"Şərq ruhunun Qərb həyatı. Aida İmanquliyevanın yaradıcılıq axtarışlarının izi ilə" kitabının təqdimat mərasimi keçirilmişdir

Oktyabrın 11-də Azərbaycan Milli Elmlər Akademiyasının Nizami Gəncəvi adına Milli Azərbaycan Ədəbiyyatı Muzeyində AMEA-nın müxbir üzvü Səlahəddin Xəlilovun "Şərq ruhunun Qərb həyatı. Aida İmanquliyeva yaradıcılığının izi ilə" kitabının təqdimat mərasimi keçirilmişdir.

Azərbaycanda Şərq-Qərb problematikasının sistemli tədqiqinin əsasını qoyan görkəmli şərqşünas alim Aida xanım İmanquliyevanın 70 illik yubileyinə ithaf edilmiş bu kitabı Şərq-Qərb Tədqiqat Mərkəzi buraxmışdır.

Bakıda keçirilən "Şərq və Qərb: ortaq mənəvi dəyərlər, elmi-mədəni əlaqələr" mövzusunda Beynəlxalq İbn Ərəbi simpoziumu günlərinə təsadüf edən təqdimat mərasimində Moskva Dövlət Universiteti Bakı filialının rektoru, kitabın elmi redaktoru, alimin qızı, professor Nərgiz Paşayeva çıxış etmişdir. O bildirmişdir ki, bu əsər XX əsrin görkəmli şərqşünas alimi, pedaqoq, filologiya elmləri doktoru, professor Aida İmanquliyevanın yaradıcılığına həsr olunmuşdur. Burada Aida xanım tərəfindən Azərbaycan oxucularına təqdim olunmuş Şərqi və Qərbi təmsil edən romantik şairlərin - Şərqdə C.X.Cübran, Ə.ər-Reyhani və M.Nüaymənin, Qərbdə isə U.Bleyk, C.Bayron, R.Emerson və U.Uitmenin ideya dünyası işıqlandırılır, onların poetik yaradıcılığında tərənnüm olunan hər iki qütb arasındakı vəhdət ideyası hərtərəfli şəkildə şərh edilir.

Aida xanımın tədqiq etdiyi Cübran Xəlil Cübran, Əmin ər-Reyhani və Mixail Nüaymənin əsərləri indiyədək Azərbaycan oxucularına geniş şəkildə təqdim olunmamışdır. Bu səbəbdən də həmin ədiblərin bir sıra əsərləri ilk dəfə dilimizə tərcümə olunaraq kitabda işıq üzü görmüşdür. Həmin ərəb şair və yazıçılarının, habelə Aida xanımın əsərlərində onlarla müqayisəli şəkildə təqdim olunan Qərb romantik poeziyası nümayəndələrinin də yaradıcılığından bəzi fraqmentlər geniş oxucu kütləsinin ixtiyarına verilir.

Tədbirdə Səlahəddin Xəlilov və rusiyalı akademik Aleksandr Kudelin kitabın məziyyətlərindən danışmışlar. Onlar bildirmişlər ki, nəfis tərtibatda çap edilmiş 380 səhifəlik bu kitab geniş oxucu kütləsi üçün nəzərdə tutulmuşdur. Əsərdə Şərq-Qərb düşüncə tərzi, sivilizasiyaların dialoqu, ədəbi əlaqələr və romantik poeziya problemləri geniş şərh edilmişdir. Diqqətə çatdırılmışdır ki, Aida xanım yaradıcılıqlarını tədqiq etdiyi görkəmli şəxslərin xidmətlərini göstərməklə kifayətlənməmiş, özü də Şərq-Qərb probleminin həlli istiqamətində olduqca dəyərli fikirlər irəli sürmüşdür.

Tədbirdə filologiya elmləri doktoru, professor Nərgiz Paşayevanın məsul redaktoru olduğu və ön söz yazdığı Cübran Xəlil Cübranın "Sükutun poeziyası" kitabı və filosof alim Səlahəddin Xəlilovun Türkiyədə və Rusiyada işıq üzü görmüş elmi əsərləri iştirakçılara təqdim edilmişdir.

AzərTAc

Azərbaycan.- 2009.- 13 oktyabr.- S. 3.