"Xəzər Beynəlxalq İnvestisiya Şirkəti"
fəaliyyətini genişləndirir
Oktyabrın 19-da Paytaxtın
"Hyatt Regency" mehmanxanasının
"Şamaxı" zalında "Xəzər Beynəlxalq
İnvestisiya Şirkəti"nin (XBİŞ) səhmdarlarının
iştirakı ilə mətbuat konfransı
keçirilmişdir.
Bu şirkət 2008-ci ilin
martında Azərbaycan İnvestisiya Şirkəti və
"Özəl Sektorun İnkişafı üzrə İslam
İnkişaf Korporasiyası" (İslam İnkişaf
Bankının maliyyə qurumu) tərəfindən təsis
edilmişdir. Sonradan onun sıralarına Səudiyyə Ərəbistanın
"Tanmiyat", Yəmənin "Al Ahmar" və
Küveytin "Aref İnvestment" qrupları da
qoşulmuşdur.
Mətbuat konfransını
açan "Özəl Sektorun İnkişafı üzrə
İslam İnkişaf Korporasiyası"nın
icraçı direktoru Xalid əl-Abudi bildirmişdir ki, fəaliyyətlərinin
əsas məqsədi müsəlman ölkələrində
qeyri-neft sektoruna sərmayə qoymaq və bu sahəni
inkişaf etdirməkdən ibarətdir. Bundan əlavə,
qurum özəl müəssisələrin yaradılması və
təkmilləşdirilməsi məqsədilə dövlət
və özəl şirkətlərə məsləhət
xidmətləri göstərir. O, dünyanı bürüyən
maliyyə böhranına baxmayaraq, XBİŞ-in fəaliyyətini
uğurla davam etdirdiyini diqqətə
çatdırmışdır.
Azərbaycan Dövlət
İnvestisiya Şirkətinin icraçı direktoru Əfqan
İsayev dövlətimizin başçısının
özəl bölmənin inkişafına böyük diqqət
və qayğı göstərdiyini vurğulamış, Azərbaycanda
yaradılmış əlverişli biznes mühitinin xarici sərmayədarlarda
marağı daha da artırdığını qeyd
etmişdir.
XBİŞ-in icraçı
direktoru Toğrul Köçərli demişdir ki, 3 milyon manat
nizamnamə kapitalı ilə fəaliyyətə başlayan
quruma bugünədək 23 milyon manat maliyyə vəsaiti
ayrılmışdır. Bunun 17 milyon manatı xarici sərmayədarların
payına düşür. Samux rayonunda fəaliyyət göstərən
"NAA Aqrotara" şirkətinin nəzdində ölkə
üzrə ən böyük - 25 min tonluq soyuducu anbar
kompleksinin fəaliyyətinin təkmilləşdirilməsi
üçün bağlanmış Sazişə əsasən,
5,5 milyon manat vəsait ayrılmışdır. Digər layihəyə
əsasən, Saray qəsəbəsində 169 evdən ibarət
şəhərciyin tikilməsinə şirkət tərəfindən
6,4 milyon manat (layihənin ümumi dəyərinin 20 faizi)
birbaşa sərmayə yatırılmışdır.
Üçüncü layihə isə kənd təsərrüfatı
sahəsini əhatə edir. Belə ki, bostançılıq
üzrə təsərrüfatlardan birində istehsal prosesini
yeni təkmilləşdirilmiş səviyyəyə
çatdırmaq üçün 1,5 milyon manat (layihənin
ümumi dəyərinin 68 faizi) vəsait
ayrılmışdır.
Sonra "Xəzər Beynəlxalq
İnvestisiya Şirkəti"nin digər səhmdarları
olan maliyyə qurumlarının nümayəndələri
çıxış edərək Azərbaycanda əlverişli
investisiya mühitindən razılıqlarını ifadə
etmiş, birgə fəaliyyət barədə məlumat
vermişlər.
Sonda mətbuat nümayəndələrinin
sualları cavablandırılmışdır.
AzərTAc
Azərbaycan.- 2009.- 20 oktyabr.- S. 6.