişdir. Nazir hər iki internat məktəbində
rəmzi açılışı bildirən lenti kəsdikdən
sonra otaqları gəzmiş, dərs prosesi və uşaqlar
üçün yaradılmış şəraitlə
maraqlanmışdır.
Mərkəzlərin
binası Təhsil Nazirliyi tərəfindən yeni tikilmiş
və dövlət proqramına ayrılmış vəsait
hesabına inkişafetdirici təlim materialları, müvafiq
inventar və avadanlıqla təchiz edilmişdir.
Mərkəzlərin
yaradılmasında məqsəd uşaqların bu müəssisələrə
düşməsinin qarşısının
alınmasıdır. Əzizbəyov
və Sabunçu rayonları ərazisində yaşayan, risk
qrupuna daxil olan aztəminatlı, sağlamlıq imkanları məhdud
ailələrin uşaqları həmin mərkəzlərə
cəlb ediləcəklər.
Əzizbəyov rayonunda
yerləşən mərkəz 40, Sabunçu rayonundakı mərkəz
isə 70 məktəbəqədər və məktəbyaşlı
sağlamlıq imkanları məhdud uşaqlara xidmət edəcəkdir.
Burada psixoloq, loqoped,
inkişaf terapiyası xidmətlərinin göstərilməsi
də nəzərdə tutulmuşdur. Psixoloq uşaq və
onun ailəsi ilə kompleks şəkildə iş
aparacaqdır. Mərkəzlərdə sağlamlıq
imkanları məhdud uşaqların həyati bilik və
bacarıqlara yiyələnmələrinə nail olmaq
üçün oyunlar vasitəsilə onların əqli və
fiziki cəhətdən inkişafına yardım edəcəkdir.
Eyni zamanda, valideyn və uşaqlara psixoloji xidmət, həmçinin
günərzi qayğı xidmətləri göstəriləcəkdir.
Mərkəzlər
gün ərzində 10-12 saat fəaliyyət göstərəcəklər.
Mərkəzlərdə
məktəbyaşlı uşaqların (1-8-ci siniflərarası)
dərsdən sonra asudə vaxtlarının təşkili də
nəzərdə tutulmuşdur. Mərkəzlər tərəfindən
uşaqların axşam evlərinə nəqliyyat vasitəsilə
aparılması təmin ediləcəkdir. Bu məqsədlə
mərkəzlərə proqram çərçivəsində
Təhsil Nazirliyi tərəfindən mini sərnişin
avtobusu ayrılmışdır.
Xatırladaq ki, Təhsil
Nazirliyinin nəzdində bu tipli 2 müəssisə fəaliyyət
göstərir. Onlardan
biri Mingəçevir şəhərindəki uşaq və
ailələrə dəstək mərkəzi, digəri isə
Suraxanı rayonundakı 2 nömrəli uşaq evinin nəzdində
fəaliyyət göstərən günərzi qayğı mərkəzidir.
Yaxın vaxtlarda Bərdə və Göyçay
rayonlarında da müvafiq müəssisələrin istifadəyə
verilməsi nəzərdə tutulmuşdur.
Mərasimlərdə
Sabunçu və Əzizbəyov rayonları icra hakimiyyətlərinin
başçıları Əlibaba Əliyev və
Gülağa İslamov, YUNİSEF-in Bakı ofisinin rəhbəri
Mark Hervord və başqaları iştirak etmişlər.
Sonda Misir Mərdanov hər
iki internat məktəbinin kollektivinə uğurlar
arzulamışdır.
AzərTAc
Azərbaycan.- 2009.- 1 oktyabr.- S. 3.