50 illik yolun mübariz yolçusu

İnsanların həyatının ölçüsü onların yaşlarını ifadə edən rəqəmlərin hesabi çoxluğu ilə deyil, mənalı ömürləri ilə dəyərlidir. Qısa olsa da, namusla, səmimiyyətlə keçən ömür uzun sürən, lakin eyib və yalanla yaşanan ömürdən üstündür.

Ömür yollarına işıq saldığım insan öz həyat əsrinin hesabat yaşına qədəm qoyan, həyata tamaşa və bayram kimi deyil, dərs kimi baxan qələm dostumuz Cavid Xaspoladovdur. 1959-cu ildə Göyçayda dünyaya göz açan Cavid Azərbaycan həyatını peşəkar jurnalist qələmi ilə rövnəqləndirməkdədir. Cavid müəllimi tanıyanlar yəqin mənim bu fikrimə opponentlik etməyə çətinlik çəkərlər ki, onun həyat kredosuna çalışmamaq üçün səbəb axtarmaq yox, fəaliyyət üçün vasitələr axtarışı xarakterikdir. 1983-cü ildə ADU-nun jurnalistika fakültəsini fərqlənmə diplomu ilə bitirən qəhrəmanımın özünü elmi iş üzərində çalışmaqla sınaması da onun daxili rasional enerjisindən xəbər verirdi. "Sovet kəndi", "Xalq qəzeti", "Həyat" və digər nüfuzlu qəzetlərdə, AzərTac kimi mötəbər agentlikdə mühüm vəzifələrdə çalışan Cavid Xaspoladov öz mövqeyi, dəst-xətti ilə oxucularının qəlbinə işıqlı yol tapmışdır. Əqidəli, yüksək təfəkkürlü, qərəzsiz jurnalistin həyata baxışı, hadisələrə, faktlara yanaşması, əlbəttə ki, fərqli olur. Cavid kimi jurnalistlərin təfəkküründən süzülən, iti qələmindən çıxan müxtəlif janrlı yazılar oxucu rəğbəti qazanır. Çalışdığı müxtəlif yönlü mətbu orqanlarda sözün yaxşı mənasında zamanın nəbzini tutub məşğul olduğu sahələrin, istər kənd mövzusu olsun, istərsə də siyasət, hüquq sahəsi - kamil işıqlandırıcısı olub. Elə buna görə də həm işlədiyi kollektivlərin, həm də geniş oxucu kütləsinin rəğbətini, hörmətini qazanıb. Çünki onun hər yazısında götürməli bir dəyər olur.

Cavid üçün həyat həmişə hamar və rəvan keçməyib. Ancaq o, çətin ayaqda, "Həyat səni güldürəndə gülürsən, hünərin var ağladanda gül görüm" hikmətinə tapınaraq gülümsəməyə də güc tapıb. Möhkəm iradəsi qarşısında duran çox dağları zəmiyə çevirməyə müvəffəq olub.

Cavid Xaspoladov seçdiyi peşəsinin məsuliyyətini həmişə çiynində hiss etmiş, jurnalistikanın şərəfi keşiyində ləyaqətlə durmuş və bacarıqla şərəfləndirmişdir. Bu gün redaktoru olduğu "Mübariz keşikdə" qəzetinin əsas qayəsi insanların hüquqi maarifləndirilməsi, hüquq-mühafizə orqanlarının hüquqi dövlət, vətəndaş cəmiyyəti quruculuğunda fəal iştirakını işıqlandırmaqdır. "Mübariz keşikdə" qəzetinin səhifələrində cəmiyyət öz həyatını görür və oxuyur. Bu qəzetlə yaxından tanışlıq yüksək qəzetçilik ənənəsinin, səriştəli redaktə bacarığının olduğunu, həmin kollektivdə sağlam psixoloji iqlimin, yaradıcı mühitin hökm sürdüyünü göstərir. Gözəl kollektiv rəhbəri C.Xaspoladov fəaliyyəti, əməlləri, səmimiyyəti ilə həyatını qiymətləndirməyi bacaran, yaşamağa haqq qazanan bir insandır. Yaradıcı insana ən böyük ruh verən dəyərlərdən biri də kollektiv, eyni peşə adamları tərəfindən etiraf olunmasıdır. C.Xaspoladovun bu baxımdan da taleyində uğurlu səhifələr az deyildir.

Kiçik həcmli qəzet yazısında Cavidin portretini bütövlükdə cızmaq təbii ki, mümkün deyil. Lakin ağlının itiliyinə, qəlbinin böyüklüyünə, səmimiliyinə və təmizliyinə etdiyimiz işarələr fikrimizcə, onun kimliyi barədə oxucuda aydın təsəvvür yaradar. Əslində, böyük qəlb sahibi olan Cavid o qədər abırlı insandır ki, onu çox tərifləyəndə sıxılır və bundan uzaq olmağa çalışır. Biz də onun bu istəyini nəzərə aldıq.

Əziz qələm və tələbə dostumuz, filosoflar 50 yaşı müdriklik epoxasının gənclik yaşı kimi dəyərləndirirlər. Bu o deməkdir ki, sənin həyat yolunun parlaq səhifələri ilə hələ çox tanış olacağıq. Bizə isə istedadlı qələm sahibi, vətən daşı olmaqla ölkə vətəndaşı kimi şərəfli adın daşıyıcısı əməkdar jurnalist, polis polkovniki Cavid Xaspoladova tükənməz yaradıcılıq enerjisi, sağlam həyat arzulamaq qalır. O günə çataq ki, onun 100 yaşının hesabını soraq.

Amil NOVRUZOV

Azərbaycan.- 2009.- oktyabr.- S. 7.