Bakı şəhərində Yeniyetmələrin VI Beynəlxalq Elm Olimpiadasının keçirilməsi haqqında

Son illər ölkəmizdə təhsil sahəsində böyük islahatlar aparılır, elmi-texniki tərəqqinin sürətlə inkişafına hesablanmış müasir təhsil sisteminin formalaşdırılması istiqamətində mühüm tədbirlər həyata keçirilir. Şagird və tələbələrimiz respublikamızın və dünyanın nüfuzlu təhsil ocaqlarında yüksək nəticələr nümayiş etdirir, müxtəlif yerli və beynəlxalq elm olimpiadalarında medallar qazanırlar.

Yeniyetmələrin Beynəlxalq Elm Olimpiadası Təşkilat Komitəsi tərəfindən növbəti - Yeniyetmələrin VI Beynəlxalq Elm Olimpiadasının 2009-cu ilin dekabr ayında Azərbaycanda keçirilməsi qərara alınmışdır.

Azərbaycanda gənc nəslin elmə olan marağının daha da artırılmasını, onların yaradıcılıq potensialının üzə çıxarılmasını və olimpiadanın yüksək səviyyədə keçirilməsini təmin etmək məqsədi ilə qərara alıram:

1. Azərbaycan Respublikasının Gənclər və İdman Nazirliyi Azərbaycan Respublikasının Təhsil Nazirliyi, Azərbaycan Respublikasının Xarici İşlər Nazirliyi, Azərbaycan Milli Elmlər Akademiyası və Azərbaycan Respublikasının Tələbə Qəbulu üzrə Dövlət Komissiyası ilə birlikdə Bakı şəhərində Yeniyetmələrin VI Beynəlxalq Elm Olimpiadasının keçirilməsini təmin etsin.

2. Bakı şəhərində Yeniyetmələrin VI Beynəlxalq Elm Olimpiadasının keçirilməsi üçün Azərbaycan Respublikasının 2009-cu ilin dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Azərbaycan Respublikasının Gənclər və İdman Nazirliyinə 2,4 milyon (iki milyon dörd yüz min) manat məbləğində vəsait ayrılsın.

3. Azərbaycan Respublikasının Maliyyə Nazirliyi bu sərəncamın 2-ci bəndində nəzərdə tutulmuş vəsaitin maliyyələşdirilməsini müəyyən olunmuş qaydada həyata keçirsin.

4. Azərbaycan Respublikasının Nazirlər Kabineti bu sərəncamdan irəli gələn məsələləri həll etsin.

İlham ƏLİYEV,

Azərbaycan Respublikasının Prezidenti

Bakı şəhəri, 15 oktyabr 2009-cu il

Azərbaycan.- 2009.- 16 oktyabr.- S. 2.