Xarici İşlər Nazirliyində

Xarici İşlər Nazirliyinin mətbuat xidmətindən bildirmişlər ki, nazir Elmar Məmmədyarov ABŞ-ın energetika nazirinin müavini Daniel Ponemanın rəhbərlik etdiyi nümayəndə heyəti ilə görüşmüşdür.

Azərbaycan ilə ölkəsinin arasında geniş əlaqələrin olduğunu söyləyən D.Poneman ABŞ-ın Azərbaycanla enerji sahəsində uzunmüddətli uğurlu əməkdaşlığını məmnuniyyətlə qeyd etmişdir. Qonaq həmçinin qlobal enerji təhlükəsizliyinin təmin edilməsi məsələsinin ABŞ-ın xarici siyasətinin prioritetlərindən biri olduğunu və ölkəsinin enerjidaşıyıcıların dünya bazarlarına çatdırılmasında çoxşaxəliliyi dəstəklədiyini diqqətə çatdırmışdır.

Nazir E.Məmmədyarov iki ölkə arasında enerji sahəsindəki əməkdaşlığı yüksək qiymətləndirmiş, Azərbaycanın mühüm coğrafi məkanda yerləşdiyini qeyd edərək ölkəmizin enerjidaşıyıcıların ixracatçısı olması ilə yanaşı, onların dünya bazarlarına çatdırılmasındakı tranzit imkanlarını da vurğulamışdır.

Diqqəti Ermənistan-Azərbaycan, Dağlıq Qarabağ münaqişəsinə yönəldən Elmar Məmmədyarov regionda davamlı və uzunmüddətli sülhün bərqərar olması üçün münaqişənin Azərbaycanın ərazi bütövlüyü çərçivəsində tez bir zamanda həll olunmasının vacibliyini bildirmişdir.

Görüşdə tərəflər qarşılıqlı maraq kəsb edən müxtəlif mövzular ətrafında fikir mübadiləsi aparmışlar.

***

Azərbaycanın xarici işlər naziri Elmar Məmmədyarov Pakistan Silahlı Qüvvələrinin Birləşmiş Qərargahlar Komitəsinin sədri, general Tariq Məcid ilə görüşmüşdür.

Xarici İşlər Nazirliyinin mətbuat xidmətindən verilən məlumata görə, görüşdə tərəflər ölkələr arasında münasibətlərin yüksək səviyyədə olmasından məmnunluğunu ifadə etmiş və mövcud əməkdaşlığın bütün sahələrdə geniş perspektivlərə malik olduğunu vurğulamışlar.

Tərəflər Azərbaycan və Pakistan arasında dərin tarixi köklərə malik əlaqələrin olmasını vurğulayaraq hər iki ölkə rəhbərliyinin bu əlaqələrə xüsusi diqqət yetirdiyini bildirmişlər. Həmçinin müxtəlif məsələlərə münasibətdə Azərbaycan və Pakistanın bir-birinə göstərdiyi qarşılıqlı dəstək yüksək qiymətləndirilmişdir.

Görüşdə regionda baş verən proseslər, ikitərəfli və çoxtərəfli münasibətlərə aid məsələlər ətrafında da fikir mübadiləsi aparılmışdır.

AzərTAc

Azərbaycan.- 2009.- 6 oktyabr.- S. 2.