İslam Konfransı Təşkilatına üzv dövlətlərin Mədəniyyət Nazirlərinin VI Konfransı başa çatmışdır

Bakının 2009-cu ildə İslam mədəniyyətinin paytaxtı elan edilməsi çərçivəsində burada keçirilən İslam Konfransı Təşkilatına üzv dövlətlərin Mədəniyyət Nazirlərinin VI Konfransına oktyabrın 14-də yekun vurulmuşdur.

Azərbaycanın mədəniyyət və turizm naziri Əbülfəs Qarayevin sədrlik etdiyi konfransda üzv dövlətlərin nümayəndə heyətlərinin bəyanatları və onların islam dünyası üçün mədəni strategiyasının tətbiqi səyləri barədə fikirləri dinlənilmişdir. Qeyd edilmişdir ki, burada qəbul olunan sənədlər anlaşma və dialoq üçün mühüm rol oynayacaqdır.

Tədbirdə "Mədəniyyət və kommunikasiya sahəsində İSESKO-nun fəaliyyəti", "Dialoq və mədəni müxtəliflik və islama və müsəlmanlara KİV tərəfindən ləkə yaxma kampaniyalarının təkzib edilməsi" mövzuları barədə qətnamə layihələri müzakirə olunmuş və qəbul edilmişdir.

İslam Ölkələri Elm, Təhsil və Mədəniyyət Təşkilatının (İSESKO) Baş Direktoru Əbdüləziz bin Osman əl-Tüveycrinin "İSESKO-nun İslam Mədəniyyəti Paytaxtları Proqramının həyata keçirilməsinin davam etdirilməsi üzrə səyləri haqqında" hesabatı dinlənilmişdir. O, 2009-cu ildə Bakının - İslam mədəniyyətinin paytaxtı olduğunu xatırlatmış, bu çərçivədə islam dünyasının həmrəyliyinin gücləndirilməsi üçün bir sıra mühüm tədbirlərinin keçirildiyini demişdir. Natiq bu ilin fevralında "Bakı - İslam Mədəniyyətinin Paytaxtı - 2009" mədəniyyət ilinin təntənəli açılış mərasimində Prezident İlham Əliyevin iştirakını xüsusi vurğulamışdır. Demişdir ki, keçirilən tədbirlər islam ölkələrinin həmrəyliyinə töhfə verəcəkdir. Baş direktor İSESKO ilə Azərbaycan arasında əlaqələrin yüksək səviyyədə olduğunu, birgə çoxsaylı proqramlar həyata keçirildiyini vurğulamışdır.

2015-ci ildən 2024-cü ilədək İslam mədəniyyətinin paytaxt şəhərlərinin müəyyənləşdirilməsi üçün verilən təkliflər müzakirə edilmişdir. Naxçıvan şəhərinin 2018-ci ildə İslam mədəniyyətinin paytaxtı seçilməsi təsdiq olunmuşdur.

Konfransda Ermənistanın işğalı nəticəsində Azərbaycan abidələrinin dağıdılması İSESKO-nun qətnaməsinə daxil edilmişdir. Dağlıq Qarabağdakı abidələrin dağıdılmasının araşdırılması ilə bağlı İSESKO-da xüsusi komitə yaradılması, İslam Ölkələri Mədəniyyət Nazirlərinin 7-ci Konfransının 2011-ci ilin oktyabr ayında Əlcəzairin Klemsan şəhərində keçirilməsi qərara alınmışdır.

Azərbaycan.- 2009.- 15 oktyabr.- S. 7.