"Əcəmi" seyrəngahı ilə
tanışlıq
Türkdilli ölkələrin
dövlət başçılarının IX zirvə
görüşündə iştirak etmək
üçün oktyabrın 2-də Naxçıvana gələn
Azərbaycan Prezidenti İlham Əliyev, Türkiyə Prezidenti
Abdullah Gül, Qazaxıstan Prezidenti Nursultan Nazarbayev və
Qırğızıstan Prezidenti Kurmanbek Bakiyev muxtar
respublikanın paytaxtındakı "Əcəmi" seyrəngahı
ilə tanış olmuşlar.
Dövlət
başçıları əvvəlcə burada ulu öndər
Heydər Əliyevin büstünü ziyarət etdilər.
Sonra prezidentlər "Əcəmi"
seyrəngahında açıq səma altındakı muzeyin
eksponatlarına baxdılar.
Məlumat verildi ki, 2002-ci ildə
yaradılmış muzeydə əsasən Naxçıvan
Muxtar Respublikasının ayrı-ayrı yaşayış məntəqələrindən
tapılan müxtəlif dövrlərə aid, o cümlədən
Gəmiqaya arxeoloji ərazisində aşkar edilən maddi-mədəniyyət
nümunələri - daşdan düzəldilmiş qoç
heykəlləri, daş kitabələr, müxtəlif daş
fiqurlar, qəbirüstü sənduqələr nümayiş
olunur. Muzeydəki 5 min il tarixi olan eksponat qonaqlarda daha çox
maraq doğurmuşdur. Bütövlükdə eksponatlar Azərbaycanın
ayrılmaz hissəsi olan Naxçıvanın tarixinin qədimliyindən
xəbər verir.
Daha sonra dövlət
başçıları Möminəxatın türbəsi ilə
tanış oldular.
Məlumat verildi ki, Əcəmi
Naxçıvaninin dövrümüzə qədər gəlib
çatan ən gözəl əsəri olan və
Naxçıvan memarlıq məktəbinin bədii
memarlıq səviyyəsinin şahidi kimi Möminəxatın
türbəsi Azərbaycanın çoxsaylı qədim abidələrindən
biridir. Abidənin üzərindəki kitabədən türbənin
1186-cı ildə Məhəmməd Cahan Pəhləvanın
həyat yoldaşı Möminəxatının şərəfinə
tikildiyi məlum olur. Monumental, əzəmətli bir tikili olan
Möminəxatın türbəsi Naxçıvana gələn
səyyah və tacirlərin diqqətini ta qədimdən bəri
özünə cəlb etmiş və abidə bir çox əsərlərdə
öz əksini tapmışdır. Möminəxatın
türbəsi bürcvari Azərbaycan türbələrinin ən
gözəl nümunələrindəndir. Qeyd edilmişdir ki,
kərpicdən tikilən türbənin memarlıq sxemi olduqca
zəngin bir üslubda işlənmişdir.
Qonaqlara Azərbaycanın
bütün tarixi abidələri kimi, Möminəxatın
türbəsinin də qorunması və bərpasına
göstərilən dövlət qayğısı barədə
məlumat verildi.
Dövlət
başçıları türbənin önündə xatirə
şəkli çəkdirdilər.
AzərTAc
Azərbaycan.- 2009.- 3 oktyabr.- S. 4.