Bursa şəhərinin Yıldırım rayonunda ulu öndər Heydər Əliyevin büstünün açılışı olmuşdur

Türkiyənin Bursa şəhərinin Yıldırım rayonunda Azərbaycan xalqının ümummilli lideri, türk dünyasının dahi şəxsiyyəti Heydər Əliyevin büstünün açılışı olmuşdur.

Açılış mərasimində çıxış edən ölkəmizin İstanbuldakı baş konsulu Səyyad Aran, Bursa ilə qardaşlaşmış Xırdalan Şəhər İcra Hakimiyyətinin başçısı Zakir Fərəcov, Yıldırım rayonunun bələdiyyə sədri Özgən Kəskin ulu öndərin Azərbaycan və türk dünyası qarşısında müstəsna xidmətlərindən ətraflı bəhs etmişlər.

Vurğulanmışdır ki, türkdilli ölkələrin birlik və bərabərliyi yolunda misilsiz xidmətləri olan Heydər Əliyev, "Bir millət, iki dövlət" adlandırdığı qardaş Azərbaycan və Türkiyə xalqlarının xoşbəxt gələcəyi və rifahı naminə də nəhəng işlər görmüşdür. Ulu öndərin gərgin səyləri ilə ərsəyə gələn Bakı-Tbilisi-Ceyhan, Bakı-Tbilisi-Ərzurum kimi dünyamiqyaslı enerji layihələri Azərbaycanın və Türkiyənin dünyadakı mövqeyini daha da möhkəmləndirdi. Təsadüfi deyil ki, Türkiyə və bütün türk dünyasının liderləri bu dahi şəxsiyyəti öz ağsaqqalı kimi qəbul edirdi. Onun bu siyasi xətti Azərbaycan Prezidenti İlham Əliyev tərəfindən uğurla davam etdirilir.

Bursanın Yıldırım rayonunun bələdiyyə sədri Özgən Kəskin bildirmişdir ki, burada salınan parkda yaxın gələcəkdə akademik Zərifə xanım Əliyevanın da xatirəsi əbədiləşdiriləcəkdir.

Oqtay Bayramov,

AzərTAc-ın xüsusi

müxbiri

Ankara

Azərbaycan.- 2009.- 13 oktyabr.- S. 2.