Azərbaycanla Dünya Bankı arasında əməkdaşlıq uğurla davam edir

Oktyabrın 2-də Milli Məclisin Sədri Oqtay Əsədov ölkəmizdə səfərdə olan Dünya Bankının Avropa və Mərkəzi Asiya Regionu üzrə Davamlı İnkişaf Sektorunun direktoru Piter Tomsonun başçılıq etdiyi nümayəndə heyəti ilə görüşdü.

Qonaqları salamlayan Milli Məclisin Sədri Oqtay Əsədov ölkəmizin beynəlxalq maliyyə qurumları, o cümlədən Dünya Bankı ilə əməkdaşlığa böyük önəm verdiyini diqqətə çatdırdı. Qeyd olundu ki, Dünya Bankı MDB-nin üzvü olan ölkələr arasında ilk olaraq məhz Azərbaycana 1995-ci ildən infrastruktur layihələri üçün kreditlər ayırmağa başlamışdır. Ümumilikdə isə indiyədək Dünya Bankı ölkəmizdə 47 layihəni maliyyələşdirmişdir. Bu layihələr üzrə ayrılan vəsaitin ümumi həcmi 2 milyard dollardan çoxdur. Ölkəmizdə Dünya Bankının maliyyələşdirdiyi layihələr yüksək keyfiyyətlə icra olunur.

Parlamentin Sədri Oqtay Əsədov onu da diqqətə çatdırdı ki, Milli Məclis Azərbaycanla Dünya Bankı arasında imzalanan kredit sazişlərini təsdiqləmişdir və bu istiqamətdə həyata keçirilən əməkdaşlığı hər zaman dəstəkləyir.

Piter Tomson Dünya Bankının Avropa və Mərkəzi Asiya Regionu üzrə Davamlı İnkişaf Sektorunun direktoru vəzifəsinə bir neçə ay öncə təyin edildiyini dedi. Bildirdi ki, bu səfər tanışlıq məqsədi daşıyır. Piter Tomson Dünya Bankı ilə Azərbaycan arasındakı əməkdaşlıqdan razılığını ifadə etdi.

Görüşdə ölkəmizlə Dünya Bankı arasında əməkdaşlığın perspektivləri barədə fikir mübadiləsi aparıldı.

Azərbaycan.- 2009.- 3 oktyabr.- S. 4.