İspaniya Kralı Azərbaycan Respublikasının səfirini qəbul etmişdir

Azərbaycan Respublikasının İspaniya Krallığındakı səfirliyindən bildirmişlər ki, İspaniya Kralı I Xuan Karlos və Kraliça Sofiya iqamətgahları - Zarzuela Sarayında ölkəmizin səfiri Məmməd Əliyevi qəbul etmişlər.

Qəbul zamanı səfir M.Əliyev Azərbaycan Respublikasının Prezidenti İlham Əliyevin və Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın səmimi salamlarını, xoş arzularını İspaniya Kralına və Kraliçaya çatdırmışdır.

Azərbaycanı daha geniş şəkildə tanıtmaq məqsədilə Heydər Əliyev Fondu tərəfindən hazırlanmış nəfis albomlar və "Qarabağ xanəndələri" toplusu Kral I Xuan Karlosa və Kraliça Sofiyaya hədiyyə edilmişdir.

Kraliça Sofiya Fondunun prezidenti - İspaniya Kraliçası Sofiya Heydər Əliyev Fondunun fəaliyyəti ilə maraqlanmış və fondun prezidenti Mehriban xanım Əliyevaya səmimi salamlarını, xoş diləklərini çatdırmağı xahiş etmişdir.

Azərbaycanı və Cənubi Qafqazı görməyi çox arzu etdiyini söyləyən İspaniya Kralı I Xuan Karlos Azərbaycan Prezidenti İlham Əliyevə ən səmimi arzularını və salamlarını çatdırmağı səfirdən xahiş etmişdir.

Qəbulun sonunda İspaniya Kralı I Xuan Karlos və Kraliça Sofiya tezliklə ölkəmizi ziyarət etmək istədiklərini və Azərbaycan Prezidenti İlham Əliyevin və Heydər Əliyev Fondunun prezidenti Mehriban xanım Əliyevanın İspaniyanı ziyarət etmələrini arzu etdiklərini bildirmişlər.

AzərTAc

Azərbaycan.- 2009.- 20 oktyabr.- S. 3.