Azərbaycanda İordaniya Haşimilər Krallığının mədəniyyət günlərinin təntənəli açılış mərasimi olmuşdur

Oktyabrın 20-da "Bakı-İslam Mədəniyyətinin Paytaxtı-2009" mədəniyyət ili çərçivəsində Muzey Mərkəzində İordaniya Haşimilər Krallığının mədəniyyət günlərinin təntənəli açılış mərasimi keçirilmişdir.

Açılış mərasimində çıxış edən Azərbaycanın mədəniyyət və turizm nazirinin müavini Ədalət Vəliyev bildirmişdir ki, cari ildə İslam mədəniyyətinin paytaxtı elan edilmiş Bakı şəhəri bir-birindən maraqlı, silsilə tədbirlərə ev sahibliyi etmişdir.

Bu günlərdə yekunlaşan İslam Konfransı Təşkilatının üzvü olan dövlətlərin Mədəniyyət Nazirlərinin VI Konfransının tarixi əhəmiyyətinə toxunan natiq son illər Şərq xalqlarının mədəni irsinin öyrənilməsi istiqamətində atılan mühüm addımlardan danışmış, mədəniyyət günlərinin Azərbaycanla İordaniya arasında əlaqələrin inkişafına yeni töhfə verəcəyini vurğulamışdır.

Bildirilmişdir ki, bu günlərdə şəhərimizin sakinləri və paytaxtımızın qonaqları İordaniya kino şirkətləri tərəfindən istehsal edilmiş filmlərə baxacaq, bu xalqın adət-ənənəsini, milli xüsusiyyətlərini özündə əks etdirən ekspozisiyalarla tanış olacaqlar.

İordaniyanın Azərbaycandakı səfiri Adel Adaileh ilk dəfə keçirilən mədəniyyət günlərini yüksək qiymətləndirərək demişdir ki, dövlət başçılarının qarşılıqlı səfərləri, yüksək səviyyəli görüşlər və danışıqlar ikitərəfli münasibətlərin yüksələn xətt üzrə inkişafına əlverişli zəmin yaratmışdır.

A.Adaileh diqqətə çatdırmışdır ki, iki ölkə arasında münasibətləri arzu olunan səviyyəyə çatdırmaq üçün Kral II Abdullah Azərbaycana, Prezident İlham Əliyev isə İordaniyaya səfər etmişdir.

Ölkələrimiz iqtisadi, mədəni, ticari, informasiya və turizm sahələrində çox uğurlu əməkdaşlıq edirlər.

Səfir Ədalət Vəliyevə xatirə hədiyyələri təqdim etmişdir.

Sonra iştirakçılar bu ölkənin milli geyimlərinə və "Ət-Tafilə dağları" mahnı-rəqs qrupunun çıxışına tamaşa etmiş, iordaniyalı rəssamların 49 əsəri və 30 foto işi ilə tanış olmuşlar.

Mədəniyyət günləri oktyabrın 22-dək davam edəcəkdir.

Azərbaycan.- 2009.- 21 oktyabr.- S. 6.