Dünya Bankının icraçı direktoru xanım Nqozi Okonco-İvealan İçərişəhərlə tanış olmuşdur

Azərbaycana səfəri çərçivəsində Dünya Bankının icraçı direktoru xanım Nqozi Okonco-İveala qədim İçərişəhərlə tanış olmuşdur.

Gəzinti zamanı "İçərişəhər" Dövlət Tarix-Memarlıq Qoruğu İdarəsinin rəisi Mikayıl Cabbarov qonağa dünya şəhərsalma sənətinin nadir nümunəsi, YUNESKO-nun Dünya İrsi Siyahısına daxil edilmiş İçərişəhər, habelə burada aparılan son təmir və abadlaşdırma işləri barədə ətraflı məlumat vermişdir.

Bakının rəmzi sayılan qədim və əzəmətli Qız qalasının tarixi barədə dolğun məlumat qonağın böyük marağına səbəb olmuşdur. Mərkəzi Asiyanın müxtəlif ölkələri ilə ticarət əlaqələrimizin sübutu olan Buxara Karvansarası, Hindistanla tarixi iqtisadi-mədəni əlaqələrimizdən xəbər verən Multanı Karvansarası ilə tanışlıq da xanım Nqozi Okonco-İvealanda xoş təəssürat oyatmışdır. Qonağa müxtəlif milli-tətbiqi sənətkarlıq və xalçaçılıq sənəti nümunələri göstərilmişdir.

Gəzinti dünya əhəmiyyətli tarix-memarlıq abidəsi olan Şirvanşahlar Sarayı Kompleksinin ərazisində davam etdirilmişdir. Qonağa məlumat verilmişdir ki, tikintisi XII əsrdən başlayan və əsasən XV əsrdə başa çatdırılan Şirvanşahlar Sarayı Kompleksi müxtəlif səviyyələrdə yerləşən 3 daxili həyətdən ibarətdir. Şamaxıda XII əsrdə baş vermiş zəlzələ səbəbindən Şirvanşahlar dövlətinin paytaxtı Bakıya köçürülmüş və burada sarayın inşasına başlanılmışdır.

Sonda Şirvanşahlar Sarayı Kompleksinin ərazisində qonaq üçün Mədəniyyət və Turizm Nazirliyi tərəfindən Qədim musiqi alətləri Ansamblının konserti təşkil olunmuşdur.

AzərTAc

Azərbaycan.- 2009.- 22 oktyabr.- S. 2.