İçərişəhərlə tanışlıq

Görkəmli şərqşünas Aida xanım İmanquliyevanın 70 illik yubileyi münasibətilə Bakıda keçirilən "Şərq və Qərb: ortaq mənəvi dəyərlər, elmi-mədəni əlaqələr" mövzusunda Beynəlxalq İbn Ərəbi simpoziumunun iştirakçıları oktyabrın 9-da qədim İçərişəhərlə tanış olmuşlar.

Qoşaqala qapısından başlanan gəzinti zamanı Nazirlər Kabineti yanında "İşərişəhər" Dövlət Tarix-Memarlıq Qoruğu İdarəsinin rəisi Mikayıl Cabbarov Azərbaycan Prezidentinin fərmanı ilə yaradılan idarə haqqında qonaqlara ətraflı məlumat vermiş, ötən əsrlərin yadigarı olan abidələrin qorunması və bərpasına göstərilən dövlət qayğısından danışmışdır.

"Şirvanşahlar sarayı kompleksi" Dövlət Tarix-Memarlıq Muzey-Qoruğuna gələn simpozium iştirakçılarına məlumat verilmişdir ki, XV əsrin əvvəllərində inşa olunmuş Şirvanşahlar sarayı kompleksi Azərbaycan memarlığının nadir incilərindəndir. Onun tikililəri İçərişəhərin təpələrindən birinin ən hündür nöqtəsində yerləşir.

Sonra qonaqlar İçərişəhərin baş planı, Bazar meydanı və Qız qalası ilə tanış olmuşlar. Onlara Qız qalasının tarixi barədə ətraflı məlumat verilmişdir.

Bildirilmişdir ki, Qız qalası yerli əhəng daşından hörülmüşdür. Qala iki hissədən - təxminən 28 metr hündürlüyündə silindrik hissə və dənizə tərəf uzanmış uzunsov dayaq divardan ibarətdir. Bu cür formaya əsasən müdafiə tikililərində, istehkamlarda rast gəlinir. Qız qalası əzəmətli bir müdafiə tikintisi olmaqla bərabər, ümumi həcm quruluşunun, nisbətlərinin və nəhayət, hörgüsünün düşünülmüş şəkildə işlənməsi cəhətdən də yüksək səviyyəli memarlıq və bədii qiymətə malik bir əsərdir.

Xüsusi olaraq diqqətə çatdırılmışdır ki, qala 1964-cü ildən muzey kimi fəaliyyət göstərməyə başlamış və 2000-ci ildə YUNESKO-nun qorunmalı tarixi abidələr siyahısına salınmışdır.

Qonaqlar Karvansarada çay süfrəsinə dəvət edilmişlər.

İçərişəhərlə tanışlıq Beynəlxalq İbn Ərəbi simpoziumunun iştirakçılarında xoş təəssürat doğurmuşdur.

AzərTAc

Azərbaycan.- 2009.- 10 oktyabr.- S. 3.