Xarici İşlər Nazirliyində

Azərbaycanın xarici işlər naziri Elmar Məmmədyarov oktyabrın 15-də ölkəmizdə səfərdə olan Litvanın xarici işlər nazirinin müavini Evaldas İqnataviçusla görüşmüşdür.

Xarici İşlər Nazirliyinin mətbuat xidmətindən bildirmişlər ki, tərəflər Azərbaycan ilə Litva arasındakı münasibətlərin cari vəziyyəti, mövcud və perspektiv layihələr ətrafında fikir mübadiləsi aparmışlar. Ölkələrimiz arasındakı əlaqələrin intensivləşdirilməsi üçün geniş potensialın olduğu xüsusi vurğulanmışdır.

Görüşdə, həmçinin birgə maraq kəsb edən ikitərəfli, regional və qlobal məsələlər ətrafında da fikir mübadiləsi aparılmışdır.

* * *

Xarici İşlər Nazirliyinin mətbuat xidmətindən bildirmişlər ki, nazir Elmar Məmmədyarov Qətər Dövlətinin mədəniyyət, incəsənət və irs naziri Hamad əl-Kavari ilə görüşmüşdür.

Hamad əl-Kavari Bakıda iştirak etdiyi İslam Konfransı Təşkilatının Mədəniyyət Nazirlərinin VI konfransının işini yüksək qiymətləndirərək belə tədbirlərin ölkələr arasında mədəniyyət sahəsində münasibətlərin inkişafına gözəl şərait yaratdığını demişdir.

Qətər Dövləti ilə Azərbaycan arasında sıx əlaqələrin mövcudluğunu qeyd edən qonaq mədəniyyətin xalqlarımızın bir-biri ilə daha yaxın olmasında xüsusi rol oynadığını da vurğulamışdır.

Nazir E.Məmmədyarov ölkələrimiz arasında siyasi sahədə münasibətlərin yüksək səviyyədə olduğunu və bu vəziyyətin digər, o cümlədən iqtisadiyyat, mədəniyyət sahələrinə şamil edilməsinin vacibliyini demişdir.

Mədəniyyət, adət-ənənələr xalqları birləşdirən amillərdən biri olduğunu söyləyən nazir E.Məmmədyarov İslam ummasında bu sahədə birlik nümayiş etdirilməsi zəruriliyini də vurğulamışdır.

Görüşdə Yaxın Şərq və Cənubi Qafqaz bölgələrində, həmçinin beynəlxalq aləmdə cərəyan edən proseslər ətrafında fikir mübadiləsi aparılmışdır.

AzərTAc

Azərbaycan.- 2009.- 16 oktyabr.- S.3.