Əsrimizin görkəmli dövlət xadimi

Bu gün Azərbaycan beynəlxalq miqyasda səciyyələndirilərkən ilk növbədə sabit iqtisadiyyatı və sosial həyatı dinamik inkişaf edən, mühüm geostrateji mövqeyə malik olan, qlobal enerji təhlükəsizliyinin təminatında getdikcə vacib rol oynayan bir dövlət kimi xarakterizə olunur. Cənubi Qafqazın lideri statusunu daşıyan ölkəmiz artıq mövcud olduğu regionda hadisələrin inkişaf istiqamətini müəyyən edən aparıcı rola malikdir və təsadüfi deyil ki, bölgəyə iqtisadi, siyasi maraq göstərən dünya dövlətləri, beynəlxalq təşkilatlar, ilk növbədə, Azərbaycanın mövqeyini nəzərə alır, onunla hesablaşırlar.

Bütün bunlar bir daha ölkədə həyata keçirilən daxili və xarici siyasətin nə qədər uğurlu olduğunu, onun praqmatizm üzərində qurulduğunu, milli maraqların müdafiəsinə yönəldiyini əyani surətdə təsdiqləmiş olur. Dünya miqyasında Azərbaycanı fərqləndirən daha bir xüsusiyyət isə ölkəmizin daim humanizm prinsiplərindən çıxış etməsi və sülhpərvər dövlət imici qazanmasıdır. Bunun bariz nümunələrindən biri Azərbaycanın dünyanın müxtəlif bölgələrində həyata keçirilən sülhməramlı əməliyyatlarda yaxından iştirakıdır. Hazırda Azərbaycan ordusunun bir qrup zabit və əsgər heyəti dünyanın ən qaynar bölgələrindən biri sayılan Əfqanıstanda sülhməramlı missiya yerinə yetirməkdə davam edir.

Qeyd edilənlərin nəticəsidir ki, Azərbaycan indi Yer üzündə ümumi sülhün bərqərar olmasında aparıcı rol oynayan dövlətlər sırasında yer alır, bu istiqamətdə Prezident İlham Əliyevin həyata keçirdiyi siyasət dünya miqyasında xüsusi təqdir olunur. Bu mənada, Prezident İlham Əliyevin Kanadanın türkdilli diasporlarının Torontoda baş tutan forumunda "İlin adamı" seçilməsi də tam təbii qarşılanmışdır. Qeyd edək ki, sözügedən forumda Kanadanın türkdilli diasporları ilə yanaşı, Gürcüstan, Latviya, Litva və Estoniya diasporlarının nümayəndələri, habelə Beynəlxalq Niaqara Musiqi Festivalının rəhbəri də iştirak edib. Forumda Azərbaycan Prezidenti İlham Əliyev Yer üzündə ümumi sülhün bərqərar olması işinə böyük töhfə verən XXI əsrin görkəmli siyasi xadimi kimi yekdilliklə "İlin adamı" seçilmişdir.

Forum iştirakçılarının Prezident İlham Əliyevə ünvanlanmış müraciətində onun çoxmilyonlu türk dünyasında şəksiz lider olması, bütün planetdə sülhü bərqərar etmək, Cənubi Qafqaz regionunda və onun hüdudlarından kənarda siyasi vəziyyəti sabitləşdirmək səyləri vurğulanır. Müraciətdə daha sonra deyilir: "Siz Azərbaycanın qarşısında duran ən ümdə problemləri həll etmək, müasir dövrün aktual geosiyasi məsələləri müzakirə edilərkən müsbət nəticələr əldə edilməsinə kömək göstərmək, siyasi, iqtisadi və mədəni baxımdan optimal həll variantlarını operativ tapmaq bacarığınız sayəsində zəmanəmizin görkəmli dövlət və siyasi xadimləri sırasına çıxmısınız..."

Azərbaycanın yeni tarixinin mühüm reallıqlarından biri də xalqın tələbi ilə ikinci dəfə hakimiyyətə qayıdan ümummilli lider Heydər Əliyev tərəfindən əsası qoyulan sabitliyin ölkədə siyasi, iqtisadi və digər sahələrin də dinamik inkişafında mühüm rol oynamasıdır. Sosial sahədə vəziyyətin yaxşılaşması, Azərbaycanın beynəlxalq arenada mövqelərinin güclənməsi və bu qəbildən olan digər amillər xalqla hakimiyyət birliyini daha da möhkəmləndirdi. Ümummilli liderin müəyyənləşdirdiyi siyasətin Prezident İlham Əliyev tərəfindən uğurla davam etdirilməsi artıq bir çox mühüm sahələr üzrə Azərbaycanı dünya birincisinə çevirib. Məsələn, iqtisadi artım dinamikasına görə, Azərbaycan dünya dövlətlərinin reytinq cədvəlinə başçılıq etdi, aparılan iqtisadi islahatlarda yenə də ölkəmiz birinci elan olundu. Qlobal maliyyə böhranı başlandıqdan sonra Azərbaycan iqtisadiyyatı yenə də dayanıqlığına və inkişaf səviyyəsinə görə fərqlənənlər sırasında yer aldı. Elə bu da böhran şəraitində belə ölkə əhalisinin maddi rifah halının əvvəlki kimi yüksələn xətt üzrə inkişaf etməsinə səbəb olmaqdadır.

Siyasət, mədəniyyət, təhsil, səhiyyə, idman və digər sahələrdə də görülən işlər Azərbaycanın beynəlxalq arenada mövqelərinin daha da güclənməsinə gətirib çıxarıb. Bu sahələr üzrə mühüm beynəlxalq tədbirlərə ev sahibliyi edən əsas dövlətlərdən biri məhz Azərbaycandır. Təsadüfi deyil ki, 2009-cu ildə Bakı islam mədəniyyətinin paytaxtı elan edilmişdir.

Sadalanan məqamlara diqqət yetirən Kanada forumunun iştirakçıları Azərbaycan Respublikasının rəhbərinin xalqın ümummilli lideri Heydər Əliyevin gözəl ənənələrinin geniş yayılmasına yönəlmiş səmərəli fəaliyyətini vurğulayaraq xüsusi qeyd etmişlər ki, məhz bu fəaliyyət sayəsində Azərbaycan, onun paytaxtı - islam dünyasının mədəni paytaxtı seçilmişdir. Bakı artıq Şərqdə Qərb mədəniyyətinin çiçəklənən bölgəsi, Qərbdə isə qədim Şərq sivilizasiyasına xas olan ən yüksək mənəvi və mədəni dəyərlərin mərkəzi hesab edilir.

Azərbaycanın əsas təşəbbüskarlarından və iştirakçılarından olduğu qlobal layihələrin həm də ümumi inkişafa, sülh və tərəqqiyə yönəlməsinə də nəzər salan Kanada forumunun iştirakçıları bu kimi məsələlərdə Prezident İlham Əliyevin xüsusi rol oynadığını bəyan edirlər. Forum iştirakçılarının Azərbaycan dövlət başçısına ünvanlanmış müraciətində qeyd edilir: "Dünyada Sizi tarixi "İpək yolu" qlobal layihəsinin əsas memarlarından və ideya-siyasi baxımdan bu layihəni həyata keçirənlərdən biri hesab edirlər. Bu layihənin nəcib ideyaları Yer üzündə tərəqqi və sülh naminə sivilizasiyaların hərtərəfli inteqrasiyasına, mədəni sintezə, mənəvi cəhətdən qarşılıqlı zənginləşməyə, qarşılıqlı iqtisadi əlaqələrə xidmət edir..."

Kanadanın türkdilli diasporlarının forumunda çıxış edən nümayəndələr Azərbaycan Prezidentinin mükəmməl savada, nadir erudisiyaya malik olmasını da qeyd edərək vurğulamışlar ki, bu keyfiyyətlər onun ən müxtəlif beynəlxalq tribunalardan müxtəlif auditoriya qarşısında nitq söyləməsinə, ölkəmiz üçün mühüm mədəni və iqtisadi layihələrə diqqəti cəlb etməsinə, hamıda həmin layihələrə maraq hissi oyatmasına kömək edir. Kanadadakı türkdilli diasporların forumunun iştirakçıları bütün bunları əsas tutaraq Azərbaycan Prezidenti İlham Əliyevi yekdilliklə "İlin adamı" seçmişlər.

Xatırladaq ki, bundan əvvəl də göstərdiyi xidmətlərə görə Azərbaycan Prezidenti İlham Əliyev müxtəlif vaxtlarda "İlin adamı" elan olunub. Məsələn, Türkiyədə nəşr olunan və Avrasiya regionunda geniş yayılan nüfuzlu "Ekovitrin" jurnalı 2005-ci ilin nəticələrinə görə, Avrasiya ölkələrində keçirdiyi sorğu əsasında Prezident İlham Əliyevi "Avrasiyada ilin siyasət adamı - Prezidenti" elan etmişdir. Azərbaycan Prezidenti bu mükafata bir sıra sahələrdə səmərəli fəaliyyətinə və qazandığı uğurlara görə layiq görülmüşdür. Respondentlərin fikrinə və tanınmış analitik-sorğu mərkəzlərinin rəyinə görə, Prezident İlham Əliyevin rəhbərliyi ilə Azərbaycan 2005-ci ildə dünyada ən dinamik inkişaf edən ölkə olmuşdur. Bundan başqa, Prezident İlham Əliyev və onun sədri olduğu Yeni Azərbaycan Partiyası 2003-cü ilin prezident və 2005-ci ilin parlament seçkilərində inamlı qələbə qazanmış, əsrin layihəsi hesab olunan Bakı-Tbilisi-Ceyhan əsas ixrac neft boru kəmərinin, habelə Bakı-Tbilisi-Ərzurum qaz kəmərinin işə düşməsi, Qars-Axalkalaki-Tbilisi-Bakı dəmiryolu xəttinin çəkilməsi istiqamətində məqsədyönlü və səmərəli fəaliyyət göstərmişdir.

Prezident İlham Əliyevin rəhbərliyi altında həyata keçirilən siyasət dünyanın bir çox nüfuzlu təşkilatlarının tərtib etdiyi reytinq cədvəllərinə, hazırladığı hesabatlara Azərbaycanın liderlik etməsi ilə nəticələnmişdir. Məsələn, dünyanın ən nüfuzlu maliyyə qurumlarından olan Dünya Bankı ötən il hazırladığı "Doing Business" hesabatında Azərbaycanı bir nömrəli islahatçı ölkə kimi elan etmişdir. Eləcə də Azərbaycanda aparılan islahatlar, insan haqlarının daim ön planda tutulması, ölkə vətəndaşlarının maraqlarının həm siyasi, həm maddi mənada təminatı üçün atılan konkret addımlar bu gün ölkə rəhbərliyi tərəfindən həyata keçirilən siyasətin xalq tərəfindən tam dəstəklənməsinə gətirib çıxarmışdır. Bu göstərici üzrə də postsovet məkanında liderlik Azərbaycana məxsusdur. Bu istiqamətdə görülən işlərin davamı xalq və hakimiyyət arasında birliyi daha da möhkəmləndirməkdə, Azərbaycanda demokratiyanın inkişaf tempini bir qədər də sürətləndirməkdədir. Prezident İlham Əliyev bununla bağlı demişdir: "Azərbaycanda siyasi islahatlar uğurla gedir. Azərbaycan demokratik dövlətdir və demokratiya yolunu seçibdir. Bizim hüquqi dövlət quruculuğu işində böyük uğurlarımız var. Qanunun aliliyinin tətbiq edilməsində böyük addımlar atılıbdır. Azərbaycanda bütün azadlıqlar var - həm iqtisadi, həm siyasi azadlıqlar".

Bütün bunların məntiqi nəticəsidir ki, ABŞ-da yerləşən və dünya üzrə insan təbiətini və davranışlarını öyrənən "Gallup" təşkilatının elan etdiyi sorğuya görə, Azərbaycanda əhalinin 77 faizi ölkə rəhbərliyinin işindən razıdır və bu, postsovet məkanında ən yüksək göstəricidir.

"Gallup" təşkilatı bildirir ki, 12 postsovet ölkəsində hər min nəfərlə üzbəüz söhbətdə onlara belə bir sual verilib: "Sizcə, ölkə rəhbərliyi işinin öhdəsindən necə gəlir?" Bu suala cavabda "Rəhbərliyin işini bəyənirəm" deyənlərin sayına görə Azərbaycan ilk sırada gəlib və qeyd edildiyi kimi, respondentlərin 77 faizi ölkə rəhbərliyinin həyata keçirdiyi siyasəti dəstəkləyib. Sorğunun nəticələri bir daha əyani şəkildə nümayiş etdirir ki, Azərbaycanda ölkə rəhbərliyinə xalqın etimadı kifayət qədər yüksəkdir və həyata keçirilən siyasət geniş xalq kütlələri tərəfindən tam dəstəklənir.

Qeyd edilənlər ümumilikdə belə bir nəticəyə gəlməyə əsas verir ki, Azərbaycan təkcə iqtisadi inkişafına görə yox, digər mühüm sahələr üzrə də dünya liderləri sırasındadır. Bu isə Prezident İlham Əliyevin rəhbərliyi altında həyata keçirilən siyasətin rasional xarakter daşıması, sosial liberailzmə əsaslanması, milli maraqların qorunmasına yönəlməsi, beynəlxalq sferada ölkəmizin mövqelərinin güclənməsini təmin etməsi, həmçinin bu siyasətin qlobal miqyasda da inkişaf və sülhə xidmət etməsinin məntiqi nəticəsidir.

Rasim BAYRAMOV

Azərbaycan.- 2009.- 16 oktyabr.- S. 3.