Madriddə İspaniyanın milli bayramı münasibətilə keçirilən qəbulda Azərbaycan səfiri də iştirak etmişdir

Azərbaycanın İspaniya Krallığındakı səfirliyindən bildirmişlər ki, oktyabrın 12-də Kral I Xuan Karlos ölkənin milli bayramı münasibətilə böyük Kral Sarayında İspaniyanın dövlət və hökumət təmsilçilərini və Madriddəki diplomatik korpusun nümayəndələrini qəbul etmişdir.

Tədbirdə iştirak edən Azərbaycan səfiri Məmməd Əliyev İspaniya Kralı I Xuan Karlosla görüşmüş, Prezident İlham Əliyevin salamlarını və bayram münasibətilə təbriklərini Krala çatdırmışdır.

Kral I Xuan Karlos Azərbaycan Prezidenti İlham Əliyevə səmimi salamlarına və təbriklərinə görə təşəkkürünü bildirmiş, Azərbaycan xalqına və Prezidentinə uğurlar arzu edərək onun da salamlarının Prezident İlham Əliyevə çatdırılmasını xahiş etmişdir.

Kral I Xuan Karlos Azərbaycana, həmçinin Cənubi Qafqaza səfər etmək arzusunda olduğunu, İspaniyanın Azərbaycan ilə əlaqələrin genişləndirilməsində maraqlı olduğunu bildirmiş və bu baxımdan qarşılıqlı yüksək səviyyəli səfərlərin əhəmiyyətini vurğulamışdır.

AzərTAc

Azərbaycan.- 2009.- 13 oktyabr.- S. 5.